ރާއްޖޭގެ އާބާދީ ބޮޑެތި ރަށްރަށާއި ސިޓީތަކުގައި މޯލްޑިވްސް ފިޝަރީޒް އެންޑް އެގްރިކަލްޗަރަލް މާކެޓިންގ ކޯޕަރޭޝަން (މިފްކޯ) ގެ ފިހާރަތައް ހުޅުވުމުގެ މަސައްކަތް ވަރަށް ބާރަށް ކުރިއަށްދާކަމަށް އެކުންފުނީގެ ޗީފް އޮޕަރޭޓިންގ އޮފިސަރ (ސީއޯއޯ) ހާމިދު ނަޒީމު އިބްރާހީމް ވިދާޅުވެއްޖެއެވެ.
ޕީއެސްއެމް ނިއުސްއަށް ދެއްވި ޚާއްސަ އިންޓަވިއުއެއްގައި ހާމިދު ނަޒީމު ވިދާޅުވީ، ރާއްޖޭގެ މަސްވެރިކަމުގެ ސިނާޢަތުގައި މުހިންމު ދައުރެއް އަދާކުރާ މިފްކޯގެ އަމާޒަކީ އެކުންފުނީގެ އުފެއްދުންތައް ރައްޔިތުންނަށް ފަސޭހަކަމާއެކު، ހެޔޮ އަގުގައި ލިބޭނެ އިންތިޒާމުތައް ހަމަޖެއްސުން ކަމަށެވެ. އެގޮތުން މާލޭގެ އިތުރުން އަތޮޅުތެރޭގެ އާބާދީ ބޮޑެތި ރަށްރަށުގައި މިފްކޯގެ ފިހާރަތައް ގާއިމުކުރުމަށް ރޭވިފައިވާ ކަމަށް އޭނާ ފާހަގަކުރެއްވިއެވެ.މި މަސައްކަތުގެ ދަށުން އެންމެ ބޮޑު އިސްކަމެއް ދޭނީ ރާއްޖޭގެ ސިޓީތަކަށާއި އާބާދީގެ ގޮތުން ރަށަށް ކަމަށް ސީއޯއޯ ފާހަގަކުރެއްވިއެވެ.
”އަޅުގަނޑުމެންގެ ވިސްނުމަކީ ރާއްޖޭގެ އާބާދީ ބޮޑު ރަށްރަށުގައި މިފްކޯގެ ފިހާރަތައް ހުޅުވާ، އަދި މިފްކޯގެ އުފެއްދުންތައް އާންމު ރައްޔިތުންނާ ހަމައަށް އަގުހެޔޮކޮށް އަދި ލުއިފަސޭހަކޮށް ފޯރުކޮށްދިނުން. ދާދިފަހުން ވާނެ އައްޑޫ ހިތަދޫގަ މިފްކޯގެ ފިހާރައެއް ހުޅުވާފައި. ކުރިއަށް އޮތްތަނުގައި ރާއްޖޭގެ އާބާދީ ބޮޑެތި ރަށްރަށުގައި މިފްކޯގެ ފިހާރަތައް ހުޅުވައި، އުފެއްދުންތައް ފަސޭހަގޮތެއްގަ ފޯރުކޮށްދިނުން،“ ހާމިދު ނަޒީމު ވިދާޅުވިއެވެ.
މިފްކޯގެ އުފެއްދުންތައް އަތޮޅުތެރެއަށް ފުޅާކުރުމުގެ ގޮތުން، މިއަހަރުގެ މޭއި މަހުގެ ތެރޭގައި ވަނީ އަތޮޅުތެރޭގައި ހުޅުވި އެކުންފުނީގެ ފުރަތަމަ އައުޓްލެޓް އައްޑޫ ސިޓީ ހިތަދޫގައި ހުޅުވާފައެވެ. މީގެ އިތުރުން، ރާއްޖޭގެ ބޭރުގައި ދިވެހީން ގިނަ އަދަދަކަށް ދިރިއުޅޭ ގައުމުތަކުގައިވެސް މިފްކޯގެ އުފެއްދުންތައް ލިބޭނެ މަގު ފަހިކުރުމުގެ މަސައްކަތް ސަރުކާރުން އަންނަނީ ކުރަމުންނެވެ.
އެގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ސްރީލަންކާއަށް ކުރެއްވި ރަސްމީ ދަތުރުފުޅުގެ ތެރެއިން، އެ ގައުމުގައި ދިރިއުޅޭ ދިވެހިންނަށް ފަސޭހައިން މަސްދަޅާއި މިފްކޯގެ އެހެނިހެން އުފެއްދުންތައް ލިބޭނެ އިންތިޒާމު ހަމަޖެއްސުމަށްޓަކައި ލަންކާގައިވެސް މިފްކޯގެ އައުޓްލެޓެއް ވަނީ ހުޅުވާފައެވެ.
މިފްކޯއިން ބުނީ ކުރިއަށް އޮތް ތަނުގައިވެސް ރައްޔިތުންނަށް އެންމެ ބޭނުންތެރި މަސްވެރިކަމުގެ އުފެއްދުންތައް މުޅި ރާއްޖެއަށް ފުޅާކޮށް، އެންމެ އެކަށީގެންވާ އަގުތަކެއްގައި ފޯރުކޮށްދިނުމަކީ އެކުންފުނީގެ މުހިންމު ސިޔާސަތެއް ކަމަށެވެ.
