ހުޅުމާލެ ޖަލުގެ ތިން ޔުނިޓެއް ރިމާންޑް ޖަލެއްގެ ގޮތުގައި ހޯމް މިނިސްޓްރީން ރަސްމީކޮށް ކަނޑައަޅައިފިއެވެ.
މި ނިންމުމާ ގުޅޭގޮތުން އެ މިނިސްޓްރީން ބުނީ، ޖަލުތަކާއި ޕެރޯލްގެ ގާނޫނުގެ ތިން ވަނަ މާއްދާގެ (ހ) އިން މިނިސްޓަރަށް ލިބިދޭ ބާރުގެ ދަށުން، ހުޅުމާލެ ޖަލުގެ ހަ ވަނަ ޔުނިޓްގެ ސެލް 1 އަދި ސެލް 2 ވަނީ ރިމާންޑް ޖަލު ފެސިލިޓީތަކެއްގެ ގޮތުގައި ކަނޑައަޅާފައި ކަމަށެވެ. އަދި މި ތަންތަން ހިންގަމުންދާނީ މޯލްޑިވްސް ކަރެކްޝަނަލް ސަރވިސްގެ ބެލުމުގެ ދަށުން ކަމަށް އެ މިނިސްޓްރީން ވަނީ މައުލޫމާތުދީފައެވެ.
މި ބަދަލާއެކު، ޝަރީއަތް ނިމެންދެން ބަންދުގައި ބައިތިއްބަންޖެހޭ މީހުން ބޭތިއްބުމަށް ހާއްސަ އިންތިޒާމުތަކެއް ހުޅުމާލެ ޖަލުގައި މިހާރު ވަނީ ގާއިމުކުރެވިފައެވެ. ރިމާންޑް ޖަލަކީ ކުށެއްގެ ތުހުމަތުގައި ހައްޔަރުކުރެވޭ ނަމަވެސް، ކޯޓަކުން އަދި ކުށް ސާބިތުވެ ހުކުމެއް ކޮށްފައިނުވާ މީހުން ބޭތިއްބުމަށް ބޭނުންކުރާ ތަނެކެވެ. މިއީ ކޯޓުން ކުށް ސާބިތުވެ ހުކުމް ތަންފީޒު ކުރަމުންދާ ގައިދީން ބައިތިއްބާ އާންމު ޖަލުތަކާ ވަކިން، ތަފާތު އުސޫލުތަކަކުން ހިންގާ ތަނެކެވެ.
ސަރުކާރުން މިފަދަ ނިންމުމެއް ނިންމާފައިވަނީ ޝަރީއަތް ނިމެންދެން ބަންދުކުރެވޭ މީހުންނަށް ގާނޫނީ ގޮތުން ލިބިދޭންޖެހޭ ރައްކާތެރިކަން އެންމެ އެކަށީގެންވާ ގޮތެއްގައި ފޯރުކޮށްދިނުމުގެ މަގުސަދުގައެވެ. މިއީ ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ސަރުކާރުން ޖަލުތަކުގެ ހިންގުން އިސްލާހުކޮށް، ހަރުދަނާކުރުމަށް ކުރަމުންދާ މަސައްކަތުގެ ތެރެއިން އެޅުނު މުހިންމު ފިޔަވަޅެކެވެ.
