ބޭންކް އޮފް މޯލްޑިވްސް (ބީއެމްއެލް) ގައި އެކަށީގެންވާ ވަރަށް ޑޮލަރު ނެތް ކަމަށް އާންމުންގެ މެދުގައި އުފެދިފައިވާ ތަސައްވުރަކީ ކުށް ހީއެއް ކަމަށް އެ ބޭންކުގެ ސީއީއޯ މުޙައްމަދު ޝަރީފް ވިދާޅުވެއްޖެއެވެ.
”މިހާރު“ ނޫހަށް ދެއްވި އިންޓަރވިއުއެއްގައި ބީއެމްއެލްގެ ސީއީއޯ މުޙައްމަދު ޝަރީފް ވިދާޅުވީ، އެ ބޭންކުގެ މާލީ ހާލަތު އޮތީ ވަރަށް ރަނގަޅަށް ކަމަށާއި ރާއްޖޭގެ އެހެން ހުރިހާ ބޭންކުތަކެއް އެއްކޮށްލުމުން ޖެހޭ މިންވަރަށް ވުރެ އިތުރަށް ބީއެމްއެލްގައި ބޭރު ފައިސާގެ ޑިޕޮސިޓް އެބަހުރި ކަމަށެވެ.
ބޭންކަށް ލިބޭ ޑިޕޮސިޓްތައް ބޭނުންކުރާ ގޮތް ތަފްސީލުކޮށްދެއްވަމުން ޝަރީފް ވިދާޅުވީ، ޑިޕޮސިޓްގެ 70 އިންސައްތަ ބޭނުންކުރަނީ ލޯނު ދޫކުރުމަށް ކަމަށެވެ. އަދި ބާކީ 30 އިންސައްތަ ބަހައްޓަނީ ނަގުދު ފައިސާ އާއި ރިޒާވްގެ އިތުރުން، ފަސޭހައިން ފައިސާއަށް ބަދަލުކުރެވޭ އެހެނިހެން އެސެޓްތަކުގެ ގޮތުގައި ކަމަށް އޭނާ ވަނީ ވިދާޅުވެފައެވެ.
ބީއެމްއެލްއަކީ ބޭރުގެ ދިގު މުއްދަތުގެ ދަރަންޏަށް ބަރޯސާވާ ތަނެއް ނޫންކަން ފާހަގަކުރައްވަމުން ޝަރީފް ވިދާޅުވީ، ކުރު މުއްދަތުގެ ކުދިކުދި ފެސިލިޓީތަކެއް ފިޔަވައި، ބޭންކުގެ ހުރިހާ މަސައްކަތްތަކެއް މައިގަނޑު ގޮތެއްގައި ކުރިއަށް ގެންދަނީ ކަސްޓަމަރުންގެ ޑިޕޮސިޓްތަކުގެ އެހީގައި ކަމަށެވެ. މިކަން ބޭންކުން އާންމުކުރާ ކުއާޓަލީ އަދި އަހަރީ ރިޕޯޓުތަކުން ފެންނަން ހުންނާނެ ކަމަށް އޭނާ ވިދާޅުވިއެވެ.
މީގެ އިތުރުން، ކަސްޓަމަރުން ބޭންކުގައި ބަހައްޓާ ޑޮލަރު ޑިޕޮސިޓަކީ ބޭންކުން އެ ކަސްޓަމަރުންނަށް އަނބުރާ ދައްކަންޖެހޭ އެއްޗެއް ކަމަށާއި އެއީ ޑިޕޮސިޓް ކުރި ފަރާތްތަކުގެ މިލްކެއް ކަމަށް ޝަރީފް ވަނީ ވިދާޅުވެފައެވެ. އެހެންކަމުން، ދިވެހި ރުފިޔާ އެކައުންޓްތަކުން ކުރާ ބޭރުގެ މުއާމަލާތްތަކަށް ފައިސާ ދެއްކުމަށް އެ ޑިޕޮސިޓްތައް ނުވަތަ ބޭރުން ނަގާ ދަރަނި ބޭނުންކުރުމަކީ ބޭންކަށް ކުރެވޭނެ ކަމެއް ނޫންކަން އޭނާ ހަނދާންކޮށްދެއްވިއެވެ.
”އޭގެ ބަދަލުގައި، އެ ޑިޕޮސިޓްތައް އިންވެސްޓް ކުރަނީ ޑޮލަރުން އަނބުރާ ދައްކަންޖެހޭ ލޯނުތަކަށާއި އެހެނިހެން އިންވެސްޓްމަންޓްތަކަށް. ކޮންމެ ވިޔަފާރި ބޭންކަކުން ވެސް އަމަލުކުރާ އުސޫލުން، އަޅުގަނޑުމެން ވެސް މަސައްކަތްކުރަނީ ކަސްޓަމަރުންގެ ޑިޕޮސިޓްތަކުގެ ރައްކާތެރިކަން ކަށަވަރުކުރެވޭނެ ފަދަ ގޮތަކަށް ބޭންކުގެ އެސެޓްތައް މެނޭޖުކުރުމަށް،“ – ސީއީއޯ ޝަރީފް ވިދާޅުވިއެވެ.
މީގެ އިތުރުން، ބޭންކުގައި ހުރި ކަސްޓަމަރުންގެ ޑިޕޮސިޓްތަކުގެ ރައްކާތެރިކަން ކަށަވަރުކުރެވޭނެ ފަދަ ހަރުދަނާ އުސޫލެއްގެ މަތިން ބޭންކުގެ އެސެޓްތައް ބެލެހެއްޓުމަށް އަބަދުވެސް މަސައްކަތް ކުރައްވާނެ ކަމުގެ ޔަގީންކަން ޝަރީފް ވަނީ ދެއްވާފައެވެ.
