ރާއްޖޭގައި ހުރި އިޖުތިމާއީ ބޮޑެތި މައްސަލަތަކާއި ކުށްކުރުން ހުއްޓުވުމަށްޓަކައި، އެކަންކަން މެދުވެރިވާ އަސްލު ސަބަބުތައް ނުވަތަ ”ރޫޓް ކޯސް“ ތަކަށް އަމާޒުކޮށްގެން ސަރުކާރުން މަސައްކަތް ކުރަމުންދާ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މިހެން ވިދާޅުވީ މިއަދު ޝާއިޢުކުރެވުނު ”ދަ ޕަލްސް“ ޕޮޑްކާސްޓް ސިލްސިލާގެ ތިންވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ކުށްކުރުމާއި މަސްތުވާތަކެތީގެ ވަބާއިން ޒުވާނުން ސަލާމަތްކުރުމަށްޓަކައި، ހަމައެކަނި މަތިމަތިން ކަންކަން ކޮށްލުމުގެ ބަދަލުގައި މާނަހުރި ދާއިމީ ހައްލެއް ބޭނުންވާ ކަމަށެވެ. މިގޮތުން، ބޯހިޔާވަހިކަމުގެ މައްސަލަ ހައްލުކުރުމަކީ ސަރުކާރުން އެންމެ ބޮޑު އިސްކަމެއްދޭ އެއް ކަންތައް ކަމުގައި އެމަނިކުފާނު ފާހަގަކުރެއްވިއެވެ.
”ދެން މި މިހިރި އެއްކަމަކާ އަނެއްކަމަކާ ގުޅިލައިގެންދާނެ ސަރުކާރުން. ސަރުކާރުގެ ސިޔާސަތަކީ ރީޓ ކޮއުސް ތަކަށް ދިއުންކަމަށްވާތީ ހައުސިން މައްސަލަ ހައްލުކުރުމަކީ އެއިން ބޮޑުއެއްކަންތައް،“ ރައީސް ވިދާޅުވިއެވެ.
މީގެ އިތުރުން، އެކަށީގެންވާ ވަޒީފާގެ ފުރުސަތުތައް އިތުރުކުރުމާއި، ޒުވާނުންނަށް އަމިއްލަ ބާރުވެރިކަން ހޯދައިދިނުމަށްޓަކައި އާމްދަނީ ހޯދޭނެ އެކި މަގުތައް ފަހިކޮށްދިނުމަކީ ސަރުކާރުގެ މުހިންމު އަމާޒެއް ކަމަށް ރައީސް ވިދާޅުވިއެވެ. އެގޮތުން ކުދި ވިޔަފާރިތައް ފެށުމަށް އެހީތެރިވުމާއި، އަންހެން ބޭފުޅުންނަށް ގޭގައި ތިއްބަވައިގެން އާމްދަނީ ހޯދޭނެ ފުރުސަތުތައް ތަނަވަސްކޮށްދިނުން ހިމެނޭ ކަމަށް އެމަނިކުފާނު ފާހަގަކުރެއްވިއެވެ.
ރައީސް އިތުރަށް ވިދާޅުވީ، ދުޅަހެޔޮ ސިއްހީ ނިޒާމެއް ގާއިމްކުރުމާއި، ފެންވަރު ރަނގަޅު ތައުލީމީ ފުރުސަތުތައް ފޯރުކޮށްދިނުމަކީވެސް މި މައްސަލަތަކާ ގުޅިފައިވާ ކަންކަން ކަމަށެވެ. އަދި މި ހުރިހާ ދާއިރާތަކުން ހަރުދަނާ ބަދަލުތަކެއް ގެނެވިގެން މެނުވީ، ޒުވާނުން ކުށްކުރުމުގެ ތެރއަށް ވަނުން ހުއްޓުވައި، މުޖުތަމައުއަށް ހަގީގީ ބަދަލެއް ނުގެނޭނެ ކަމަށް ރައީސް ވިދާޅުވިއެވެ.
”ހަމަ ނަމެއްގަ މަތި މަތިން މީ ކަމެއް ކޮށްލައިގެން ދުވަހުކޮށް މިމައްސަލަ ހައްލެއް ނުވާނެ. ކުށްކުރުންވެސް މަސްތުވާތަކެތި ބޭނުންކުރުން އިތުރުކުރެވެގެން ދިއުންކަމުގަވެސް. އެހެންވީމަ ދާއިމީ ރަނގަޅު ހައްލެއް ރަނގަޅު ބަދަލެއް އަންނާނީ މިދެންނެވި ކަހަލަ ކަންކަން އެޑްރެސް ކުރެވިގެން،“ ރައީސް މުޢިއްޒު ވިދާޅުވިއެވެ.
ސަރުކާރުގެ އަމާޒަކީ މި ހުރިހާ ދާއިރާތަކަކުން އެއްފަހަރާ މަސައްކަތްކޮށް، ރައްޔިތުންގެ ދިރިއުޅުމުގެ ފެންވަރު މަތިކޮށް، އިޖުތިމާއީ ބަލިމަޑުކަމުން ގައުމު ސަލާމަތްކުރުން ކަމަށްވެސް އެމަނިކުފާނު ވިދާޅުވިއެވެ.
