ފިތުރު އީދު ދުވަހުގެ މުނާސަބަތުގައި ރައީސް މައުމޫން ޢަބްދުލްޤައްޔޫމް އީދު ސަލާން ކުރައްވާ ގޮތަށް ނިންމަވައިފިއެވެ.
’އެކްސް‘ ގައި ކުރެއްވި ޕޯސްޓެއްގައި ރައީސް މައުމޫން ވިދާޅުވީ އެމަނިކުފާނާ ބައްދަލުކޮށްލައި އީދު ސަލާން ކޮށްލަން ބޭނުންވާ ފަރާތްތަކަށް އެ ފުރުސަތު ހުޅުވާލާފައިވާ ކަމަށެވެ. އެގޮތުން މާދަމާ ހެނދުނު 9:30 އިން ފެށިގެން 11:00 އަށް އެކަމަށް ވަގުތު ހުސްކުރުމަށް ގަސްދުކުރައްވާ ކަަމަށް އެމަނިކުފާނު ވިދާޅުވިއެވެ.
ރައީސް މައުމޫން ވިދާޅުވެފައި ވަނީ އީދު ސަލާން ކުރުން އޮންނާނީ މ. އެންދެރިމާގޭގައި ކަމަށެވެ. އެމަނިކުފާނުގެ ވެރިކަމުގައި ކޮންމެ އީދެއްގައި ވެސް އީދު ސަލާން ކުރުން ވަނީ ބާއްވާފައެވެ.
ރައީސް މައުމޫނު އިތުރުން، ރައީސް ޑރ. މުޙައްމަދު މުޢިއްޒާއި އެމަނިކުފާނުގެ އަނބިކަނބަލުން ސާޖިދާ މުޙައްމަދު ވެސް ރައްޔިތުންނާ ބައްދަލުކުރައްވައި އީދު ސަލާން ކުރެއްވުމަށް ވަނީ ނިންމަވާފައެވެ. ރައީސް އޮފީހުން ބުނި ގޮތުގައި އީދު ސަލާން ކުރެއްވުން ބޭއްވުމަށް ހަމަޖެހިފައި ވަނީ މާދަމާ ހެނދުނު 9:30 އިން ފެށިގެން 10:30 އަށް ރައީސްގެ ރަސްމީ ގެ، މުލިއާގޭގައި ކަމުގައެވެ.
އީދު ސަލާން ކުރެއްވުމަށް ވަޑައިގަންނަވާ ބޭފުޅުން މުލިއާގެއަށް ވެދެވަޑައިގަތުމަށް ހަމަޖެހިފައި ވަނީ މެދުޒިޔާރަތް މަގަށް ހުންނަ މުލިއާގޭ ބޮޑު ދޮރޯށިން ކަމަށް ރައީސް އޮފީހުން ބުނެއެވެ. އެ އޮފީހުން ބުނީ މުލިއާގެއަށް ވަޑައިގެންނެވޭނީ ޝަހީދު އަބްދުﷲ ޒުހައިރު ހިނގުމުން މެދުޒިޔާރަތް މަގުން ކަމަށެވެ.
