މާލޭގެ ވަށައިގެން އޮންނަ، ބޮޑުތަކުރުފާނު މަގުގެ ތާރުގަނޑު ހަލާކުވެ ހެދިފައިވާ ވަޅުގަނޑުތަކުގައި ގާއަތުރާލައި، ވަށައިގެން ސިމެންތި ޖަހާލުމުން އެ މަގުގެ މަރާމާތުގެ މަސައްކަތް ނިމުނީ ކަމަށް މާލެ ސިޓީ ކައުންސިލްގެ މައްޗަންގޯޅި އުތުރު ދާއިރާގެ ކައުންސިލަރު ޚަދީޖާ މުޙައްމަދު ބުނުމުން އާންމުންގެ ބޮޑެތި ފާޑުކިޔުންތަކެއް އަމާޒުވެއްޖެއެވެ.
ބޮޑުތަކުރުފާނު މަގަކީ ކޮންމެ ދުވަހަކު އެތައް ހާސް އުޅަނދެއް ދުއްވާ އަދި ގިނަ އަދަދެއްގެ ބަޔަކު ހިނގާބިނގާވެ އުޅޭ މާލޭގެ މައި މަގެވެ. ނަމަވެސް، މާލެ ސިޓީ ކައުންސިލުން މި މަގު ބެލެހެއްޓުމުގައި އިހުމާލުވަމުންދާތީ މަގުގެ އެކި ސަރަހައްދުތަކުގައި ބޮޑެތި ވަޅުގަނޑުތައް ހެދި، ދުއްވާ އެއްޗެއްސަށާއި ހިނގާ މީހުންނަށް ވަނީ ބޮޑެތި ނުރައްކާތަކާ ކުރިމަތިލާން ޖެހިފައެވެ.
Done https://t.co/9y6J1QkSaL pic.twitter.com/kBtEoWm5N1
— khadeeja Mohamed (@HajjaUaan) July 4, 2026
މި މައްސަލަ ބޮޑުވެ، އާންމު ރައްޔިތަކު މީސް މީޑިއާގައި ހިއްސާކުރި ފޮޓޯއަކާ ގުޅިގެން ކައުންސިލަރު ޚަދީޖާ ބުނެފައިވަނީ، އެ ވަޅުގަނޑުގައި ގާއަތުރާލައި ވަށައިގެން ސިމެންތި ޖަހާލުމުން މިހާރު އެ މަގުގެ މަރާމާތުގެ މަސައްކަތް ނިމިފައިވާ ކަމަށެވެ. ޚަދީޖާގެ މި ވާހަކަތަކާ ގުޅިގެން ގިނަ ބަޔަކު އަންނަނީ އޭނާގެ މި ވާހަކަތަކަކީ ރައްޔިތުންނަށް ކޮށްފައިވާ މަލާމާތެއްގެ ގޮތުގައި ސިފަކުރަމުންނެވެ.
މީގެ މަދު އަހަރުތަކެއް ކުރިން މިހާރުގެ ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު މާލެ ސިޓީގެ މޭޔަރަކަށް ހުންނެވި ދުވަސްވަރު، ބޮޑުތަކުރުފާނު މަގުގެ ތާރުގަނޑަށް ލިބޭ ގެއްލުންތައް މަރާމާތު ކުރައްވަމުން ގެންދެވީ ފެންވަރު ރަނގަޅުކޮށް އަލުން ތާރު އަޅައިގެންނެވެ. ނަމަވެސް، މިހާރުގެ މޭޔަރު އާދަމް އާޒިމްގެ މޭޔަރުކަމުގައި މާލޭގެ މަގުތައް ބެލެހެއްޓުމުގެ އެއްވެސް ގާބިލުކަމެއް ނެތްކަން މިފަދަ ކަންކަމުން ހާމަވަމުންދާ ކަމަށް ގިނަ ބަޔަކު އަންނަނީ ބުނަމުންނެވެ.
މީގެ އިތުރުން، މާލެ ސިޓީ ކައުންސިލަށް އަލަށް އިންތިހާބުވި އެމްޑީޕީގެ ކައުންސިލަރުންގެ ފަރާތުން ރައްޔިތުންނަށް ބޭނުންވާ ހިދުމަތްތައް ފޯރުކޮށްދިނުމުގައި ވަރަށް ބޮޑަށް އިހުމާލުވުމުގެ އިތުރުން، ކައުންސިލަރުންގެ ނާގާބިލުކަމުގެ ސަބަބުން މާލޭގެ ހާލަތު ދުވަހުން ދުވަހަށް ގޯސްވަމުންދާކަމުގެ ޝަކުވާތައް ވަނީ އިތުރުވެފައެވެ. ތާރު މަގެއްގައި ގާއަތުރާލައި ސިމެންތި ޖަހާލުމުން އެއީ މަރާމާތުކުރުން ކަމަށް ބުނުމަކީ ކައުންސިލްގެ ނާގާބިލުކަން އިންތިހާއަށް ގޮސްފައިވާ މިންވަރު ހާމަކޮށްދޭ ކަމެއް ކަމަށް ގިނަ ބަޔަކު ބުނެއެވެ.
