ހއ. ބާރަށުގައި ހުރި އާސާރީ ތަންތަން މިހާރަށްވުރެ ބޮޑަށް ހިމާޔަތްކޮށް ރައްކާތެރިކުރުމަށް އިތުރު މަސައްކަތްތަކެއް ކުރުމަށް ނިންމާފައިވާ ކަމަށް ހެރިޓޭޖް މިނިސްޓަރު ހީނާ ވަލީދު ވިދާޅުވެއްޖެއެވެ.
މިނިސްޓަރު ހީނާ މި މޭރުމުން ވިދާޅުވީ، ހއ. އުތީމާއި، ތަކަންދޫ އަދި ބާރަށުގައި ހުރި އާސާރީ ތަންތަން ހިމާޔަތްކުރުމަށް ކުރަމުންދާ މަސައްކަތްތައް ބައްލަވައިލެއްވުމަށާއި، ކުރިއަށް އޮތް ގައުމީ ދުވަހުގެ ތައްޔާރީތައް އޮޅުންފިލުއްވުމަށް އެ ރަށްރަށަށް މިހާރު ކުރައްވަމުން ގެންދަވާ ދަތުރުގެ ތެރެއިން ބާރަށަށް ވަޑައިގެން އެރަށުގެ ތާރީހީ ބިނާތައް ބައްލަވާލެއްވުމަށްފަހުގައެވެ.
މި ދަތުރުގެ ތެރެއިން ބާރަށު ކައުންސިލާ ބައްދަލުކުރައްވައި، ރަށުގެ ތަރިކަ ހިމާޔަތްކުރުމަށް ކުރިއަށްދާ މަޝްރޫއުތަކުގެ އެންމެފަހުގެ މައުލޫމާތާއި މަސައްކަތްތައް ތަރުތީބުވެފައިވާ ގޮތް މިނިސްޓަރު ވަނީ އޮޅުންފިލުއްވާފައެވެ. އަދި މިކަމުގައި ކައުންސިލާއި ރަށުގެ ރައްޔިތުންގެ ބޭނުންވާ ގޮތްތައްވެސް މިނިސްޓަރު އޮޅުންފިއްލުވާފައިވެއެވެ.
މިހާރު ހިނގަމުންދާ މަޝްރޫއުތަކުގެ އިތުރުންވެސް، ބާރަށުގައި ހުރި ޒަމާންވީ އެހެނިހެން އާސާރީ ތަންތަން ރައްކާތެރިކަމާއެކު ބެލެހެއްޓުމަކީ މުހިންމު ކަމެއްގެ ގޮތުގައި ސިފަކުރައްވަމުން މިނިސްޓަރު ވިދާޅުވީ، އެ ތަންތަން ދެމެހެއްޓެނިވި ގޮތެއްގައި ބެލެހެއްޓޭނެ ނިޒާމެއް ގާއިމުކުރުމަށްޓަކައި ކައުންސިލްގެ ތަސައްވުރާއި ރައްޔިތުންގެ ހިޔާލު މިހާރު ހޯއްދަވާފައިވާނެ ކަމަށެވެ.
”މިރަށުގައި އެބަހުރި މި މިސްކިތް ކަހަލަ ވަރަށް ބައިވަރު ތަންތަން މިގޮތައް ބަލަހައްޓަންޖެހޭ. އާސާރުގެ ގޮތުގައި އެހެންވީމަ ކުރިއަށް އޮތްތަނުގައި މިނިސްޓްރީއާއި ކައުންސިލާ ގުޅިގެން މި ތަންތަން އިތުރަށް ބަލައްޓައި ރައްކާތެރިކުރުމުގެ މަސައްކަތްތައް ކައުންސިލާ މަޝްވަރާކޮށް އެކަން ގެންދެވެނޭ ގޮތަކަށް މަސައްކަތްތައް ކުރިއަށްގެންދާނަން،“ – މިނިސްޓަރު ހީނާ ވިދާޅުވިއެވެ.
ބާރަށުގައި މިހާރު ކުރިއަށްދާ ތަރިކައާ ގުޅުންހުރި މަޝްރޫއުތަކުގެ ތެރޭގައި، ކަމަނާމަގު ސާފުކޮށް ތަރައްގީކުރުމާއި، ކަޅުއޮށްފުންމި ބަނދެފައިވާ ސަރަހައްދު އަދި ވާރުގެ ތަރައްގީކުރުމުގެ މަސައްކަތް ހިމެނެއެވެ. މިނިސްޓަރު ވިދާޅުވީ މި އަހަރުގެ ގައުމީ ދުވަހުގެ ކުރިން ނިންމުމަކީ އަމާޒެއް ކަމަށާއި މަސައްކަތްތައް ހަލުވި ދުވެލީގައި ކުރިއަށްދާ ކަމަށެވެ.
މިނިސްޓަރު ހީނާ ވަނީ މި ދަތުރުގައި އެ ރަށްރަށުގެ އާސާރީ ބިނާތަކަށް ޒިޔާރަތް ކުރައްވާ އެތަންތަން ބައްލަވާލައްވާފައެވެ.
