ވ.ތިނަދޫ ކައުންސިލްގެ ރައީސް ޝުޖާޢު އަލީ، އިންތިޚާބުވި ސިޔާސީ ޕާޓީ ނޫން އެހެން ޕާޓީއަކަށް ސޮއިކުރުމާ ގުޅިގެން އޭނާ ކައުންސިލްގެ ރައީސްކަމުގެ މަޤާމުން ވަކިވެފައިވާކަމަށް ލޯކަލް ގަވަރމަންޓް އޮތޯރިޓީ (އެލް.ޖީ.އޭ) އިން ކަނޑައަޅައިފިއެވެ.
ޝުޖާޢު އަލީ ކައުންސިލަށް އިންތިޚާބުވީ ”ދަ ޑިމޮކްރެޓްސް“ ގެ ޓިކެޓުގައެވެ. ނަމަވެސް، ޤާނޫނީ ގޮތުން ފުރިހަމަވާންޖެހޭ މެންބަރުންގެ އަދަދު ހަމަނުވުމުގެ ސަބަބުން އިލެކްޝަންސް ކޮމިޝަނުން އިއްޔެ ވަނީ އެ ޕާޓީ އުވާލާފައެވެ. ޕާޓީ އުވާލުމާ ގުޅިގެން ޝުޖާޢު އަލީ ވަނީ 19 މޭ 2026 ގައި އެހެން ސިޔާސީ ޕާޓީއެއްގެ މެންބަރެއްގެ ގޮތުގައި އިލެކްޝަންސް ކޮމިޝަންގައި ދަފްތަރުވެފައެވެ.
އެލް.ޖީ.އޭ އިން ނެރުނު ބަޔާނެއްގައި ބަޔާންކޮށްފައިވަނީ، އިދާރީ ދާއިރާތައް ލާމަރުކަޒީ އުޞޫލުން ހިންގުމުގެ ޤާނޫނު (ޤާނޫނު ނަންބަރު 7/2010) ގެ 116 ވަނަ މާއްދާގެ (ހ) ގެ ދަށުން، ވަކި ސިޔާސީ ޕާޓީއެއްގެ ޓިކެޓްގައި އިންތިޚާބުވުމަށްފަހު، އެ ދައުރުގެ ތެރޭގައި އިންތިޚާބުވި ޕާޓީ ނޫން އެހެން ޕާޓީއެއްގެ މެންބަރެއްގެ ގޮތުގައި ދަފްތަރުވުމުން ކައުންސިލް މެންބަރުކަމުގެ މަޤާމުން ވަކިވާނެ ކަމަށެވެ.
ވ. ތިނަދޫ ކައުންސިލް ރައީސް އާ ގުޅޭގޮތުން މި އޮތޯރިޓީން ނެރޭ ނޫސްބަޔާން. pic.twitter.com/fbP0TbeY1w
— Local Government Authority (@lgaMaldives) July 3, 2026
ޝުޖާޢު އަލީ މަޤާމުން ވަކިވެފައިވާކަން ކަނޑައަޅާފައިވަނީ 30 ޖޫން 2026 ގައި ބޭއްވުނު އެލް.ޖީ.އޭގެ ބޯޑުގެ މިއަހަރުގެ 8 ވަނަ ބައްދަލުވުމުގައެވެ. އަދި ލާމަރުކަޒީ ޤާނޫނުގެ 29 ވަނަ މާއްދާގެ (ހ) ގައިވާ ގޮތުގެ މަތިން ވ. ތިނަދޫ ކައުންސިލްގެ ރައީސްގެ މަޤާމު ހުސްވެއްޖެކަން އިލެކްޝަންސް ކޮމިޝަނަށް އެންގުމަށްވެސް ބޯޑުން ވަނީ ނިންމާފައެވެ.
ޕާޓީ އުވާލުމުގެ ސަބަބުން ދިމާވި މި ޙާލަތާ ގުޅިގެން ޝުޖާޢު އަލީގެ ގޮނޑި ގެއްލުމަކީ، ލާމަރުކަޒީ ޤާނޫނަށް ގެނެވުނު ”އެންޓި-ޑިފެކްޝަން“ އިޞްލާޙުގެ ދަށުން ކައުންސިލަރެއްގެ ގޮނޑި ގެއްލުނު ފުރަތަމަ ފަހަރެވެ. މި ނިންމުމާއެކު، ތިނަދޫ ކައުންސިލްގެ ރައީސް ހޮވުމަށް ބާއްވާ ބައި-އިލެކްޝަން ކުރިއަށް އޮތް ތަނުގައި އިލެކްޝަންސް ކޮމިޝަނުން އިޢުލާން ކުރާނެއެވެ.
