ޑަލަސް، އެމެރިކާ: ވޯލްޑް ކަޕް 2026 ގެ ނޮކްއައުޓް މަރުހަލާގައި މިޞްރުން ހޯދި ތާރީޚީ ކާމިޔާބީ، އެޤައުމުގެ ކޯޗު ޙުސާމް ޙަސަން ފަލަސްޠީނުގެ ރައްޔިތުންނަށް ހަދިޔާކޮށްފިއެވެ. އެމެރިކާގެ ޑަލަސް ސްޓޭޑިއަމްގައި ހުކުރު ދުވަހު ކުޅުނު ފޯރިގަދަ މެޗުގައި އޮސްޓްރޭލިއާ ބަލިކޮށް، މިޞްރުން ވަނީ މުބާރާތުގެ ގަދަ 16 އަށް ދަތުރުކޮށްފައެވެ.
މެޗުގެ ފުރިހަމަ ވަގުތާއި އިތުރު ވަގުތު ކުޅެ ނިމުނުއިރު ދެޓީމު 1-1 އިން އެއްވަރުވުމުން، ނަތީޖާ ނެރުނީ ޕެނަލްޓީ ޖަހައިގެންނެވެ. މިޞްރުން މެޗު ކާމިޔާބުކުރީ 4-2 ގެ ޕެނަލްޓީ ނަތީޖާއަކުންނެވެ. މެޗުގެ 13 ވަނަ މިނެޓުގައި އިމާމް އަޝޫރު ޖެހި ލަނޑުން މިޞްރު ކުރި ހޯދާފައިވަނިކޮށް، ދެވަނަ ހާފުގައި މުޙައްމަދު ހާނީ އަތުން ބައިކޮޅަށް ވަން ލަނޑަކުން އޮސްޓްރޭލިއާއަށް ނަތީޖާ ހަމަހަމަވިއެވެ. މިޞްރަށް މޮޅުކޮށްދިން ފަހު ޕެނަލްޓީ ކާމިޔާބުކޮށްދިނީ ޙުސާމް ޢަބްދުލްމަޖީދުއެވެ.
މެޗަށްފަހު ނޫސްވެރިންނާ ވާހަކަދައްކަމުން ކޯޗު ޙުސާމް ޙަސަން ބުނީ، ”މާތްﷲ އެބައިމީހުންނަށް (ފަލަސްޠީނަށް) ނަޞްރު ދެއްވާށި، އަދި އެބައިމީހުންގެ ޝަހީދުންނަށް ރަޙުމަތް ލައްވާށި. އަހަރެން މި ކާމިޔާބީ ހަދިޔާކުރަނީ މިޞްރުގެ ރައްޔިތުންނާއި، އަދި ޚާއްޞަކޮށް ފަލަސްޠީނުގެ އެ ހިތްވަރުގަދަ ޝަރަފުވެރި ރައްޔިތުންނަށް،“ ކަމަށެވެ.
މެޗު ނިމުމާއެކު ކޯޗު ޙަސަން ވަނީ މިޞްރާއި ފަލަސްޠީނުގެ ދިދަ ހިފައިގެން ދަނޑުމަތީގައި އުފާފާޅުކޮށްފައެވެ. އަދި މުޅި ޓީމު އެކުގައި ދަނޑުމަތީގައި ޝުކުރުގެ ސަޖިދަ ކޮށްފައިވެއެވެ. މިއީ ވޯލްޑް ކަޕެއްގެ ނޮކްއައުޓް މަރުހަލާގައި މިޞްރުން ހޯދި ފުރަތަމަ މޮޅެވެ.
މި ކާމިޔާބީއާއެކު، އިސްރާއީލުން ބޮންއަޅައި ސުންނާފަތިކޮށްފައިވާ ޣައްޒާގެ އެކި ސަރަޙައްދުތަކުގައި ތިބި ފަލަސްޠީނުގެ ރައްޔިތުން ވަނީ ބޮޑު އުފާފާޅުކުރުމެއް ބާއްވާފައެވެ. ވީރާނާވެފައިވާ އިމާރާތްތަކާއި ފޭލިގެތަކުގެ ކައިރީގައި ބޮޑު ސްކްރީން ބަހައްޓައިގެން މެޗު ބަލަން ތިބި ޣައްޒާގެ ރައްޔިތުން، މިޞްރު މޮޅުވުމުން އުފަލުން ހަޅޭއްލަވައި ޝުކުރު އަދާކޮށްފައިވެއެވެ. ޣައްޒާގެ ގިނަ ކުޑަކުދިން ވަނީ އެކުދިންގެ މޫނުގައި މިޞްރުގެ ދިދަ ކުރަހައިގެން މި އުފަލުގައި ބައިވެރިވެފައެވެ.
أهل غزة أثناء متابعة المباراة من بين الركام. pic.twitter.com/kS4e389Ln1
— 𓂆 Eyad| إِيَادٌ (@ehajjarr) July 3, 2026
މެޗުގެ ކުރިން، މިޞްރުގެ ޓީމާއި ޑަލަސްގެ ފުލުހުންނާ ދެމެދު ކޮންމެވެސް ވަރެއްގެ ހަމަނުޖެހުމެއް ހިނގާފައިވެއެވެ. ޓީމު ތިބި ހޮޓަލުގައި ސަޕޯޓަރަކާއެކު ފޮޓޯއެއް ނަގަން އުޅުމުގެ ތެރޭގައި ފުލުހަކު ވަނީ ޓީމުގެ ޑައިރެކްޓަރ އިބްރާހިމް ޙަސަން އަދި ކުޅުންތެރިޔާ ޓްރެޒެގޭއަށް ހުރަސްއަޅައި ކޮށްޕާލާފައެވެ. ނަމަވެސް ޑަލަސް ފުލުހުން ފަހުން ބުނީ އެ މައްސަލަ އެވަގުތު ހައްލުކުރެވިފައިވާ ކަމަށެވެ.
މި ތާރީޚީ މޮޅާއެކު ގަދަ 16 ގައި މިޞްރު ބައްދަލުކުރަން ޖެހޭނީ އާޖެންޓީނާ ނުވަތަ ކޭޕްވާޑް އާއެވެ.
