ސަރުކާރުގެ އިޤްތިޞާދީ އިސްލާހީ އެޖެންޑާގެ ދަށުން ސިޔާސީ މަޤާމުތަކުގައި ތިބި މުވައްޒަފުންގެ އަދަދު މަދުކުރުމަށް ކުރަމުންދާ މަސައްކަތްތައް މިހާރު ފިޔަވަޅު އެޅުމުގެ މަރުހަލާއަށް ބަދަލުވެފައިވާކަމަށް ރައީސުލްޖުމްހޫރިއްޔާގެ އޮފީހުގެ ތަރުޖަމާނު ވިދާޅުވެއްޖެއެވެ.
މި ފިޔަވަޅުތަކަކީ ދައުލަތުގެ ޚަރަދުތައް ކުޑަކޮށް، އިދާރީ ހިންގުން ހަރުދަނާކުރުމަށް ސަރުކާރުން ކަނޑައަޅާފައިވާ މުހިންމު ސިޔާސަތެއްގެ ބައެކެވެ.
ރައީސުލްޖުމްހޫރިއްޔާގެ އޮފީހުގެ ތަރުޖަމާނު މުޙައްމަދު ހުސައިން ޝަރީފު ވިދާޅުވި ގޮތުގައި، ސިޔާސީ މުވައްޒަފުންގެ މަސައްކަތުގެ ފެންވަރު ވަޒަންކުރުމުގެ މަރުހަލާ މިހާރު ވަނީ ނިމުމަކާ ހަމައަށް އައިސްފައެވެ. މި އިވެލުއޭޓް ކުރުމުގެ ބޭނުމަކީ ކުންފުނިތަކާއި ވުޒާރާތަކަށް ބޭނުންވާ މިންވަރަށް މުވައްޒަފުން ތިބިތޯ ބަލައި، އިތުރުވެފައިވާ މަޤާމުތައް މަދުކުރުމެވެ. މި މަސައްކަތުގެ ތެރެއިން ބައެއް ތަންތަނުގެ ރިޕޯޓުތައް މިހާރު ނިމިފައިވާއިރު، ދެން އޮތީ އެ މައުލޫމާތުތަކުގެ އަލީގައި ފިޔަވަޅު އެޅުމުގެ މަރުހަލާއެވެ. ސަރުކާރުން މިހާރު މަސައްކަތް ކުރަމުން ދަނީ ސިޔާސީ މަޤާމުތަކުގެ އަދަދު ކަނޑައެޅިފައިވާ ވަކި މިންވަރަކަށް ތިރިކުރުމަށް ކަމަށް މުންދު ވިދާޅުވިއެވެ.
”އިވެލުއޭޓްކުރަނީ ހަގީގަތުގައި ނީޑެޑް ކެޕޭސިޓީ ގެނައުމުގެ ނިއަތުގައި. މިސާލަކަށް އެސްއޯއީތައް ވެއްޖެއްޔާ އޮންނާނެ ވަން ތާރޑްކަމަށްބަލާފައި މަދުކުރުން ނުވަތަ އުނިކުރަން. ސަރުކާރުގެ ސިޔާސީ މަޤާމުތައް ވަކި އަދަދަކަށް އަޅުގަނޑުމެން ތިރިކުރެވޭތޯ މަސައްކަތް ކުރަނީ. ދެން އެބައި އަންނާނީ. ދެން އަންނާނީ މައުލޫމާތުގެ އަލީގައި ތަންފީޒީ މަސައްކަތް ކުރުން.“ ތަރުޖަމާނު ވިދާޅުވިއެވެ.
ސަރުކާރުން އިޤްތިޞާދީ އިސްލާހީ އެޖެންޑާގެ ދަށުން ޚަރަދު ކުޑަކުރުމަށް ގިނަ ފިޔަވަޅުތަކެއް އަންނަނީ އަޅަމުންނެވެ. އެގޮތުން، 2024 ވަނަ އަހަރުގެ އޮކްޓޫބަރު މަހުގެ ނިޔަލަށް 248 ސިޔާސީ މުވައްޒަފުން ވަނީ މަދުކޮށްފައެވެ. އަދި ސިޔާސީ މުވައްޒަފުންގެ ޕާފޯމަންސް ބެލުމުގެ ނިޒާމެއް ޤާއިމުކުރުމަށް ކެބިނެޓުން ނިންމާފައިވާއިރު، މި ނިޒާމުގެ ތެރެއިން ވަޒީފާގެ ފެންވަރު ދަށް ފަރާތްތައް ވަކިކުރުމުގެ ފުރުސަތު ސަރުކާރަށް ލިބިގެންދާނެއެވެ.
ރައީސުލްޖުމްހޫރިއްޔާ ވިދާޅުވެފައިވާ ގޮތުގައި، މި މަސައްކަތުގެ ނަތީޖާއެއްގެ ގޮތުން ވުޒާރާތަކާއި ދައުލަތުގެ ކުންފުނިތަކުގައި ތިބި ސިޔާސީ މުވައްޒަފުންގެ އަދަދު ކުރިއަށް އޮތް ތަނުގައި މަދުވެގެންދާނެއެވެ.
ސަރުކާރުގެ ކުންފުނިތަކުން މުވައްޒަފުން ކަނޑަމުންދާ ކަމަށް ބުނެ އިދިކޮޅު ފަރާތްތަކުން ކުރަމުންދާ ތުހުމަތުތަކާ ގުޅޭގޮތުން ރައީސް ވަނީ މީގެ ކުރިނ ް ރައްދު ދެއްވާފައެވެ. އެމަނިކުފާނު ވިދާޅުވި ގޮތުގައި ސިޔާސީ ވާހަކަތަކަށް ވުރެ ބޮޑަށް އިސްކަންދެއްވަނީ ޤައުމުގެ މަސްލަހަތު ހިމެނޭ ގޮތަށް ކަންކަން ބައްޓަން ކުރުމަށް ކަމަށެވެ. ޚާއްޞަކޮށް، ފެނަކަ ފަދަ ކުންފުނިތަކުގައި މީގެ ކުރިން ބޭކާރު ގޮތުގައި މުވައްޒަފުން ނަގާފައި ތިބިކަން ފާހަގަކުރައްވައި ރައީސް ވިދާޅުވެފައިވަނީ އޭގެ ސަބަބުން ރަށްރަށުގެ މަސްވެރިކަން ފަދަ އުފެއްދުންތެރި ދާއިރާތަކުން މީހުން ދުރަށް ގޮސްފައިވާ ކަމަށެވެ.
