މި އަހަރުގެ ފިތުރު އީދު ދުވަހަކީ ބުދަ ދުވަސް ކަމަށް ސައުދީ އަރަބިއްޔާއިން އިއުލާނުކޮށްފިއެވެ.
ސައުދީގެ އެކި ހިސާބުތަކުގައި ހަނދު ބެލުމުގެ ހަރަކާތްތައް ކުރިއަށް ގެންގޮސްފައިވާއިރު، ހަރަމައިން އިން ބުނެފައި ވަނީ އެ ގައުމުގެ އެއްވެސް ހިސާބަކަށް މިއަދު އިރުއޮއްސުނު ވަގުތު ޝައްވާލު މަހުގެ ހަނދު ފެނިފައި ނުވާ ކަމަށެވެ.
ސައުދީއަށް ރަމަޟާން މަސް ފެށިފައި ވަނީ މާރޗް މަހުގެ 10 ވަނަ ދުވަހުއެވެ. އެހެންކަމުން މާދަމާ ވާނީ އެ ގައުމަށް މި ރަމަޟާން މަހުގެ 30 ވަނަ ދުވަސް ކަމުގައެވެ.
ބުދަ ދުވަހަކީ އީދު ދުވަސް ކަމަށް ސައުދީން އިއުލާނުކޮށްފައިވާއިރު ފަލަސްތީން، މިސްރު، ކުވެއިތު، ޔޫއޭއީ، ގަތަރު، ބަހްރެއިން، ލުބުނާން، ޔަމަނު، އިރާގު، ސީރިއާގެ އިތުރުން އޮސްޓްރޭލިއާއިން ވެސް ވަނީ އެ ގައުމުތަކަށް ފިތުރު އީދު ދުވަހަކީ ބުދަ ދުވަސް ކަމަށް ކަނޑައަޅާފައެވެ.
