މި ސަރުކާރުން އައްޔަނުކޮށްފައިވާ ސިޔާސީ މުވައްޒަފުންގެ އަދަދާއި، އެ މުވައްޒަފުންގެ މުސާރައަށް ހިނގާ ހަރަދުތަކުގެ ތަފްސީލު ކުރިއަށް އޮތް 14 ދުވަހުގެ ތެރޭގައި ހާމަކުރުމަށް އިންފޮމޭޝަން ކޮމިޝަނަރުގެ އޮފީހުން (އައިކޮމް) މިއަދު ރައީސުލްޖުމްހޫރިއްޔާގެ އޮފީހަށް އަމުރުކޮށްފިއެވެ.
އައިކޮމްއިން މިފަދަ އަމުރެއް ނެރެފައިމިވަނީ މައުލޫމާތު ހޯދައި ލިބިގަތުމުގެ ހައްގުގެ ގާނޫނުގެ ދަށުން ”އަދަދު“ ނޫހުން ހުށަހެޅި މައްސަލައަކާ ގުޅިގެންނެވެ.
އެގޮތުން ”އަދަދު“ ނޫހުން އެދިފައިވަނީ 2023 ވަނަ އަހަރުން ފެށިގެން މި އަހަރުގެ މިހާތަނަށް އައްޔަނުކޮށްފައިވާ ސިޔާސީ މުވައްޒަފުންގެ އަދަދާއި، މަގާމުން ވަކިވި ނުވަތަ އިސްތިއުފާ ދެއްވި ފަރާތްތަކުގެ ތަފްސީލުގެ އިތުރުން، އެ މުވައްޒަފުންނަށް މުސާރައިގެ ގޮތުގައި ދައުލަތުން ހޭދަކުރާ މިންވަރުގެ މައުލޫމާތު ހޯދުމަށެވެ.
އިންފޮމޭޝަން ކޮމިޝަނަރު އަޙްމަދު އާހިދު ރަޝީދު ވިދާޅުވީ، އެދިފައިވާ މައުލޫމާތު ހާމަނުކޮށް ހިފެހެއްޓޭނެ ގާނޫނީ އެއްވެސް އަސާސެއް ރައީސް އޮފީހަށް ދެއްކިފައި ނުވާތީ، އެ މައުލޫމާތުތައް ފޯރުކޮށްދިނުމަށް އަމުރުކުރާ ކަމަށެވެ. އަދި ކަނޑައެޅިފައިވާ މުއްދަތުގެ ތެރޭގައި އެ މައުލޫމާތުތައް ހާމަނުކޮށްފިނަމަ، އެ މައްސަލަ ޕްރޮސިކިއުޓަރ ޖެނެރަލްގެ އޮފީހަށް ހުށަހަޅާނެކަމުގެ އިންޒާރުވެސް އިންފޮމޭޝަން ކޮމިޝަނަރު ވަނީ ދެއްވާފައެވެ.
މީގެ ކުރިން މާރިޗު މަހުގެ އަށް ވަނަ ދުވަހުވެސް މި މައުލޫމާތުތައް ހާމަކުރުމަށް ރައީސް އޮފީހަށް 10 ދުވަހުގެ މުއްދަތެއް ދީފައިވީ ނަމަވެސް، އެ މުއްދަތުގެ ތެރޭގައި މައުލޫމާތު ހާމަކުރުމުގެ ބަދަލުގައި ރައީސް އޮފީހުން ބުނެފައިވަނީ، ސިޔާސީ މުވައްޒަފުންގެ މަސައްކަތުގެ ފެންވަރު ބެލުމުގެ އިވެލުއޭޝަނެއް ކުރިއަށްދާ ކަމަށާއި، މައުލޫމާތު ހާމަކުރެވޭނީ އެ މަސައްކަތް ނިމުމުން ކަމަށެވެ.
