ބީއެމްއެލް އެފޯޑަބަލް ހައުސިންގ މަޝްރޫއުގެ ދަށުން ތަރައްގީކުރުމަށް ހަމަޖެހިފައިވާ 3،260 ހައުސިންގ ޔުނިޓަށް 710 ހައުސިންގ ޔުނިޓް އިތުރުކުރަން ނިންމާފައިވާ ކަމަށް ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) ވިދާޅުވެއްޖެއެވެ.
“ޕްރެސަރ ވިތު ދަ ސްޕޮކްސް“ ގެ ނަމުގައި ބޭއްވި ނޫސްވެރިންގެ ބައްދަލުވުމުގައި ނޫސްވެރިއަކު ކުރި ސުވާލަކަށް ޖަވާބުދެއްވަމުން މުންދު ވިދާޅުވީ، ބީއެމްއެެލްއާ ހަވާލުކޮށްގެން މާލެ ސަރަހައްދުގައި ސަރުކާރުން ކުރިއަށްގެންދާ ބޯހިޔާވަހިކަމުގެ މަޝްރޫއުތަކުގެ ތެރެއިން އެންމެ މަޝްރޫއެއް ފިޔަވައި ދެން ހުރި ހުރިހާ މަޝްރޫއެއްގެ ޑިޒައިންގެ މަސައްކަތްތައް އެއްކޮށް ނިންމައި އަމަލީ ފެށުމަށް ތައްޔާރުވެފައިވާ ކަމަށެވެ.
މުންދު ހާމަކުރެއްވި ގޮތުގައި ބީއެމްއެލްގެ އެފޯޑަބަލް ހައުސިންގ މަޝްރޫއުގެ ދަށުން ހުޅުމާލޭގެ ދެ ފިޔަވައްސާއި ވިލިމާލޭގައި ހައުސިންގ ޔުނިޓްތައް ތަރައްގީކުރުމަށް ސަރުކާރުން ވަނީ ނިންމައިފައެވެ. އެއީ ހުޅުމާލޭގެ ދެ ފިޔަވަހީގައި ޖުމުލަ 2،700 ހައުސިންގ ޔުނިޓާއި ވިލިމާލޭގައި 300 ހައުސިންގ ޔުނިޓެވެ.
”ބީއެމްއެލްގެ ގާބިލުކަން އެބަހުރި އަދި މިއަށްވުރެ އިތުރުކުރަން، މިހާރު މި ހަވާލުކުރެވުނީ 3،260 ތަރައްގީކުރަން، އަދި އިތުރު 710 ޔުނިޓް ތަރައްގީކުރަން އެބަ ހަވާލުކުރެވޭ ބޭންކާ، އޭގެ އެއްބަސްވުންތަކުގައި ސޮއިކުރުމުގެ މަސައްކަތްދަނީ ކުރިއަށް، އެހެންވީމަ ނިމޭއިރު ގާތްގަނޑަކަށް 4،000 އެއްހައި ހައުސިންގ ޔުނިޓް ތަރައްގީކުރެވޭނެ،“ – މުންދު ވިދާޅުވިއެވެ.
ބީއެމްއެލްއިން ތަރައްގީކުރުމަށް ނިންމާފައިވާ ހައުސިންގ ޔުނިޓްތަކަކީ 60،000 ރުފިޔާއިން ދަށުން އާމްދަނީ ލިބޭ ފަރާތްތަކަށް ހާއްސަކޮށްގެން ކަނޑައަޅާފައިވާ ޔުނިޓްތަކެކެވެ. މިއީ ”ރެންޓް ޓު އޯން“ މޮޑެލްގެ ދަށުން ދޫކުރާ ޔުނިޓްތަކެއް ކަމަށް ބީއެމްއެލްއިން ވަނީ ބުނެފައެވެ. ބީއެމްއެލްއިން ބުނީ، މި ހުރިހާ ފްލެޓުތަކެއްގެ މަސައްކަތް 2028 ވަނަ އަހަރުގެ މެދު ތެރޭގައި އެއްކޮށް ނިންމާލެވޭނެ ކަމަށެވެ.
