އިޒްރޭލުން ޣައްޒާގައި ހިންގަމުންދާ ލޭއޮހޮރުވުމާއި ނަސްލު ނައްތާލުމުގެ ޖަރީމާއަށް 1،000 ދުވަސް ފުރުނުއިރު، މުޅި ޣައްޒާގެ 90 އިންސައްތަ ބިން އެއްކޮށް ބިމާހަމަކޮށް ސުންނާފަތިކޮށްލާފައިވާކަން ޣައްޒާގެ މީޑިއާ އޮފީހުން ކަށަވަރުކޮށްފިއެވެ. ޣައްޒާގެ ސަރުކާރުގެ ރަސްމީ ރިޕޯޓްތަކުން އެނގޭގޮތުގައި، މިހާތަނަށް ފަލަސްޠީނުގެ 2،700 އަށްވުރެ ގިނަ އާއިލާ ވަނީ ދުނިޔެއިން އެއްކޮށް ފޮހެލާފައެވެ (އެ އާއިލާއެއްގެ ހުރިހާ މެންބަރުން ޝަހީދުވުމުގެ ސަބަބުން ސިވިލް ރެޖިސްޓްރީން ވަނީ އުނިވެފައެވެ).
ހިތްދަތި ތަފާސްހިސާބުތަކާއި ނިޒާމީ ބަނޑަށްޖެއްސުން
އިމާރާތްތައް ނައްތާލުން: ޣައްޒާގައި ހުރި 410،000 އަށްވުރެ ގިނަ ގެދޮރާއި އިމާރާތް ވަނީ ދިރިނޫޅެވޭ ވަރަށް ގޮއްވާލާފައެވެ. މީގެ އިތުރުން 1،275 މިސްކިތުގެ ތެރެއިން 1،047 މިސްކިތް އެއްކޮށް ބިމާހަމަކޮށްފައިވާއިރު، 38 ހޮސްޕިޓަލެއް ވަނީ އެއްވެސް ޚިދުމަތެއް ނުދެވޭނެހެން ސުންނާފަތިކޮށްލާފައެވެ.
– ބަނޑަށްޖެއްސުމުގެ ސިޔާސަތު: އާބާދީގެ 80 އިންސައްތައަށްވުރެ ގިނަ މީހުން ތިބީ ފަގީރުކަމުގެ އެންމެ ދަށުގައެވެ. ޣައްޒާގެ 1.1 މިލިއަން ކުޑަކުދިންނަށް ދުވާލަކު ލިބެނީ އެންމެ ކެއުމެއް ނުވަތަ އެއަށްވުރެ މަދު މިންވަރެކެވެ. މިއީ އެމެރިކާގެ ފުރިހަމަ އެހީތެރިކަމާއެކު ބޯޑަރުތައް ބަންދުކޮށްގެން ހިންގާ ނިޒާމީ ބަނޑަށްޖެއްސުމުގެ ސިޔާސަތެކެވެ.
– އެމެރިކާގެ ބައިވެރިވުން: މި 1،000 ދުވަހުގެ ތެރޭގައި އިޒްރޭލުން ޣައްޒާއަށް 223،000 ޓަނުގެ ގޮވާތަކެތި އުކާލާފައިވާއިރު، މީގެ އެންމެ ބޮޑު ހިއްސާދާރަކީ އެމެރިކާއެވެ. ހަތިޔާރު ދިނުމާއި، އދ. ގައި އިޒްރޭލު ހިމާޔަތްކުރުމުގެ ސަބަބުން އެމެރިކާ ސިފަވަނީ މި އެޕާތްހައިޑް އަދި ޤަތުލުޢާންމުގެ މައިގަނޑު އިންޖިނޭރުގެ ގޮތުގައެވެ.
އަވަށްޓެރި ޢަރަބި ވެރިންގެ ހިމޭންކަން: ކިނބޫކަރުނަ އާއި ޚިޔާނާތުގެ ސަފުހާތައް
ޣައްޒާގެ މި ބޮޑު ނަސްލުހޭދުއާ އެކުއެކީގައި ފެންނަމުންދާ އެންމެ ހިތްދަތި މަންޒަރަކީ، އަވަށްޓެރި ޢަރަބި ޤައުމުތަކާއި އިސްލާމީ ދުނިޔޭގެ ވެރިންގެ ފަރާތުން ފެންނަ ބިރުވެރި ހިމޭންކަމެވެ. އެމީހުންގެ އަތުގައި ހުރި އިޤްތިޞާދީ، ސިޔާސީ، އަދި ތެލުގެ ބާރު ބޭނުންކޮށްގެން މި ޤަތުލުޢާންމު ހުއްޓުވުމުގެ ބަދަލުގައި، މިއަދުގެ ޢަރަބި ވެރިން އިސްކުރީ އެމީހުންގެ އަމިއްލަ ސިޔާސީ ގޮނޑިތަކާއި، އެމެރިކާއާއި އިޒްރޭލާއެކު އޮތް ސިއްރު ވިޔަފާރީގެ އެއްބަސްވުންތަކެވެ.
މި ވެރިން ބޭއްވި ސަމިޓްތަކުގައި ހަމައެކަނި ބަޔާންތަކުން ފުއްދާލިއިރު، ފަރުދާގެ ފުރަގަހުގައި އިޒްރޭލުގެ އިޤްތިޞާދީ ދިރުން ދެމެހެއްޓުމަށް ދަނީ އެހީތެރިވަމުންނެވެ. 1.1 މިލިއަން ތުއްތު ކުދިން ބަނޑަށް މަރުވަމުންދާއިރު، ބޯޑަރުތައް ހުޅުވައި ކާބޯތަކެތި ވެއްދުމަށް ޢަރަބި އަސްކަރިއްޔާތަކުން ފިޔަވަޅެއް ނޭޅުމަކީ ޙަޤީޤަތުގައި އިޒްރޭލުގެ ޖަރީމާތަކަށް އެމީހުން ދޭ ފާޅުކަންބޮޑު ހުއްދައެކެވެ. މިއީ މުޅި އުންމަތުގެ ޙައްޤުތައް ވެރިކަމުގެ ދަހިވެތިކަމުގައި ވިއްކާލުން ނޫން ދެން ކޮންކަމެއްހެއްޔެވެ؟
