ޒުވާން ހަތީބުން ތަމްރީނުކުރުމުގެ ހަތަރު ވަނަ ޕްރޮގްރާމު ފުރިހަމަކުރި ބައިވެރިންނަށް ސަނަދު ހަވާލުކޮށްފިއެވެ.
މިކަމާ ގުޅިގެން އިސްލާމިކް މިނިސްޓްރީން ބުނީ، މި ބުރުގައި ރާއްޖޭގެ އެކި ކަންކޮޅުތަކުން ޖުމުލަ 82 ފަރާތަކުން ބައިވެރިވެފައިވާ ކަމަށެވެ. ޒުވާން ހަތީބުން ތަމްރީނުކުރުމުގެ މަގުސަދަކީ ރާއްޖޭގެ ރަށްތަކަށް ދިމާވެފައިވާ ހުތުބާ ކިޔާނެ އިމާމުން ލިބުމުގައި އޮތް ދަތިކަން ފިލުވުމަށާއި، ކުރިއަށް އޮތް އިސްލާމީ ގަރުނުގައި ރާއްޖޭގައި އިސްލާމީ ޝިއާރު ފާޅުކުރާނެ ހަރުދަނާ ޖީލެއް ބިނާކުރުން ކަމަށް އިސްލާމިކް މިނިސްޓްރީން ބުނެއެވެ.
އިސްލާމިކް މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު ހާމަކުރައްވާފައިވާ ގޮތުގައި، ޒުވާން ހަތީބުން ތަމްރީނުކުރުމުގެ ޕްރޮގްރާމްގެ ދަށުން މިހާތަނަށް 600 އަށްވުރެ ގިނަ ޒުވާނުން ވަނީ ސަނަދު ހޯދައިފައެވެ. ހަމައެހެންމެ، ރާއްޖޭގެ ހާފިޒުންގެ އަދަދު މިހާރު 310 އަކަށް އަރާފައިވާ ކަމަށް ވެސް މިނިސްޓަރު ވަނީ ވިދާޅުވެފައެވެ.
ގުރްއާން ހިތު ދަސްކުރާ ޕްރޮގްރާމް ފުޅާކުރުމަށް ކްލާސްތައް އިތުރުކޮށްފައިވާއިރު، މި ވަގުތު 2،000 އަށްވުރެ ގިނަ ދަރިވަރުން ހިފްޒު ކުރަމުންދާ ކަމަށާއި، މިނިސްޓްރީގެ އަމާޒަކީ 1،000 ޒުވާން ހަތީބުން ބިނާކުރުމާއި 500 ހާފިޒުން އުފެއްދުން ކަމަށް މިނިސްޓަރު ވިދާޅުވިއެވެ.
ޒުވާން ހަތީބުން ތަމްރީނުކުރުމުގެ ޕްރޮގްރާމަކީ އަތޮޅުތެރޭގެ ރަށްރަށަށް ދިމާވެފައިވާ ހަތީބުން ލިބުން ދަތިވުމުގެ މައްސަލައަށް ހައްލެއް ހޯދުމަށާއި ޒުވާނުންނަށް މިފަދަ ފުރުސަތުތައް ފަހިކޮށްދިނުމަށް ރައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ އިސްނެންގެވުމުގެ ދަށުން އިސްލާމިކް މިނިސްޓްރީން ވަރަށް ބޮޑު އަހައްމިއްޔަތު ކަމެއްދީގެން ކުރިއަށްގެންދާ ޕްރޮގްރާމެކެވެ.
