ވާދަވެރި ޕާޓީއެއް ޒިންމާދާރުވުމަކީ ސަރުކާރަކުން ރައްޔިތުންގެ ލާބަޔާއި މަންފާއަށް ކުރާ ރަނގަޅު ކަންކަން ބަލައިގަންނަން ކެރުން ކަމަށް ސަރުކާރުގެ އިސް ތަރުޖަމާނު މުޙައްމަދު ޙުސައިން ޝަރީފް (މުންދު) މިއަދު ވިދާޅުވެއްޖެއެވެ.
ރާއްޖޭގައި މި ވަގުތު ޒިންމާދާރު ސިޔާސީ ޕާޓީއެއް ނެތް ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވުމާ ގުޅިގެން ނޫސްވެރިޔަކު ކުރި ސުވާލަކަށް ޖަވާބުދެއްވަމުން މުންދު ވިދާޅުވީ، ސިޔާސީ ޕާޓީއެއްގެ މަގުސަދަކީ ހަމައެކަނި އިންތިހާބުތަކުގައި ވާދަކޮށް ނަތީޖާ ނެރުން ނޫން ކަމަށެވެ. އެހެނެއްކަމަކު ސިޔާސީ ޕާޓީތަކަކީ ދައުލަތުން ފައިސާދީގެން ހިންގާ، ގައުމީ ބޮޑެތި ޒިންމާތަކެއް އަދާކުރަންޖެހޭ ބައެއް ކަމަށް މުންދު ވިދާޅުވިއެވެ.
މުންދު ވިދާޅުވި ގޮތުގައި، ރައީސް އިޝާރާތްކުރެއްވީ ސަރުކާރުން ކުރަމުން އަންނަ ހުރިހާ ކަމަކަށް އިދިކޮޅު ފަރާތްތަކުން ދެކޮޅު ހަދާތީ އެކަމަށެވެ. ސަރުކާރުން ކުރާ ކަންކަމަށް ފާޑުކިޔަންވާނީ އޮއްޓަރުހުރި ގޮތެއްގައި ނަމަވެސް، ސަރުކާރުން ކުރާ ހުރިހާ ކަމަކަށް ދެކޮޅު ހަދަނީ ކީއްވެގެންކަން އިދިކޮޅަށް ސާފުކޮށް ނުދެވޭކަން ފާހަގަކުރައްވައި މުންދު ވިދާޅުވީ، އެ ފަރާތްތަކުން ހަމައެކަނި ކުރާ ކަމަކީ ދެކޮޅުވެރިކަން ދެއްކުން ކަމަށެވެ.
މުންދު ވިދާޅުވީ، އެމްޑީޕީއަކީ ދެ ފަހަރެއްގެ ވެރިކަން ކޮށްފައިވާ ޕާޓީއަކަށްވާއިރު، ރައްޔިތުންގެ ލާބަޔާއި މަންފާއަށް ސަރުކާރުން ކުރާ ކަންކަމުގައި އެއްބަސްވެވޭ އުސޫލުތަކެއް އޮންނަންޖެހޭނެ ކަމަށާއި ޒިންމާދާރު ޑިމޮކްރަސީތަކުގައި ސިޔާސީ ކަންކަމާއި ސިޔާސީ ކަންކަން ނުހިމެނޭ ގައުމީ ކަންކަން ހުންނާނެ ކަމަށެވެ. އެގޮތުން، ނިމިދިޔަ އެމްޑީޕީ ސަރުކާރުގައި ކޮށްފައިވާ ރަނގަޅު ކަންކަމަށް އޭރުގެ އިދިކޮޅުގައި ތިބި ފަރާތްތަކުން މަރުހަބާ ކިޔާފައިވާ ކަމަށާއި ނަމަވެސް، މިހާރު ފެނިގެންދަނީ ސަރުކާރުން ކުރާ ރަނގަޅު ކަންކަމަށް މަރުހަބާ ކިޔުމަކީ މަނާކަމެއްގެ ގޮތުގައި ދެކޭ މަންޒަރު ކަމަށް މުންދު ވިދާޅުވިއެވެ.
މުންދު އިތުރަށް ވިދާޅުވީ ރައީސް މުޢިއްޒު ބޭނުންފުޅުވަނީ އިދިކޮޅު ޕާޓީތަކުން ސަރުކާރުން ކުރާ ހުރިހާ ކަމަކަށް ދެކޮޅުހެދުމުގެ ބަދަލުގައި، ގައުމުގެ މަސްލަހަތަށްޓަކައި ޒިންމާދާރުކަމާއެކު މަސައްކަތްކުރާނެ ސިޔާސީ މާހައުލެއް އޮތުން ކަމަށެވެ.
