ފަތުރުވެރިކަމުގެ އޮފް ސީޒަނާ ދިމާކޮށް ބޭންކުތަކަށް ދޫކުރާ ބޭރު ފައިސާގެ މިންވަރު މޯލްޑިވްސް މަނިޓަރީ އޮޓޯރިޓީ (އެމްއެމްއޭ) އިން އިތުރުކޮށްފިއެވެ.
އެމްއެމްއޭއިން ހާމަކުރި ގޮތުގައި، މިއަދުން ފެށިގެން ކުރިއަށް އޮތް ތިން މަސްދުވަހުގެ ނިޔަލަށް ބޭންކުތަކަށް ވިއްކާ ޑޮލަރުގެ މިންވަރު، މީގެ ކުރިއާ އަޅާބަލާއިރު 25 އިންސައްތަ އިތުރުވާނެއެވެ. މި ނިންމުމަކީ ފަތުރުވެރިކަމުގެ ދާއިރާއިން ލިބޭ ބޭރު ފައިސާގެ މިންވަރު މަދުވާ ދުވަސްވަރެއްގައި، ރާއްޖޭން ބޭރަށް ފޮނުވަންޖެހޭ ފައިސާގެ ޑިމާންޑް އެއްވަރެއްގައި ހުރުމުގެ ސަބަބުން ކުރިމަތިވާ ގޮންޖެހުންތަކަށް ހައްލެއް ހޯދައިދިނުމުގެ މަގުސަދުގައި އެޅި ފިޔަވަޅެކެވެ.
މީގެ އިތުރުން، ބޭންކިންގ ނިޒާމުގެ ތެރޭގައި ހުރި ބޭރު ފައިސާގެ ދަތިކަން ކުޑަކޮށް، ޒަރޫރީ ބޭނުންތަކަށް ބޭނުންވާ ޑޮލަރު ފަސޭހައިން ލިބޭނެ އިންތިޒާމު ހަމަޖެއްސުމަކީ ވެސް އަލަށް ގެނައި ބަދަލުގެ މުހިންމު ބޭނުމެކެވެ. އެމްއެމްއޭއިން ފާހަގަކޮށްފައިވާ ގޮތުގައި، މިގޮތަށް ޑޮލަރު ދޫކުރާ މިންވަރު އިތުރުކުރުމުން އޮފް ސީޒަނުގައި ދިމާވާ ބޭރު ފައިސާގެ ތާށިކަމަށް ލުޔެއް ލިބި، ކަސްޓަމަރުންނަށް ބޭންކުތަކުން ފޯރުކޮށްދޭ ހިދުމަތްތައް މިހާރަށްވުރެ ބޮޑަށް ހަރުދަނާވެގެންދާނެއެވެ.
2026 ވަނަ އަހަރުގެ ފުރަތަމަ ފަސް މަސްދުވަހުގެ ތެރޭގައި، އެމްއެމްއޭއިން ބޭންކުތައް މެދުވެރިކޮށް ވިޔަފާރިތަކަށާއި އާންމުންނަށް ދޫކުރި ބޭރު ފައިސާގެ މިންވަރު، 2025 ވަނަ އަހަރުގެ އެ މުއްދަތާ އަޅާބަލާއިރު 72 އިންސައްތަ ވަނީ އިތުރުވެފައެވެ. އެމްއެމްއޭއިން ހާމަކޮށްފައިވާ ގޮތުގައި، ބޭރު ފައިސާގެ ބޭނުން އެންމެ ބޮޑަށް އިތުރުވެފައިވަނީ ތައުލީމާއި ބޭސްފަރުވާއަށް ރާއްޖެއިން ބޭރަށް ކުރާ ދަތުރުތަކަށެވެ.
އެމްއެމްއޭގެ ތަފާސްހިސާބުތަކަށް ބަލާއިރު، މި އަހަރުގެ ފުރަތަމަ ފަސް މަސްދުވަހު ތައުލީމީ އަދި ސިއްހީ ބޭނުންތަކަށް ބޭންކުތަކުން ވިއްކި ބޭރު ފައިސާގެ މިންވަރު ވަނީ ވޭތުވެދިޔަ އަހަރާ އަޅާބަލާއިރު 78 އިންސައްތަ އިތުރުވެފައެވެ. މީގެ އިތުރުން، ކާޑުގެ ބާވަތްތަކާއި، ތެލާއި، ބޭހާއި އަދި ސިއްހީ ދާއިރާއަށް ބޭނުންވާ އާލާތްތައް ރާއްޖެއަށް އެތެރެކުރުމަށްޓަކައި އެމްއެމްއޭއިން ދޫކުރި ބޭރު ފައިސާގެ އަދަދު ވެސް ވަނީ މިދިޔަ އަހަރުގެ ފުރަތަމަ ފަސް މަސްދުވަހާ އަޅާބަލާއިރު 30 އިންސައްތަ އިތުރުވެފައެވެ.
