މޯލްޑިވްސް ހައްޖު ކޯޕަރޭޝަން ލިމިޑެޓްގެ ބޯޑް މެމްބަރުކަމާއި މެނޭޖިންގ ޑިރެކްޓަރުކަމުގެ މަޤާމަށް ބޭފުޅަކު އައްޔަނު ކުރައްވައިފިއެވެ.
ޕްރައިވެޓައިޒޭޝަން އެންޑް ކޯޕަރަޓައިޒޭޝަން ބޯޑުން (ޕީސީބީ) މި މަޤާމަށް އައްޔަނުކުރައްވާފައިވަނީ ދ. ކުޑަހުވަދޫ، ޝަބްނަމީގެ، އަލްއުސްތާޛް މުޙައްމަދު ފިރުޒުލް ޢަބްދުﷲ ޚަލީލެވެ.
އަލްއުސްތާޛް މުޙައްމަދު ފިރުޒުލް މި މަޤާމަށް އައްޔަނުކުރައްވާފައިވަނީ 1 ޖުލައި 2024 އިން ފެށިގެންނެވެ. ފިރުޒުލްއަކީ މީގެ ކުރިން ރައީސުލްޖުމްހޫރިއްޔާ ޑރ. މުޙައްމަދު މުޢިއްޒުގެ ސަރުކާރުގައި މުހިންމު ޒިންމާތަކެއް އަދާކުރައްވާފައިވާ، އިލްމީ އަދި ޤާނޫނީ ދާއިރާގެ ތަޖުރިބާކާރު ބޭފުޅެކެވެ.
ފިރުޒުލްއަކީ މިޞްރުގެ އަލްއަޒްހަރު ޔުނިވަރސިޓީން ޝަރީޢާ އެންޑް ލޯގެ ދާއިރާއިން ބެޗްލާސް ޑިގްރީ ހާސިލުކުރައްވާފައިވާ ބޭފުޅެކެވެ. އަދި އޭނާއަކީ ބާ އެގްޒާމް ފުރިހަމަކުރައްވާފައިވާ ޤާނޫނީ ވަކީލެއްގެ އިތުރުން، މާތް ﷲ ގެ ކަލާމްފުޅު ހިތުދަސްކުރައްވާފައިވާ ޙާފިޛެއްވެސް މެއެވެ. މީގެ އިތުރުން، ފިރުޒުލްއަކީ ދީނީ ދަރުސް ދެއްވުމުގެ ހުއްދަ އޮންނަ އިމާމެއްގެ ގޮތުގައި ފާހަގަކުރެވޭ، ނަމޫނާ އަޚްލާޤެއްގެ ވެރި ޒުވާން ބޭފުޅެކެވެ.
ހައްޖު ކޯޕަރޭޝަންގެ މެނޭޖިންގ ޑިރެކްޓަރުގެ މަޤާމަށް އައު ބޭފުޅަކު މި އައްޔަނުކުރެއްވީ، އެ ކޯޕަރޭޝަންގެ ހިންގުން އިތުރަށް ހަރުދަނާކޮށް، ދިވެހި ޙައްޖުވެރިންނަށް ފޯރުކޮށްދޭ ޚިދުމަތްތައް ފުޅާކުރުމުގެ މަޤްޞަދުގައެވެ.
ސަރުކާރުގެ ކުންފުނިތަކުގެ އިސް މަޤާމުތަކަށް ބަދަލުތައް ގެންނަމުންދާއިރު، ފިރުޒުލް ފަދަ އިލްމީ އަދި ޤާބިލު ބޭފުޅަކު މި މަޤާމަށް އައްޔަނުކުރެއްވުމަކީ ހައްޖު ކޯޕަރޭޝަނަށް ލިބިގެންދާނެ އިތުރު ކުރިއެރުމެއް ކަމަށް ބެލެވެއެވެ. މި އައްޔަނުކުރެއްވުމާއެކު، ހައްޖާއި އުމްރާގެ ކަންކަން އިންތިޒާމުކުރުމުގައި މިހާރަށްވުރެ ހަރުދަނާ ނިޒާމެއް ޤާއިމުވެގެންދާނެ ކަމަށް އުންމީދު ކުރެވެއެވެ.
