އެމެރިކާގެ ސިއެޓްލްގައި މިހާރު ކުރިއަށްދާ 2026 ވަނަ އަހަރުގެ ފީފާ ވޯލްޑް ކަޕްގެ ގްރޫޕް ’ޖީ‘ ގައި އިރާނާއި މިސްރު ބައްދަލުކުރި ފޯރިގަދަ މެޗު 1-1 އިން އެއްވަރުވެގެން ނިމިއްޖެއެވެ.
މި މެޗު ފެށިގެން ފަސްވަނަ މިނެޓުގައި މިސްރުގެ މަޙްމޫދު ސާބިރު ވަނީ ލަނޑެއް ޖަހައި އެޓީމަށް ކުރިހޯދައިދީފައެވެ. ނަމަވެސް، މެޗުގެ 14 ވަނަ މިނެޓުގައި އިރާނުގެ ރާމިން ރެޒަލިއަން ވަނީ ލަނޑެއް ޖަހައި ނަތީޖާ އެއްވަރުކޮށްފައެވެ. މި މެޗުގައި އިރާނަށް ނަތީޖާ ބަދަލުކޮށްލުމަށް ރަނގަޅު ފުރުސަތުތަކެއް ލިބުނެވެ. އެގޮތުން މެޗުގެ ކުރީކޮޅު އިރާނަށް ލިބުނު ޕެނަލްޓީއެއް އެޓީމުގެ ކެޕްޓަން މަހްދީ ތަރޭމީ ފޮނުވާލުމުން މިސްރުގެ ގޯލްކީޕަރު ވަނީ އެ ބޯޅަ ދިފާއުކޮށްފައެވެ.
މެޗުގެ ފަހު ވަގުތުކޮޅުގެ ތެރޭގައި އިރާނުގެ ޝުޖާއު ޚަލީލްޒާދޭ ލަނޑެއް ޖެހި ނަމަވެސް، ވީއޭއާރް ބެލުމަށްފަހު ރެފްރީ ނިންމީ އެއީ އޮފްސައިޑް ލަނޑެއް ކަމަށެވެ. މީގެ އިތުރުން މެޗުގެ ފަހު ސިކުންތުކޮޅުގައި އިރާނުން ފޮނުވާލި ހަމަލާއެއް ގޯލުގެ ހުރަސް ދަނޑީގައި ޖެހި ވަނީ ބޭރުވެފައެވެ.
މި ނަތީޖާއާއެކު މިސްރު ވަނީ ގްރޫޕްގެ ދެވަނަ ޓީމުގެ ގޮތުގައި މުބާރާތުގެ ގަދަ 32 ގެ ބުރަށް ދަތުރުކޮށްފައެވެ. މިއީ ވޯލްޑް ކަޕްގެ ތާރީޚުގައި 92 އަހަރަށްފަހު މިސްރު މުބާރާތުގެ ނޮކައުޓް ބުރަށް ދަތުރުކުރި ފުރަތަމަ ފަހަރެވެ. އިރާން މިވަގުތު ގްރޫޕްގެ ތިންވަނައިގައި އޮތްއިރު، އެޓީމަށް ދެން އޮތް ބުރަށް ދެވޭނީ ތިންވަނަ ހޯދާ އެންމެ މޮޅު އަށް ޓީމުގެ ތެރޭގައި ހިމެނިގެންނެވެ. މި ގްރޫޕްގެ އެއްވަނަ ހޯދީ ބެލްޖިއަމްއެވެ.
މެޗުގެ ފޯރިގަދަވެފައިވަނިކޮށް، ދަނޑުގެ ތެރެއަށް ސަޕޯޓަރަކު ވަދެގެން ސެކިއުރިޓީން ވަނީ އޭނާ ހިފަހައްޓާފައެވެ. އަދި މިސްރާއި އިރާނުގެ ސަޕޯޓަރުން ފަލަސްތީނުގެ ދިދަ ހިފައިގެން ތިބެ ”ފްރީ ޕަލަސްޓީން“ އޭ ބުނެ އަޑުއުފުލާފައިވާކަންވެސް ފާހަގަކުރެވެއެވެ. މީގެ ތެރެއިން މިސްރުގެ ސަޕޯޓަރަކު ބުނީ، ފަލަސްތީނުގެ ރައްޔިތުންނަށް ދެމުންދާ އަނިޔާތަކާ ގުޅިގެން ހިމޭނުން ހުންނަން އުނދަގޫވާ ކަމަށެވެ.
މި މެޗަށްފަހު އިރާނުގެ ކުޅުންތެރިން ތިބީ ވަރަށް ބޮޑަށް މާޔޫސްވެފައެވެ. އެޓީމަށް ދެން އޮތް ބުރަށް ދެވޭނެކަން ކަށަވަރުވާނީ އާދީއްތަ ދުވަހު ކުޅޭ އެހެން ގްރޫޕްތަކުގެ މެޗުތަކުގެ ނަތީޖާ ނުކުންނަ ގޮތަކުންނެވެ.
