ނިމިދިޔަ 2025 ވަނަ އަހަރު ރިސޯޓުތަކުގެ ކުލީގެ މުއްދަތު އިތުރުކުރުމާއި، ބިން ވިއްކުމާއި ބިން ބަދަލުކުރުމުގެ ފީގެ ގޮތުގައި ދައުލަތަށް 120 މިލިއަން ޑޮލަރު (1.8 ބިލިއަން ރުފިޔާ) ލިބިފައިވާކަން ފިނޭންސް މިނިސްޓްރީގެ ތަފާސްހިސާބުތަކުން ހާމަވެއްޖެއެވެ.
ފިނޭންސް މިނިސްޓްރީން ނެރުނު ބަޖެޓް ނަތީޖާ ރިޕޯޓުގައިވާ ގޮތުން، ރިސޯޓު ކުލީގެ މުއްދަތު އިތުރުކުރުމަށް ހުޅުވާލި ފުރުސަތުގައި 18 ފަރާތަކުން ވަނީ އެކަމާ ގުޅޭ ފީ ދައްކާފައެވެ. މީގެ އިތުރުން، ރިސޯޓުތައް ތަރައްގީކުރުމަށް ބިން ވިއްކުމާއި ބަދަލުކުރުމުގެ ފީގެ ގޮތުގައި 15 ފަރާތަކުން 196 މިލިއަން ރުފިޔާ ދައުލަތަށް ދައްކާފައިވެއެވެ.
ޓޫރިޒަމް ގާނޫނަށް ކުރިން އަމަލުކުރަމުން އައި ގޮތުން، ރިސޯޓުތަކުގެ މުއްދަތު އިތުރުކުރާ ކޮންމެ އަހަރަކަށް އެއް ލައްކަ ޑޮލަރުގެ ރޭޓުން ފީ ދައްކަންޖެހެއެވެ. މި ފައިސާ ހަ މަސްދުވަހުގެ ތެރޭގައި ދައްކާ ނިންމަންޖެހޭއިރު، އެއަށްވުރެ ދިގު މުއްދަތަކަށް ބަހާލައިގެން ފައިސާ ދައްކާނަމަ، ކޮންމެ އަހަރަކަށް ދައްކަންޖެހޭ ފީ ދެ ލައްކަ ޑޮލަރަށް އިތުރުވެއެވެ.
ނަމަވެސް، ޓޫރިޒަމާ ބެހޭ ގާނޫނަށް މިދިޔަ އަހަރު ގެނައި އިސްލާހާއެކު، ކަނޑައެޅިފައިވާ ވަކި މުއްދަތެއްގެ ތެރޭގައި ފައިސާ ދައްކާ ފަރާތްތަކަށް ވަނީ ބޮޑެތި ލުއިތަކެއް ދީފައެވެ. މި އިސްލާހުގެ ދަށުން، ގާނޫނަށް އަމަލުކުރަން ފަށާތާ ހަ މަސްދުވަހުގެ ތެރޭގައި ފައިސާ ދައްކާނަމަ، 50 އަހަރަށް ދޫކޮށްފައިވާ ރަށެއް ނުވަތަ ފަޅެއްގެ މުއްދަތު އިތުރު 49 އަހަރަށް އިތުރުކުރުމަށް ދައްކަންޖެހެނީ ފަސް މިލިއަން ޑޮލަރެވެ. އަދި 20 އަހަރުގެ މުއްދަތެއް އިތުރުކުރަން ބޭނުންވާނަމަ ދައްކަންޖެހެނީ 2.5 މިލިއަން ޑޮލަރެވެ.
މީގެ އިތުރުން، 25 އަހަރަށް މުއްދަތު އިތުރުކުރަން ބޭނުންވާ ނަމަ، ތިން މިލިއަން ޑޮލަރު އެއްފަހަރާ ދައްކަންޖެހެއެވެ. އަދި ގާނޫނަށް ގެނައި އިސްލާހަށް އަމަލުކުރަން ފަށާ ފުރަތަމަ ހަ މަސްދުވަސް ފާއިތުވުމަށްފަހު، 49 އަހަރަށް މުއްދަތު އިތުރުކުރާނަމަ، ފީގެ ގޮތުގައި އެއްފަހަރާ 10 މިލިއަން ޑޮލަރު ދައްކަންޖެހޭނެ ކަމަށްވެސް އެ ގާނޫނުގައި ކަނޑައަޅާފައިވެއެވެ.
ޓޫރިޒަމް މިނިސްޓްރީގެ އެންމެފަހުގެ ތަފާސްހިސާބުތައް ދައްކާގޮތުން، ރާއްޖޭގައި މިހާރު ހިންގަމުންދާ ރިސޯޓުތަކުގެ ޖުމްލަ އަދަދު ވަނީ 179 އަށް އަރާފައެވެ. މިއާއެކު، ރިސޯޓުތަކުގައި ފަތުރުވެރިންނަށް ހިދުމަތް ދިނުމަށް ތައްޔާރުކޮށްފައިވާ އެނދުގެ ޖުމްލަ އަދަދު މިހާރު ވަނީ 44,977 އަށް އިތުރުވެފައެވެ.
