ވ. އާރަށުގެ މައްސަލައިގައި ދައުލަތުން ހުށަހެޅި އާ ހެކިތައް ބަލައިގަތުމާމެދު ގޮތެއް ނިންމުމަށް ސުޕްރީމް ކޯޓަށް ހުށަހަޅާފައިވާ މައްސަލައިގެ ހުކުމް އިއްވުން މާދަމާ ބޭއްވުމަށް ތާވަލުކޮށްފިއެވެ.
ވ. އާރަށް ކުއްޔަށް ދޫކުރުމުގެ މުއާމަލާތާ ގުޅިގެން ކުރީގެ ރައީސް ޔާމީންގެ މައްޗަށް ދައުލަތުން އުފުލި ރިޝްވަތު ޤަބޫލުކުރުމާއި މަނީ ލޯންޑަރިންގެ ދައުވާ ސާބިތުވާކަމަށް ކްރިމިނަލް ކޯޓުން ކުރިން އޮތީ ހުކުމްކޮށްފައެވެ. އެ މައްސަލަ ހައިކޯޓުގައި އިސްތިއުނާފު ކުރުމުން ކްރިމިނަލް ކޯޓުގެ ހުކުމް ބާތިލުކޮށް މައްސަލަ އަލުން ބެލުމަށް ހައިކޯޓުން ވަނީ އަމުރުކޮށްފައެވެ.
ހައިކޯޓުން މައްސަލަ އަލުން ބެލުމަށް އެންގި އެންގުމުގައި ދައުލަތުން ކްރިމިނަލް ކޯޓަށް ހުށަހެޅި އާ ހެކިތަކެއް ބަލައިނުގަނެވޭނެކަމަށް ކަނޑައަޅާފައިވެއެވެ.
ޕްރޮސިކިއުޓަރ ޖެނެރަލްގެ އޮފީހުން ސުޕްރީމް ކޯޓަށް މައްސަލަ ހުށަހެޅީ ހައިކޯޓުގެ އެ ނިންމުން ގޯސްކަމަށް ކަނޑައަޅައިދީ ދައުލަތުގެ އާ ހެކިތައް ބަލައިގަނެވޭނެކަމަށް އަމުރުކޮށްދިނުމަށް އެދިއެވެ. މި މައްސަލައިގެ އަޑުއެހުންތައް ސުޕްރީމް ކޯޓުގައި ނިންމާލާފައިވާއިރު ދެން އޮންނާނީ މައްސަލައިގައި ގޮތެއް ނިންމުމެވެ.
މި މައްސަލައިގެ ހުކުމް އިއްވުމަށް ސުޕްރީމް ކޯޓުގައި ތާވަލުކޮށްފައިވަނީ މާދަމ ހެނދުނު 8:45 ގައެވެ.
މި މައްސަލައިގައި ސުޕްރީމް ކޯޓުން ނިންމާ ނިންމުމެއްގެ ސަބަބުން ކްރިމިނަލް ކޯޓުގައި އަލުން ފަށަންޖެހޭ ޝަރީއަތަށް ބޮޑެތި ބަދަލުތަކެއް އައުމަކީ އެކަށީގެންވާ ކަމެކެވެ.
