ކްލަބް މޯލްޑިވްސް ކިޑްސަލް ޓޯނަމެންޓުގެ އެންމެ މޮޅު ކުޅުންތެރިޔާ އަދި އެންމެ ގިނަ ލަނޑު ޖެހި ކުޅުންތެރިޔާގެ ޝަރަފު އާދު ބިން މުހައްމަދު ނިޔާޒު (އާދު) 15އ ހޯދައިފިއެވެ.
މިއަދު ހަވީރު ކުޅުނު ރެހެންދި ޓާފުގައި ފައިނަލްގައި އާދުގެ ޓީމު އެލީޓް ސްޕޯޓްސް ކްލަބް، އެސްޕަޔާއާ އަތުން ބަލިވީ ފުރިހަމަ ވަގުތުގައި 2-2 އިން އެއްވަރުވުމުން ނަތީޖާ ނެރެން ޖެހި ޕެނެލްޓީންނެވެ.
މުބާރާތުގައި ރަނގަޅު ކުޅުމެއް ކުޅެފައިވާ އާދު ވަނީ ފައިނަލް މެޗުގައިވެސް ޖުމްލަ ދެ ގޯލު ޖަހައިފައެވެ.
އާދު ’އެކި ސްޕޯޓްސް‘ އަށް މިއަދު ބުނީ މުބާރާތުން ޗެމްޕިއަންކަން ނުލިބުނަސް ލިބުނު ކާމިޔާބީއާ މެދު ހިތްހަމަ ޖެހޭ ކަމަށާއި ދެން އަންނަ މުބާރާތަކަށް މިއަށް ވުރެ ރަނގަޅަށް ސީދާ ތަށްޓަށް ނުކުންނާނެ ކަމަށެވެ.
މީގެ ކުރިން އާދު ’އެކި އެމްވީ‘ އަށް ދިން އިންޓަވިއުއެއްގައި ބުނީ އާދު އެންމެ ބޭނުންވަނީ ޓީމަށް ތަށި ހޯދައިދީ، މުބާރާތުގެ އެންމެ މޮޅު ކުޅުންތެރިޔާގެ ޝަރަފު ހޯދުން ކަމަށެވެ. ތަށި ނުލިބުނު ކަމުގައި ވިޔަސް ހުނަރުވެރި އާދު މިވަނީ އެތައްބަޔަކު ފަޚުރުވެރިވާފަދަ މޮޅު ކުޅުމެއް ދައްކާ އެ ޝަރަފުވެސް ހޯދާފައެވެ. އާދުއަށް މުޅި މުބާރާތުގެ އެންމެ މޮޅު ކުޅުންތެރިޔާ (ޕްރިންސް އޮފް ދަ ޓޯނަމެންޓް) އާއި 17 ލަނޑާއެކު އެންމެ ގިނަ ލަނޑު ޖެހި ކުޅުންތެރިޔާކަން ލިބުނުއިރު މުބާރާތުގެ އެންމެ މޮޅު ފަސް ކުޅުންތެރިންގެ ތެރޭގައިވެސް އާދު ހިމެނެއެވެ.
ކްލަބް މޯލްޑިވްސް ކިޑްސަލް ޓޯނަމެންޓުގައި ޖުމްލަ ދިހަ ޓީމުން ބައިވެރިވިއެވެ. މިއީ މި މުބާރާތް ބޭއްވި ފުރަތަމަ ފަހަރެވެ.
