2026 ވަނަ އަހަރުގެ ފީފާ ވޯލްޑް ކަޕްގެ ގަދަ 16 ގެ ބުރުން ޕޯޗުގަލް ޖާގަ ހޯދައިފިއެވެ. މި ފުރުސަތު އެގައުމަށް ލިބުނީ ގްރޫޕް ސްޓޭޖުގައި ކްރޮއޭޝިއާއާ ދެކޮޅަށް ކުޅުނު ފޯރިގަދަ މެޗު 2-1 އިން ކާމިޔާބުކޮށްގެންނެވެ.
ކެނެޑާގެ ޓޮރޮންޓޯގައި ކުޅުނު މި މެޗުގެ ފުރަތަމަ ލަނޑު ޖަހައި ކުރިހޯދީ ކްރޮއޭޝިއާއިންނެވެ. މެޗުގެ 53 ވަނަ މިނެޓުގައި މި ލަނޑު އެގައުމަށް ކާމިޔާބުކޮށްދިނީ އިވާން ޕެރިސިޗްއެވެ. ނަމަވެސް، މާގިނަ އިރުތަކެއް ނުވެ ޕޯޗުގަލްއިން ވަނީ މެޗުގެ ނަތީޖާ ހަމަހަމަކޮށްފައެވެ. ޕޯޗުގަލްގެ ރެނާޓޯ ވޭގާއަށް އޭރިއާ ތެރެއިން ކުރި ފައުލަކާ ގުޅިގެން ލިބުނު ޕެނަލްޓީ ކާމިޔާބުކޮށްދިނީ ކެޕްޓަން ކްރިސްޓިއާނޯ ރޮނާލްޑޯއެވެ. މިއީ ރޮނާލްޑޯގެ ފުޓްބޯޅަ ކެރިއަރުގައި ވޯލްޑް ކަޕެއްގެ ނޮކައުޓް ބުރެއްގައި އޭނާ ޖެހި ފުރަތަމަ ލަނޑެވެ. މިލަނޑަށް ދުނިޔޭގެ ބޮޑު ސަމާލުކަމެއް ހުއްޓުނީ އޭނާ ބިސްމީގެ ބަރަކާތުން މިލަނޑުޖެހުމުންނެވެ.
މެޗުން ޕޯޗުގަލް މޮޅުވި ލަނޑު ފެނިގެންދިޔައީ އިތުރު ވަގުތުގެ ހަތަރުވަނަ މިނެޓުގައެވެ. ރަފައެލް ލިއާއޯ ތަނަވަސްކޮށްދިން ފުރުސަތަކުން މި ލަނޑު ބޮލުން ޖަހައި ކާމިޔާބުކޮށްދިނީ ބަދަލު ކުޅުންތެރިއެއްގެ ގޮތުގައި ކުޅެން އެރި ގޮންކާލޯ ރާމޯސްއެވެ.
މެޗުގެ އެންމެ ފަހު ސިކުންތުކޮޅުގެ ތެރޭގައި ކްރޮއޭޝިއާގެ ޔޮސްކޯ ގްވާޑިއޯލް ލަނޑެއް ޖަހައި ނަތީޖާ ހަމަހަމަ ކުރި ކަމަށް ހީވި ނަމަވެސް، ވީއޭއާރް (VAR) އިން ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މި ނިންމުމާއެކު ކްރޮއޭޝިއާގެ ކުޅުންތެރިންނަށް ބޮޑު މާޔޫސްކަމެއް ލިބުނުއިރު، ޕޯޗުގަލްގެ ކުޅުންތެރިން ވަނީ ބޮޑު ކާމިޔާބީއެއް ފާހަގަކޮށްފައެވެ.
މި މެޗުން ބަލިވުމާއެކު ކްރޮއޭޝިއާ މުބާރާތުން ވަކިވާން ޖެހިފައިވާއިރު، ޕޯޗުގަލް ދެން ބައްދަލުކުރާނީ އަންނަ ހޯމަ ދުވަހު އެމެރިކާގެ ޑެލަސްގައި ސްޕެއިންއާއެވެ.
