ފަލަސްޠީނަށް އެހީތެރިވުމަށް އދ. އިން ކަނޑައަޅާފައިވާ އެޖެންސީ (އަންރުވާ )އަށް ދިވެހިރާއްޖޭގެ ފަރާތުން 50,000 އެމެރިކާ ޑޮލަރުގެ އެހީއެއް ދިނުމަށް ނިންމައިފިއެވެ
މިކަން އިޢުލާނު ކުރެއްވީ އދ. އަށް ކަނޑައަޅާފައި ހުންނަވާ ދިވެހިރާއްޖޭގެ ދާއިމީ މަންދޫބު ސަފީރު އަލީ ނަސީރު މުޙައްމަދު މިއަދު ކުރެއްވި ޓުވީޓެއްގައެވެ. މިއީ ފަލަސްޠީނަށް ދިމާވެފައިވާ އިންސާނީ ކާރިސީ ޙާލަތުން އަރައިގަތުމަށް އެހީވުމަށް ދިވެހި ސަރުކާރުން ވެފައިވާ ވަޢުދެކެވެ.
ފަލަސްޠީނަށް އެހީވުމުގެ ގޮތުން އަންރުވާ މެދުވެރިކޮށް ރާއްޖެއިން ކޮންމެ އަހަރަކުވެސް އަންނަނީ މާލީ އެހީތެރިކަން ފޯރުކޮށްދެމުންނެވެ. މީގެކުރިން ކޮންމެ އަހަރަކު ދެމުން އައީ 5,000 ޑޮލަރު ނަމަވެސް، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން ވަނީ 2024 ވަނަ އަހަރުން ފެށިގެން މި އަދަދު 50,000 ޑޮލަރަށް އިތުރުކުރައްވާފައެވެ. މިއީ ކުރިން ދެމުން އައި މިންވަރަށްވުރެ 10 ގުނަ އިތުރު އަދަދެކެވެ.
Today, Ambassador @AlinyMohamed announced #Maldives pledge of USD 50,000 to @UNRWA in support of #Palestine refugees; reaffirmed 🇲🇻 commitment to ensuring humanitarian assistance to those who needs it, & called for UNRWA's mandate to be protected & enabled without obstruction. pic.twitter.com/YqdtiiiN1c
— Maldives Mission NY (@MVPMNY) July 1, 2026
ސަފީރު އަލީ ނަސީރު ވަނީ، އަންރުވާގެ މެންޑޭޓަށް އެއްވެސް ހުރަހެއް ނެތި އެ އެޖެންސީގެ މަސައްކަތްތައް ކުރިއަށް ގެންދިއުމަށް މަގުފަހިކޮށްދިނުމަށް ބައިނަލްއަޤުވާމީ މުޖުތަމަޢަށް ގޮވާލައްވާފައެވެ. އަދި އިންސާނީ އެހީތެރިކަން ބޭނުންވާ ފަރާތްތަކަށް އެ އެހީ ފޯރުކޮށްދިނުމުގައި ރާއްޖެއިން އަބަދުވެސް ސާބިތުކަންމަތީ ދެމިއޮންނާނެ ކަމުގެ ޔަޤީންކަން އޭނާ ދެއްވިއެވެ.
ފަލަސްޠީނުގެ ރައްޔިތުންގެ ޙައްޤުގައި ވަކާލާތުކުރުމާއި، އެ ރައްޔިތުންނަށް ބޭނުންވާ އެހީތެރިކަން ފޯރުކޮށްދިނުމަކީ ރައީސް ޑރ. މުޢިއްޒުގެ ސަރުކާރުން ޚާއްޞަ އިސްކަމެއް ދެއްވައިގެން ކުރައްވަމުންދާ މަސައްކަތެކެވެ.
ތީ ދެ ހުދު މުހުތާރު ވެރިން