މި ރަމަޟާން މަހު ފިތުރު ޒަކާތުގެ ގޮތުގައި ބަލައިގަނެފައިވާ ގޮވާމުގެ ބާވަތްތައް ބެހުމުގެ މަސައްކަތް ފަށާފައިވާ ކަމަށް ދިވެހިރާއްޖޭގެ ޒަކާތު ހައުސްއިން ބުނެފިއެވެ.
ޒަކާތު ހައުސްއިން ބުނީ ފިތުރު ޒަކާތުގެ ގޮތުގައި މާލެ ސިޓީން ބަލައިގަނެފައިވާ ގޮވާމުގެ ބާވަތްތަކުން ޒަކާތް ބެހުމުގެ މަސައްކަތް މިއަދު ފަށައިގެން ކުރިއަށްދާ ކަމަށެވެ. ގޮވާމުން ޒަކާތް ބެހުން ކުރިއަށް ދާނީ އަމީނިއްޔާ ސްކޫލުގެ ހޯލުގައި ކަމަށް ޒަކާތު ހައުސްއިން ބުނެއެވެ.
ޒަކާތު ހައުސްއިން ބުނެފައި ވަނީ ތަކެތި ބެހުމަށް ހަމަޖެހިފައި ވަނީ މާލެ ސިޓީގެ ފަގީރުންނާއި މިސްކީނުންގެ ދަފްތަރުގައި ރަޖިސްޓްރީވެފައިވާ ފަރާތްތަކަށް ކަމަށެވެ.
ގޮވާމުން ފިތުރު ޒަކާތް ބަހާ ގަޑިތައް:
- މިއަދު ހެނދުނު 11:00 އިން ހަވީރު 4:00 އަށް އަދި މިރޭ 8:30 އިން 10:30 އަށް
- މާދަމާ ހެނދުނު 11:00 އިން 3:30 އަށް އަދި ރޭގަނޑު 8:30 އިން 10:30 އަށް
ގޮވާމުން ފިތުރު ޒަކާތް ބަލައިގަތުން މިރޭ 8:30 އިން 10:30 އަށް ކުރިއަށް ދާނެ ކަމަށް ޒަކާތު ހައުސްއިން ބުނެއެވެ. ޒަކާތު ހައުސްއިން ބުނި ގޮތުގައި މާދަމައަކީ ރަމަޟާން މަހުގެ 30 ވަނަ ދުވަސް ކަމަށް ވާނަމަ ހެނދުނު 11:00 އިން 3:30 އަށް އަދި ރޭގަނޑު 8:30 އިން 10:30 އަށް ގޮވާން ބަލައިގަންނާނެ ކަމުގައެވެ.
ޒަކާތު ހައުސްއިން އާންމުކޮށްފައިވާ ތަފާސްހިސާބުތައް ދައްކާ ގޮތުން ރަމަޟާން މަހުގެ ފުރަތަމަ 20 ދުވަހު ފިތުރު ޒަކާތުގެ ގޮތުގައި ޖުމްލަ 4،499،433 ރުފިޔާ ވަނީ ލިބިފައެވެ.
