ފަހަތުން އަރައި އުޒްބަކިސްތާން 3-1 އިން ބަލިކޮށް، ޑީއާރު ކޮންގޯއިން 2026 ވަނަ އަހަރުގެ ފީފާ ވޯލްޑް ކަޕްގެ ގަދަ 32 ގެ ބުރުން ޖާގަ ހޯދައިފިއެވެ. މިއީ އެ ޤައުމުގެ ފުޓްބޯޅަ ތާރީޚުގައި ވޯލްޑް ކަޕްގެ މުބާރާތަކުން ހޯދި ފުރަތަމަ މޮޅެވެ.
އެމެރިކާގެ އެޓްލާންޓާ ސްޓޭޑިއަމްގައި ކުޅުނު މި މެޗު ފެށިގެން 10 ވަނަ މިނެޓުގައި އުޒްބަކިސްތާނުގެ އެލްޑޯ ޝޮމުރޮޑޯވް ވަނީ ލަނޑެއް ޖަހައި އެ ޤައުމަށް ކުރިހޯދައިދީފައެވެ. މިއީ ވޯލްޑް ކަޕް ތާރީޚުގައި އުޒްބަކިސްތާނުން މެޗެއްގެ ކުރިހޯދި ފުރަތަމަ ފަހަރެވެ. ފުރަތަމަ ހާފު ނިމުނުއިރު ޑީއާރު ކޮންގޯ އޮތީ 1-0 އިން ފަހަތުގައެވެ.
ނަމަވެސް، ދެވަނަ ހާފުގައި ކޮންގޯއިން ވަނީ ކުޅުން ރަނގަޅުކޮށް މެޗުގެ އޮއިވަރު ބަދަލުކޮށްލާފައެވެ. މެޗުގެ 68 ވަނަ މިނެޓުގައި ލިބުނު ޕެނަލްޓީއަކުން ޔޯން ވިސާ ވަނީ ލަނޑެއް ޖަހައި ނަތީޖާ އެއްވަރުކޮށްދީފައެވެ. އޭގެ 12 މިނެޓު ފަހުން ފިސްޓަން މަޔޭލޭ ވަނީ ކޮންގޯއަށް ފުރަތަމަ ފަހަރަށް މެޗުގެ ކުރިހޯދައިދީފައެވެ. އަދި މެޗުގެ އިތުރު ވަގުތުގެ ތެރޭގައި ވިސާ ވަނީ އޭނާގެ ދެވަނަ ލަނޑު ޖަހައި ކޮންގޯއަށް މޮޅު ކަށަވަރުކޮށްދީފައެވެ.
މި މޮޅާއެކު ޑީއާރު ކޮންގޯ ވެފައިވަނީ ވޯލްޑް ކަޕްގެ ގްރޫޕް ސްޓޭޖް ފަހަނައަޅައި ދިޔަ އެފްރިކާގެ 11 ވަނަ ގައުމަށެވެ. އަދި މިއީ 52 އަހަރުގެ މެދުކެނޑުމަކަށްފަހު އެ ގައުމުން ވޯލްޑް ކަޕްގައި ވާދަކުރި ފުރަތަމަ ފަހަރެވެ.
މި މެޗުގައި ވިސާ ދެއްކި މޮޅު ކުޅުމާއެކު، އޭނާ މިހާރު ވަނީ މި މުބާރާތުގައި އެފްރިކާގެ ކުޅުންތެރިއަކު އެންމެ ގިނަ ލަނޑު ޖެހި ރެކޯޑާ އަރާ ހަމަކޮށްފައެވެ. މީގެ އިތުރުން، އުމުރުން 21 އަހަރުގެ ނޯއާ ސަޑީކީ ވަނީ ޑީއާރު ކޮންގޯގެ ތާރީޚުގައި ވޯލްޑް ކަޕް މެޗެއް ފެށި އެންމެ ޒުވާން ކުޅުންތެރިޔާގެ ޝަރަފު ހޯދާފައެވެ.
މި ކާމިޔާބީއާއެކު ގްރޫޕް ކޭގެ ތިންވަނަ ޓީމުގެ ގޮތުގައި ކޮންގޯ ދެވަނަ ބުރަށް ދަތުރުކުރިއިރު، ގަދަ 32 ގެ ބުރުގައި އެ ގައުމު ބައްދަލުކުރަން ޖެހޭނީ ވަރުގަދަ އިންގްލެންޑާއެވެ.
