މި ފެށޭ ޖޫން މަހުގެ 14 ވަނަ ދުވަހު ފަށާ ޔޫރޯ ފުޓްބޯޅަ މުބާރާތުގެ ހުރިހާ މެޗުތަކެއް ޕީއެސްއެމްއިން ވަގުތުން ދައްކާނެ ކަމަށް ޕީއެސްއެމްގެ މެނޭޖިން ޑިރެކްޓަރ ޒީނާ ޒާހިރު ވިދާޅުވެއްޖެއެވެ.
އެ ކުންފުނިން ބޭއްވި މީޑިއާ ބްރީފިންއެއްގައި މެނޭޖިން ޑިރެކްޓަރު ޒީނާ ޒާހިރު ވިދާޅުވީ، ޔޫރޯ ފުޓުބޯޅަ މުބާރާތް ދެއްކުމުގެ ހުއްދަ ލިބިފައިވާ ހަމައެކަނި ދިވެހި ކުންފުންޏަކީ ޕީއެސްއެމް ކަމަށެވެ.
ޔޫރޯ ދެއްކުމަށް ރައިޓްސް އޮތް ހަމައެކަނި ދިވެހި ފަރާތަކީ ޕީއެސްއެމް. ޕީއެސްއެމްގެ ޓީވީއެމް އަދި ޔޭސްޓީވީން ގެނެސްދޭނަން އިރާދަ ކުރެއްވިއްޔާ،
– ޒީނާ ވިދާޅުވިއެވެ.
ޒީނާ ވިދާޅުވީ ޓީވީއެމް އަދި ޔޭސް ޓީވީން ހުރިހާ މެޗުތަކެއް ވަގުތުން އަލްޓްރާ އެޗްޑީކޮށް ދައްކާނެ ކަމަށާއި މެޗުތައް ބެލުމަށް ބެލުންތެރިން އިތުރު އަގެއް ދައްކަން ނުޖެހޭނެ ކަމަށެވެ.
މީގެ އިތުރުން ޒީނާ ވިދާޅުވީ 2021 ވަނަ އަހަރު ބޭއްވި ”ޔޫރޯ 2020“ މެޗުތައް ޕީއެސްއެމުން ނުދެއްކުމުން އާންމުންގެ ކަންބޮޑުވުން ފާޅުކޮށްފައިވާ ކަމަށެވެ. އެ ފަހަރު މެޗުތައް ނުދެއްކުނީ މި ސަރަހައްދަށް ޔޫރޯ ފުޓްބޯޅަ މުބާރާތް ދައްކާ ސޮނީ ކުންފުންޏަށް ދައްކަން ޖެހިފައި ހުރި ދަރަނިތައް ނުދައްކާ ހުރުމުން ކަމަށް ޒީނާ ވިދާޅުވިއެވެ.
މި އަހަރުގެ ޔޫރޯގެ ބްރޯޑްކާސްޓިން ރައިޓްސް ޕީއެސްއެމުން ހޯދީ އެ ދަރަނި ދެއްކުމުގެ ޕްލޭނެއް ހެދުމަށް ފަހު ކަމަށް ޒީނާ ވިދާޅުވިއެވެ.
