ބޭންކް އޮފް މޯލްޑިވްސް (ބީއެމްއެލް) ގެ އެމެރިކަން އެކްސްޕްރެސް ކާޑު ގެންގުޅުއްވާ ކަސްޓަމަރުންނަށް ދުނިޔޭގެ އެންމެ ފޯރިގަދަ އެއް ކުޅިވަރު ކަމަށްވާ ފޯމިއުލާ 1 ސިންގަޕޫރު ގްރޭންޑް ޕްރީގެ ފޯރި ސީދާ ރޭސް ޓްރެކުން ތަޖުރިބާކޮށްލުމުގެ ރަން ފުރުސަތެއް އެ ބޭންކުން ހުޅުވާލައިފިއެވެ.
ބީއެމްއެލް އިން އަލަށް ފެށި މި ޚާއްސަ ޕްރޮމޯޝަނަކީ އެ ބޭންކުގެ އެމެރިކަން އެކްސްޕްރެސް ޕްލެޓިނަމް ކްރެޑިޓް ކާޑު އަދި އެމެރިކަން އެކްސްޕްރެސް އިސްލާމިކް ޕްލެޓިނަމް ކްރެޑިޓް ކާޑު ބޭނުންކުރާ ކަސްޓަމަރުންނަށް އަމާޒުކޮށްގެން ކުރިއަށްގެންދާ ޕްރޮމޯޝަނެކެވެ. މިއީ ކަސްޓަމަރުންނަށް އަގުހުރި ތަޖުރިބާތަކާއި، ދިރިއުޅުމުގެ އުފާވެރިކަން އިތުރުކޮށްދިނުމަށް ބޭންކުން ދެމުންދާ އިސްކަމުގެ ދަށުން ކުރިއަށްގެންދާ ހަރަކާތެކެވެ.
މި މަހުގެ ނިޔަލަށް ކުރިއަށްދާ މި ޕްރޮމޯޝަނުގައި ބައިވެރިވެވޭނީ ބީއެމްއެލްގެ އެމެކްސް ޕްލެޓިނަމް ކާޑުތައް ބޭނުންކޮށްގެން ރާއްޖޭގެ މާކެޓުގައި ވިޔަފާރިކުރާ ކަސްޓަމަރުންނަށެވެ. ޕްރޮމޯޝަން ނިމުމުން ގުރުއަތުން ހޮވޭ ނަސީބުވެރި ފަރާތަކަށް، އިތުރު މީހަކާއެކު ސިންގަޕޫރުގެ ފޯރިގަދަ ރޭސް ބަލާލުމުގެ ހުރިހާ ޚަރަދެއް ބޭންކުން ހަމަޖައްސައިދޭނެއެވެ.
ނަސީބުވެރި ފަރާތަށް ލިބޭ އިނާމުތަކުގެ ތެރޭގައި ހިމެނެނީ:
- 2026 ވަނަ އަހަރުގެ ފޯމިއުލާ 1 ސިންގަޕޫރު އެއާލައިންސް ގްރޭންޑް ޕްރީގެ ތިން ދުވަހުގެ އެކްސެސް.
- އެމެކްސް ސްކައި ސޫޓްގެ 2 ޓިކެޓް.
- ނަސީބުވެރި ފަރާތާއި އިތުރު މީހެއްގެ ދެކޮޅު ޓިކެޓް.
- އިވެންޓް ކުރިއަށްދާ މުއްދަތުގައި ހޮޓެލް އެކޮމޮޑޭޝަން.
ބީއެމްއެލް އިން ހާމަކުރި ގޮތުގައި، މިއީ އެ ބޭންކުގެ ކަސްޓަމަރުންނަށް ދުނިޔޭގެ ފެންވަރުގެ ލައިފްސްޓައިލް މަންފާތަކާއި، މަދުން ނޫނީ ނުލިބޭނެ ފަދަ ތަފާތު ފުރުސަތުތައް ފޯރުކޮށްދިނުމަށް ކުރަމުންދާ މަސައްކަތުގެ މުހިންމު ބައެކެވެ. މި ޕްރޮމޯޝަނުގެ ސަބަބުން ކަސްޓަމަރުންނަށް ބޭންކާއެކު އޮންނަ ގުޅުން އިތުރަށް ބަދަހިވެ، ތަފާތު ތަޖުރިބާތަކެއް ކުރުމުގެ މަގު ފަހިވެގެންދާނެއެވެ.
