ލުބުނާނުގެ ސަރުކާރުގެ ހެލްތު މިނިސްޓްރީން އެންމެ ފަހުން ނެރުނު ރަސްމީ ތަފާސްހިސާބުތައް ދައްކާގޮތުން، މިދިޔަ މާރިޗު މަހުގެ 2 ވަނަ ދުވަހުން ފެށިގެން އިޒްރޭލުން އެ ޤައުމަށް ދެމުންދާ ލޭއޮހޮރުވުން ބޮޑު ޙަމަލާތަކުގައި މަރުވި މީހުންގެ ޖުމްލަ ޢަދަދު 4،301 އަށް އަރައިފިއެވެ. މީގެ އިތުރުން 12،199 އަށްވުރެ ގިނަ މީހުން ވަނީ އެކިވަރުގެ ޒަޚަމްތަކާއެކު ހޮސްޕިޓަލްތަކުގައި ރެޖިސްޓްރީކުރެވިފައެވެ.
ޞިއްޙީ ނިޒާމަށް ދެމުންދާ ޙަމަލާތަކާއި ހަނގުރާމައިގެ ޙަޤީޤަތް
– ޞިއްޙީ ޚިދުމަތްތެރިން ޝަހީދުކުރުން: ލުބުނާނުގެ ނޭޝަނަލް ނިއުސް އެޖެންސީން ރިޕޯޓުކުރާ ގޮތުގައި، އެމްބިއުލަންސްތަކަށާއި މެޑިކަލް ޓީމުތަކަށް އިޒްރޭލުން ދީފައިވާ 176 ޙަމަލާއެއްގައި 135 ޞިއްޙީ ޚިދުމަތްތެރިޔަކު ވަނީ ޝަހީދުކޮށްލާފައެވެ. އަދި 406 މީހަކު ވަނީ ޒަޚަމްވެފައެވެ. ފްރަންޓްލައިންގެ މެޑިކަލް ނެޓްވޯކްތައް ހަލާކުކޮށްލުމަކީ ޒަޚަމްވާ އާންމުން ސަލާމަތްކުރުމަށް އޮތް އެންމެ ބޮޑު ހުރަހެވެ.
– އަސްކަރީ ބަފަރ ޒޯން: ބައިނަލްއަޤްވާމީ ގޮތުން މަޝްވަރާތަކެއް ދެކެވުނު ނަމަވެސް، އިޒްރޭލުން ދަނީ ލުބުނާނުގެ ދެކުނު ބޯޑަރުން އެތެރެއަށް 10 ކިލޯމީޓަރުގެ ފުންމިނުގައި، ޖުމްލަ 600 އަކަކިލޯމީޓަރުގެ ބޮޑު ބިމެއް އަސްކަރީ ގޮތުން ހިފައިގެންނެވެ. އެ ސަރަޙައްދުގައި ހުރި ގެދޮރުތައް ގޮއްވައި ބިމާހަމަކުރަމުންދާއިރު، ޚާއްޞަކޮށް ބިންތު ޖުބައިލް އަދި ނަބަޠިއްޔާގެ އަވަށްތަކަށް ދަނީ ކޮންމެ ދުވަހަކު ޑްރޯން ޙަމަލާތައް ދެމުންނެވެ.
– އެމެރިކާގެ ޙިމާޔަތް: ޣައްޒާގެ %90 ބިމާހަމަކޮށްލި ފަދައިން، ލުބުނާނުގައި ހިންގާ މި ހަނގުރާމައިގެ ފަހަތުގައިވެސް އޮތީ އެމެރިކާގެ ފުރިހަމަ އެހީތެރިކަމާއި ހަތިޔާރުގެ ސަޕްލައިއެވެ. އެމެރިކާއިން އދ. ގެ ސަލާމަތީ މަޖިލީހުގައި އިޒްރޭލާ ދެކޮޅަށް އަންނަ ދަތިކުރުމުގެ ފިޔަވަޅުތައް ވީޓޯ ކުރަމުން، ބިލިއަނުން ފަންޑު ދެމުންދާތީ ބައިނަލްއަޤްވާމީ އެއްވެސް ޤާނޫނަކަށް ބެލުމެއް ނެތި އާންމުން މެރުން މިވަނީ ހުއްޓުމެއް ނެތް ޖަރީމާއަކަށް ބަދަލުވެފައެވެ.
