ނޭޝަނަލް ކާޑިއެކް ސެންޓަރުގެ ސަބަބުން އިންދިރާ ގާންދީ މެމޯރިއަލް ހޮސްޕިޓަލް (އައިޖީއެމްއެޗް) އަށް ރައްޔިތުން ކުރާ އިތުބާރު ބޮޑުވެފައިވާ ކަމަށް މާލެ ސިޓީ ގްރޫޕް އޮފް ހޮސްޕިޓަލްސްގެ ސީއީއޯ، އިބްރާހީމް ޢަބްދުއްރައްޒާޤު ޙަލީމް މިއަދު ވިދާޅުވެއްޖެއެވެ.
ނޭޝަނަލް ކާޑިއެކް ސެންޓަރަށް 10 އަހަރު ފުރުމުގެ މުނާސަބަތުގައި ދަރުމަވަންތަ ހޮސްޕިޓަލުގައި މިއަދު ބޭއްވި ރަސްމިއްޔާތުގައި ވާހަކަދައްކަވަމުން ޢަބްދުއްރައްޒާޤު ވިދާޅުވީ، އެ ސެންޓަރުގެ ހިދުމަތް ފެށި ދުވަހުން ފެށިގެން އެތަނަކީ މާލެ ސިޓީ ގްރޫޕުގެ ދަށުން ހިންގާ އެންމެ ކާމިޔާބު ސެންޓަރު ކަމަށެވެ.
ކާޑިއެކް ސެންޓަރާއެކު ރާއްޖޭގައި ކާޑިއޯ ވަސްކިއުލަރ ހިދުމަތްތަކުގެ ފެންވަރު ރަނގަޅުކުރެވިފައިވާކަން ފާހަގަކުރައްވަމުން ޢަބްދުއްރައްޒާޤު ވިދާޅުވީ މިކަމުގެ ސަބަބުން ރާއްޖޭގައި ތިބެގެން ހިތުގެ ބަލިތަކަށް ފަރުވާ ހޯދުމުގެ ފުރުސަތު ފަހިވެ، ބަލިމީހުންނަށް ބޮޑެތި ލުއިފަސޭހަތަކެއް ލިބިފައިވާ ކަމަށެވެ. ހަމައެހެންމެ، ހިތުގެ ބަލިތަކަށް ފަރުވާ ހޯދާ ފަރާތްތަކުން ރާއްޖެއިން ބޭރުން ފަރުވާ ހޯދަން ދާންޖެހޭ ނިސްބަތް ދަށްކުރެވިފައިވާ ކަމަށްވެސް އޭނާ ވަނީ ވިދާޅުވެފައެވެ.
މި ހިދުމަތް ފުޅާކުރުމަށް ކުރަމުން އަންނަ މަސައްކަތްތަކުގެ ދަށުން، އައްޑޫ ސިޓީގައި މިދިޔަ ފެބްރުއަރީ މަހު ފެށި ކެތްލެބުގެ ހިދުމަތުގެ މައްޗަށް ޢަބްދުއްރައްޒާޤު އަލިއަޅުއްވާލެއްވިއެވެ. އެގޮތުން އައްޑޫ އެކުއެޓޯރިއަލް ހޮސްޕިޓަލުގައި މިހާތަނަށް 38 އެންޖިއޯގްރާމް، 20 އެންޖިއޯ ޕްލާސްޓީ، ކެރޮޓެޑް އާޓަރީގެ އެއް އެންޖިއޯގްރަފީ، އެއް ޕޭސް މޭކަރ އަދި އެއް އޭއައިސީޑީ އިމްޕްލާންޓް ކާމިޔާބުކަމާއެކު ހަދާފައިވާކަން އޭނާ ވަނީ ހާމަކުރައްވާފައެވެ.
މީގެ އިތުރުން، ކުޅުދުއްފުށި ސިޓީ ހޮސްޕިޓަލުގައި ވެސް ކެތްލެބުގެ ހިދުމަތް ފެށުމާ ގުޅޭ މަޝްވަރާތައް ފަށާފައިވާ ކަމަށްވެސް ޢަބްދުއްރައްޒާޤް ވިދާޅުވިއެވެ.
