ސިއާލްކޯޓް، ޕާކިސްތާން: އުމުރުން 55 އަހަރުގެ އަންސަރަކީ ޕާކިސްތާނުގެ ސިއާލްކޯޓުގައި ފުޓްބޯޅަ ފަހާ މަރުކަޒެއްގައި މަސައްކަތްކުރާ އެންމެ ތަޖުރިބާކާރު އެކަކެވެ.
ޕާކިސްތާނުގެ އިރުއުތުރުގައި އޮންނަ ސިއާލްކޯޓަކީ ދުނިޔޭގެ ފުޓްބޯޅަ އުފެއްދުމުގެ މައި ހަބެވެ. 1982 ވަނަ އަހަރުން ފެށިގެން ވޯލްޑް ކަޕްގައި ބޭނުންކުރާ ރަސްމީ ބޯޅަތައް މި ސިޓީގައި އުފައްދަމުން އަންނައިރު، 2014 ވަނަ އަހަރުން ފެށިގެން މިހާތަނަށް ކުޅުނު ހުރިހާ ވޯލްޑް ކަޕެއްގެ ރަސްމީ ބޯޅައަކީ މި ސިޓީގެ އުފެއްދުމެކެވެ.
އަންސަރު މަސައްކަތްކުރާ މަރުކަޒުގައި އުމުރުން 16 އަހަރާއި 55 އަހަރާ ދެމެދުގެ 25 އެއްހައި އަންހެނުން މަސައްކަތް ކުރެއެވެ. ”މި މަސައްކަތް ދަސްކުރަން މާ ގިނަ ދުވަހެއް ނުނަގާ. ބައެއް ކުދިން ދެ ހަފުތާއިން، އަނެއްބައި ކުދިން މަހެއްހާ ދުވަހުން ދަސްކޮށްލާ،“ ވޭތުވެދިޔަ 35 އަހަރު މި މަސައްކަތުގައި ހޭދަކޮށްފައިވާ އަންސަރު މީޑިއާތަކަށް ކިޔައިދިނެވެ. އޭނާ ބުނި ގޮތުގައި ފިނި މޫސުމުގައި ރޯނު ދަމާއިރު އަތް ކަފައިގެން ދިއުމަކީ އާންމު ކަމެކެވެ.
މި ސިޓީގެ ފުޓްބޯޅަ ސިނާޢަތަކީ އެތައް އާއިލާއެއް ފަގީރުކަމުން ސަލާމަތްކޮށްދިން ވަސީލަތެކެވެ. ނަމަވެސް، 1996 ވަނަ އަހަރު ކުޑަކުދިން ލައްވައި މަސައްކަތް ކުރުވާ ކަމުގެ ތުހުމަތާ އެކު މި ސިނާޢަތަށް ބޮޑެތި ގޮންޖެހުންތަކެއް ކުރިމަތިވިއެވެ. އޭގެ ފަހުން ’އިންޑިޕެންޑެންޓް މޮނީޓަރިންގ އެސޯސިއޭޝަން ފޯ ޗައިލްޑް ލޭބަރ‘ (IMAC) އުފެދި، މިހާރު ހުރިހާ މަރުކަޒުތަކެއް ގަވާއިދުން މޮނީޓަރު ކުރެވެއެވެ.
ސިއާލްކޯޓުގެ އެހެން ހިސާބެއްގައި ދިރިއުޅޭ އުމުރުން 50 އަހަރުގެ އަބީދާ ޙުސައިން އާއި އޭނާގެ ހަތަރު އަންހެން ދަރިން މަސައްކަތް ކުރަނީ ގޭގައެވެ. ”މިއީ ގޭގައި ތިބެގެން އާމްދަނީ ހޯދަން އެންމެ ރަނގަޅު ގޮތް،“ އަބީދާގެ ދަރިފުޅު ސަދަފް ބުންޏެވެ. މި މަސައްކަތުން ލިބޭ އާމްދަނީން އެކުދިންގެ ތަޢުލީމީ ޚަރަދުތަކާއި ކައިވެނީގެ ޚަރަދުތައްވެސް ވަނީ ބަލަހައްޓާފައެވެ.
އަންވަރު ޚަވާޖާ އިންޑަސްޓްރީޒްގެ ކުރަމް ޚަވާޖާ ފާހަގަކުރި ގޮތުގައި، މީގެ 5-6 އަހަރު ކުރިން އުފެއްދުންތަކުގެ 90 އިންސައްތައަކީ އަތުން ފަހާ ބޯޅައެވެ. ނަމަވެސް މިހާރު މެޝިނުން ފަހާ ބޯޅަ އިތުރުވުމާ އެކު، އަތުން ފަހާ ބޯޅައިގެ ނިސްބަތް ވަނީ 20 އިންސައްތައަށް ދަށްވެފައެވެ. މެޝިނަކުން ދުވާލަކު 60 ބޯޅަ ފެހޭއިރު، އަތުން ފެހެނީ އެންމެ 5 ބޯޅައެވެ.
ކުރިމަތީގައި އޮތް ގޮންޖެހުންތަކާ އެކުވެސް، ސިއާލްކޯޓުގެ މި ހީވާގި އަންހެނުން ދެކެނީ ފުޓްބޯޅައަކީ އެމީހުންގެ ދިރިއުޅުމުގެ އުފާވެރިކަމާ ގުޅިފައިވާ މުހިންމު މަސައްކަތެއްގެ ގޮތުގައެވެ. ދުނިޔޭގެ އެކި ކަންކޮޅުތަކުގައި ކުޅޭ ފުޓްބޯޅަތަކުގެ ފަހަތުގައި ވަނީ މި އަތްތަކުގެ ބުރަ މަސައްކަތެވެ.
