ދިވެހިރާއްޖޭގެ މިނިވަންކަމަށް 60 އަހަރު ފުރުމުގެ މުނާސަބަތުގައި މިދިޔަ އަހަރު ބޭއްވި ހަރަކާތްތަކަށް ޚަރަދުވީ ޖުމްލަ 4.1 މިލިއަން ރުފިޔާ ކަމަށް މިނިސްޓަރ އޮފް އާޓްސް، ކަލްޗަރ އެންޑް ހެރިޓޭޖް ހީނާ ވަލީދު މިއަދު ހާމަކުރައްވައިފިއެވެ.
މިނިސްޓަރު މި މައުލޫމާތު ހާމަކުރެއްވީ އިއްޔެ ރައްޔިތުންގެ މަޖިލީހަށް ހާޒިރުވެވަޑައިގެން، ގަލޮޅު އުތުރު ދާއިރާގެ މެންބަރު މުޙައްމަދު އިބްރާހިމް ކުރެއްވި ސުވާލަކަށް ޖަވާބު ދެއްވަމުންނެވެ.
މެންބަރު މުޙައްމަދު އިބްރާހިމް ސުވާލު ކުރައްވާފައިވަނީ މިނިވަންދުވަހުގެ ހަރަކާތްތަކަށް ހިނގި ޚަރަދުތަކުގެ ތަފްސީލާއި، މާލެ ފިޔަވައި ރާއްޖޭގެ އެހެން ސަރަހައްދުތަކުގައި މި ހަރަކާތްތައް ހިންގުމަށް ކުރި ޚަރަދުތައް ސާފުކުރުމަށެވެ.
މި ސުވާލަށް ޖަވާބު ދެއްވަމުން މިނިސްޓަރު ހީނާ ވަލީދު ވިދާޅުވީ، ދިވެހިރާއްޖޭގެ 60 ވަނަ މިނިވަންދުވަހުގެ ޙަރަކާތްތައް ހިންގުމަށް ދައުލަތުގެ ބަޖެޓުން ޚަރަދުވެފައިވަނީ ޖުމްލަ 4.1 މިލިއަން ރުފިޔާ ކަމަށެވެ. އަދި މި އަހަރުގެ މިނިވަންދުވަހުގެ ހަރަކާތްތައް އަތޮޅުތެރޭގެ އެއްވެސް ރަށެއްގައި ކުރިއަށް ގެންގޮސްފައި ނުވާކަން މިނިސްޓަރު ފާހަގަކުރެއްވިއެވެ.
”މިނިވަންކަމަށް 60 އަހަރު ފުރުމުގެ މުނާސަބަތާ ގުޅިގެން މާލެ ފިޔަވާ އަތޮޅުތެރޭގެ އެއްވެސް ތަނެއްގައި މި ހަރަކާތްތައް ހިންގާފައެއް ނުވޭ. އެހެންކަމުން އަތޮޅުތެރޭގައި މި ހަރަކާތްތައް ހިންގުމަށް އެއްވެސް ފައިސާއެއް ޚަރަދުވެފައި ނުވާކަން ދަންނަވަން،“ މަޖިލީހުގައި މެންބަރުންނަށް މައުލޫމާތު ދެއްވަމުން މިނިސްޓަރު ވިދާޅުވިއެވެ.
މިދިޔަ އަހަރާއި ޚިލާފަށް، މިއަހަރުގެ މިނިވަންދުވަހުގެ ހަރަކާތްތައް ކުލަގަދަކޮށް ބޭއްވުމުގެ ބަދަލުގައި، އިގްތިސާދީ ހާލަތަށް ރިއާޔަތްކޮށް ހަރަކާތްތައް މަދުކޮށްފައިވާކަން ސަރުކާރުން މީގެ ކުރިންވެސް ވަނީ ހާމަކޮށްފައެވެ. ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުން މަސައްކަތް ކުރަމުންދަނީ ދައުލަތުގެ ޚަރަދުތައް ކުޑަކޮށް، އިސްރާފު މަދުކުރުމުގެ ސިޔާސަތެއްގެ ދަށުންކަން ސަރުކާރުން ވަނީ ހާމަކުރައްވާފައެވެ.
