ތިލަދުންމަތީ އުތުރުބުރީ ވަނގާރަކީ އެ އަތޮޅު ތުރާކުނުގެ ބައެއްގެ ގޮތުގައި ކަނޑައަޅުއްވައިފިއެވެ.
ތުރާކުނާ އެއް ފަޅުތެރެއެއްގައި އޮތް ވަނގާރަކީ އެ ރަށުގެ ބައެއް ކަމަށް ރައީސް ޑރ. މުޙައްމަދު މުޢިއްޒު ކަނޑައަޅުއްވާފައި ވަނީ މިއަދު އެމަނިކުފާނު ސޮއިކުރައްވައި ނެރުއްވި ގަރާރެއްގައެވެ.
ރައީސް އޮފީހުން ނެރުނު އެ ގަރާރުގައި ބުނީ ވަނގާރަކީ ތުރާކުނުގެ ބައެއްގެ ގޮތުގައި ދިވެހިރާއްޖޭގެ އިދާރީ ދާއިރާތައް ލާމަރުކަޒީ އުސޫލުން ހިންގުމުގެ ގާނޫނުން ރައީސަށް ލިބިދޭ ބާރުގެ ދަށުން ކަނޑައަޅާފައިވާ ކަމަށެވެ. ތުރާކުނާ ގާތްގަނޑަކަށް 300 މީޓަރު ދުރުގައި އޮންނަ ވަނގާރުގެ ބޮޑުމިނަކީ 11 ހެކްޓަރެވެ.
ވަނގާރުގައި ރިސޯޓެއް ތަރައްގީކުރަން 2.8 މިލިއަން ޑޮލަރަށް 2016 ވަނަ އަހަރު ކުއްޔަށް ދޭން ނިންމިއެވެ. އެހެންނަމަވެސް އެ ރަށް ޓޫރިޒަމަށް ނުނަގައި ތުރާކުނު ރައްޔިތުން އެދުނު ގޮތަށް އެ ރަށުގެ އިހުތިސޯސުގައި ހިމެނުމަށް ކުރީގެ ރައީސް އިބްރާހިމް މުޙައްމަދު ޞާލިހުގެ ސަރުކާރުން ނިންމާފައިވެއެވެ.
ރަށްރަށުގެ ކައުންސިލުތައް އެދޭގޮތަށް ކައިރީގައި ހުންނަ ފަޅު ރަށްތައް ދޫކުރަމުން ގެންދާނެ ކަމަށް ރައީސް ވިދާޅުވެފައިވާއިރު، މިފަހުން އދ. މަހިބަދޫގެ ދެކުނުގައި އޮންނަ މާފަރުފަޅަކީ އެ ރަށުގެ ބައެއް ކަމުގައި ވަނީ ކަނޑައަޅުއްވާފައެވެ.
