މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން އަލަށް ތައާރަފުކުރި ”މޯލްޑިވްސް ފައިނޭންޝަލް ސެކްޓަރ އެވޯޑްސް“ ގައި، ”އެކްސެލެންސް އިން ޑިޖިޓަލް ފައިނޭންސް އެންޑް އިނޮވޭޝަން“ އެވޯޑް ބޭންކް އޮފް މޯލްޑިވްސް (ބީއެމްއެލް) އިން ކާމިޔާބުކޮށްފިއެވެ.
އެމްއެމްއޭއިން ހާމަކުރި ގޮތުގައި، ބީއެމްއެލްއަށް މި ޝަރަފު އެރުވުނީ ޑިޖިޓަލް ޓެކްނޮލޮޖީއާއި އާ އީޖާދުތަކުގެ އެހީގައި ރާއްޖޭގެ މާލީ ދާއިރާ ޒަމާނީކުރުމަށް އެ ބޭންކުން ކުރަމުންދާ އިހުލާސްތެރި މަސައްކަތްތަކުގެ އަގުވަޒަން ކުރުމުގެ ގޮތުންނެވެ. އެމްއެމްއޭގެ 45 ވަނަ އަހަރީ ދުވަހުގެ މުނާސަބަތުގައި ދިން މި އެވޯޑްތަކަކީ، ރާއްޖޭގެ މާލީ ނިޒާމު ހަރުދަނާކުރުމަށް މުހިންމު ހިދުމަތްތަކެއް ފޯރުކޮށްދީފައިވާ މުއައްސަސާތަކާއި ފަރުދުންގެ ހިދުމަތްތަކުގެ އަގުވަޒަންކުރުމަށް ދެވޭ އެވޯޑްތަކެކެވެ.
”އެކްސެލެންސް އިން ޑިޖިޓަލް ފައިނޭންސް އެންޑް އިނޮވޭޝަން“ ކެޓަގަރީން އެވޯޑް ދެނީ، ޑިޖިޓަލް ވަސީލަތްތައް ބޭނުންކޮށްގެން މާލީ ހިދުމަތްތަކަށް އިންގިލާބީ ބަދަލުތަކެއް ގެނެސް، ކަސްޓަމަރުންނަށް ފޯރުކޮށްދޭ ހިދުމަތުގެ ފެންވަރާއި ހަލުވިމިން އިތުރުކޮށް، މާލީ މުއާމަލާތްތައް ފަސޭހަކަމާއެކު ކުރެވޭނެ މަގުފަހިކޮށްދިނުމުގައި ނަމޫނާ ދައްކާފައިވާ ފަރާތްތަކަށެވެ.
ބީއެމްއެލްއަށް މި އެވޯޑް ލިބިފައިވަނީ، ރާއްޖޭގެ ބޭންކިންގ ދާއިރާ ޒަމާނީކުރުމަށް އެ ބޭންކުން ކުރަމުންދާ ބޮޑެތި އިންވެސްޓްމަންޓްތަކާއި، މުޅި ރާއްޖެއަށް ޑިޖިޓަލް ބޭންކިންގ ހިދުމަތްތައް ތައާރަފުކޮށް ފުޅާކުރުމުގައި އަދާކުރަމުންދާ މުހިންމު ދައުރަށް ބެލުމަށްފަހުގައެވެ. އެވޯޑް ޕެނަލުން ފާހަގަކުރި ގޮތުގައި، ޑިޖިޓަލް ޕްލެޓްފޯމްތަކާއި ޓެކްނޮލޮޖީގެ އެހީގައި ބޭންކުން ފޯރުކޮށްދޭ މާލީ ހައްލުތަކުގެ ސަބަބުން، ކަސްޓަމަރުން ބޭންކިންގ ހިދުމަތްތައް ބޭނުންކުރާ ގޮތަށް ވަނީ އިންގިލާބީ ބަދަލުތަކެއް އައިސްފައެވެ.
މޯލްޑިވްސް ފައިނޭންޝަލް ސެކްޓަރ އެވޯޑްސްއަކީ ރާއްޖޭގެ މާލީ ދާއިރާގައި ހޯދާ ފާހަގަކޮށްލެވޭ ކާމިޔާބީތަކާއި ކުރިއެރުންތަކުގެ އަގުވަޒަންކުރުމަށް ތައާރަފްކުރި އެވޯޑެކެވެ. މި އެވޯޑް ދިނުމުގައި މާލީ ހިދުމަތްތައް އެންމެނަށް ފޯރުކޮށްދިނުން ޑިޖިޓަލް ފައިނޭންސް، ގްރީން ފައިނޭންސް އަދި މި ދާއިރާއިން ފެންނަ އާ އީޖާދުތަކަށް ހާއްސަ އިސްކަމެއް ދެވިފައިވެއެވެ.
