ރާއްޖޭގެ ސިޔާސީ މަސްރަޙުގައި މިހާރު އެންމެ ބޮޑަށް ބަހުސްކުރެވެމުންދާ އެއް މައުޟޫޢަކީ އިދިކޮޅު ޕާޓީތަކުގެ ދައުރާއި، ސަރުކާރު ޖަވާބުދާރީ ކުރުވުމުގައި އެ ފަރާތްތަކުން އަދާކުރާ ދައުރެވެ. މިގޮތުން، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ދާދިފަހުން ދައްކަވާފައިވާ ވާހަކަފުޅުތަކުގައި، ޒިންމާދާރު އަދި ވާދަވެރި އިދިކޮޅު ސިޔާސީ ޙަރަކާތެއް ރާއްޖޭގައި ނެތްކަމަށް ވަނީ ވިދާޅުވެފައެވެ. މި ވާހަކަފުޅުތަކަށް އިޝާރާތްކުރައްވައި، ޕީޕަލްސް ނެޝަނަލް ފްރަންޓް (ޕީއެންއެފް) ގެ ޖަލްސާއެއްގައި ވާހަކަފުޅުދައްކަވަމުން ކުރީގެ ރައީސް ޔާމީން ވަނީ، ރައީސް މުޢިއްޒުގެ އެ ވާހަކަފުޅުތަކަކީ ޙަޤީޤަތެއް ކަމަށް އެއްބަސްވެވަޑައިގެންފައެވެ.
ރައީސް ޔާމީން ފާހަގަކުރެއްވި ގޮތުގައި، ސަރުކާރަށް ޕްރެޝަރުކޮށް، ސަރުކާރު ހާސްކޮށްލާވަރުގެ އެއްވެސް ޙަރަކާތެއް އިދިކޮޅު ފަރާތްތަކުން މިހާރު ނުހިންގައެވެ. އަދި ރައީސް މުޢިއްޒު އެ ދައްކަވާ ވާހަކަފުޅުތަކަކީ ޕީއެންއެފްއަށް އަމާޒުކޮށް ދައްކަވާ ވާހަކަފުޅުތަކެއް ނޫން ކަމަށާއި، އެއީ ސީދާ ދިވެހިރައްޔިތުންގެ ޑިމޮކްރެޓިކް ޕާޓީ (އެމްޑީޕީ) އަށް އަމާޒުކުރައްވައި ވިދާޅުވާ ބަސްފުޅުތަކެއް ކަމަށް ޔާމީން ވިދާޅުވިއެވެ. އެމްޑީޕީއަކީ ރާއްޖޭގެ އެންމެ ބޮޑު އިދިކޮޅު ޕާޓީކަމަށްވާއިރު، އެ ޕާޓީގެ ފަރާތުން ފެންނަންޖެހޭ ސިޔާސީ ޙަރަކާތްތެރިކަން ނުފެންނަކަމީ ސިޔާސީ ގިނަ ފަރާތްތަކަކުން މިހާރު ފާހަގަކުރަމުންދާ ކަމެކެވެ.
އެމްޑީޕީގެ ސިޔާސީ ޙަރަކާތްތައް މަޑުޖެހިފައިވާކަން ފާހަގަކުރައްވަމުން، ރައީސް ޔާމީން ވަނީ ކުރީގެ ރައީސް މުޙައްމަދު ނަޝީދު މީގެ ކުރިން ވިދާޅުވެފައިވާ ވާހަކަފުޅަކަށް އަލިއަޅުއްވާލައްވައިފައެވެ. އެމްޑީޕީގެ ޗެއާޕާސަން ކަމުގެ މަޤާމަށް ނަޝީދު ވާދަކުރެއްވި ދުވަސްވަރު، އެ މަޤާމު ލިބިވަޑައިގެންފިނަމަ ރައީސް މުޢިއްޒު އޮންނަވަން ޖެހިވަޑައިގަންނަވާނީ ”މުންޑު އަނދެގެން ގޭގައި“ ކަމަށް ނަޝީދު ވަނީ ވިދާޅުވެފައެވެ. ނަމަވެސް މިއަދުގެ ސިޔާސީ މަސްރަޙަށް ބަލާއިރު، ނަޝީދުއަށް އަމާޒުކުރައްވާ ރައީސް ޔާމީން ސުވާލު އުފެއްދެވީ މިއަދު ގޭގައި މުންޑު އަނދެގެން އޮންނެވީ ކޮން ބޭފުޅެއްތޯއެވެ. ޔާމީން މިހެން ވިދާޅުވުމުން ދޭހަވަނީ އެބޭފުޅުންނަށް ސަރުކާރާ ދެކޮޅަށް މުޒާހަރާއެއް ނުކުރެވެނީ ރައީސް ޔާމީން ސިޓިންރޫމުގައި އިންނަވާފައި ރައީސް ނަޝީދު މުންޑު އަނދެގެން ގޭގައި އޮންނެވުމުންކަމެވެ.
”[ކުރީގެ] ރައީސް ނަޝީދު އެމްޑީޕީގެ ޗެއާޕާސަން ކަމަށް ކުރިމަތިލައިގެން އުޅުނުއިރު ވިދާޅުވި ތިމަންނަ މިކަން ކުރީމަ ދެން [ރައީސް] މުއިއްޒު އޮންނަން ޖެހޭނީ މުންޑު ލައިގެން ގޭގައިތޯ. ދެން މިއަދު އަޅުގަނޑު ސުވާލުކުރަން ބޭނުން ކާކުތޯ މިއަދު މުންޑު އަނދެގެން އޮތީ ގޭގައި. އެހެންވީމާ އެ ވާހަކަ މުއިއްޒު އެ ދައްކަނީ.“ ރައީސް ޔާމީން ވިދާޅުވިއެވެ.
ޔާމީންގެ ނަޒަރުގައި، ސިޔާސީ މައިދާނުން އެކަހެރިވެ، ޙަރަކާތްތެރިކަން ކުޑަވެފައިވަނީ ރައީސް ނަޝީދާއި އެމްޑީޕީއެވެ. އެހެންކަމުން، ސަރުކާރުން އިދިކޮޅުގެ ”އުރަތްޕެއް ނެތް“ ކަމަށް ބުނެ ދައްކާ ވާހަކަތަކަކީ، އެމްޑީޕީގެ މިއަދުގެ ޙާލަތާ ގުޅޭގޮތުން ދައްކާ ވާހަކަތަކެއްކަމަށް ޔާމީން ސިފަކުރެއްވިއެވެ. މިއީ ސިޔާސީ ގޮތުން އެމްޑީޕީ އާއި ރައީސް ނަޝީދަށް އަމާޒުކުރެވުނު ވަރަށް ބޮޑު ފާޑުކިޔުމެކެވެ.
ޔާމީން މިފަދައިން ވިދާޅުވުމުން ދޭހަވަނީ މަގުމަތީގައި ހަލަބޮލިކޮށް ސަރުކާރަށް ޕްރެޝަރު ކުރުން ނުވަތަ ސަރުކާރު ޖަވާބުދާރީ ކުރުމަކީ ޔާމީނަށް ކުރެވޭނެ ވަރުގެ ކަމެއް ނޫންކަމެވެ. އެއަށްވުރެ މާ ބޮޑަށް އެމަނިކުފާނު ކަންނެތީ އެވެ. އެކަން ކުރަން ޖެހޭ ބަޔަކީ އެމްޑީޕީ ކަމަށް ދޭހަވާ މޭރުމަކުން ޔާމީން ވިދާޅުވީ ޕީއެންއެފްއަކީ އަދި އެ މަނިކުފާނަށް ތާއީދުކުރައްވާ ބޭފުޅުންނަކީ އެއްވެސް އިރެއްގައި މަގުމައްޗަށް ނުކުމެ ހަމަނުޖެހުން ހިންގައި، މުޒާހަރާކުރި ބައެއް ނޫނެވެ. އޭގެ ބަދަލުގައި، އެ ފަރާތްތަކުން އަބަދުވެސް އިސްކަންދެނީ ޢިލްމީ ބަހުސްތަކުގެ ތެރެއިން ކަންކަން ޙައްލުކުރުމަށާއި، ރައްޔިތުންނަށް ކަންކަމުގެ ޙަޤީޤަތް ވިސްނައިދިނުމަށެވެ. އެހެން ވިދާޅުވިނަމަވެސް 6 ވަރަކަށް މީހުން ގޮވައިގެން ނުކުމެ ބޭއަދަބީ އެތައް ކަންތައްތަކެއް ޔާމީންގެ ޕީއެންއެފުން މަގުމަތީގައި ހިންގިއެވެ. މިކަމަށް ސަޕޯޓެއް އިތުރެއްނުވިއެވެ. މިކަމާ އެތައް ރައްޔިތުންގެ ނުރުހުންވެސް ޔާމީނަށް ވަނީ އަމާޒުވެފައެވެ.
ވޭތުވެދިޔަ އަހަރުތަކުގައި ޕާޓީގެ އޮފީހުގައި ކުރަމުންދިޔަ މައިގަނޑު މަސައްކަތަކީ ދޫވެހި ސިޓިންރޫމުގައި ތިބެގެން ވާހަކަ ދެއްކުން ކަމަށް ޔާމީން ފާހަގަކުރެއްވިއެވެ.އަދި ޕީއެންއެފުން ގެންގުޅެނީ މަގުމަތީގެ ޙަރަކާތްތަކަށްވުރެ ބޮޑަށް، ފިކުރީ އަދި ސިޔާސީ ބަހުސްތަކުގެ މައްޗަށް ބިނާވެފައިވާ އުސޫލެއް ކަމަށް ރައީސް ޔާމީން ވިދާޅުވި ނަމަވެސް، މި ވާހަކަފުޅުތަކުން ދޭހަވަނީ، ޕީއެންއެފްއިން ސަރުކާރު ޖަވާބުދާރީކުރުވުމުގެ ނަމުގައި ސިޓިންރޫމުގައި ތިބެގެން މީހުންގެ ޒާތަށް ފުރައްސާރަކޮށް ޣީބަ ބުނުމާއި ނެތި މޮށުމުގެ ޢަމަލުތައް ފިޔަވާ އިތުރު މާ މޮޅެތި ކަންތައްތަކެއް ކުރެވިފައިވާ ނުވާކަމެވެ.
ކުރީގެ ތިން ރައީސުން ކަމަށްވާ މުހައްމަދު ނަޝީދާއި އަބްދުﷲ ޔާމީން އަބްދުލްގައްޔޫމް އަދި އިބްރާހިމް މުހައްމަދު ސޯލިހު ޤައުމީ މަސްލަހަތަށްޓަކައި ޤައުމާ ރައްޔިތުންނާއި، ނޫސްވެރިންގެ ޙައްޤުގައިކަމަށްބުނެ އެކުވެގެން މަސައްކަތްކުރަން ފެށި ނަމަވެސް، އެ މަސައްކަތްތަކުގެ އެއްވެސް ތަފްސީލެއް އަދި ނަތީޖާއެއް މިއަދާއި ހަމަޔަށް އައިއިރުވެސް އާންމުންނާ ހިއްސާކޮށްފައި ނުވެއެވެ. މިހާރުގެ މަންޒަރުތަކަށް ބަލާއިރު، އަބްދުއްރަޙީމް ވިދާޅުވިފަދައިން ހަމަ ރަނގަޅަށްވެސް މި 3 ރައީސުން ތިއްބެވީ 3 ފަރާތަށް މޫނު އަނބުރައިގެންނެވެ.
