ކީރިތި ޤުރުއާނާ ބެހޭ ޤައުމީ މަރުކަޒުގެ ފުވައްމުލައް ސިޓީ އައުޓްރީޗް ސެންޓަރު މިއަދު ހަވީރު ރަސްމީކޮށް ހުޅުވައިފިއެވެ.
މިކަމަށްޓަކައި މިއަދު ހަވީރު އެ ސިޓީގައި ބޭއްވުނު ޚާއްސަ ރަސްމިއްޔާތެއްގައި އައުޓްރީޗު ސެންޓަރު ހުޅުވައިދެއްވީ، އިސްލާމީކަންތައްތަކާއި އައުޤާފާ ބެހޭ ވުޒާރާގެ ސްޓޭޓް މިނިސްޓަރ އަލްއުސްތާޛް ޢަބްދުﷲ ސަޢުދާން އަދި ފުވައްމުލައް ސިޓީ ކައުންސިލްގެ ޑެޕިއުޓީ މޭޔަރ މުޙައްމަދު ޟިރާރުއެވެ. މި ރަސްމިއްޔާތުގައި، ވުޒާރާގެ ބައެއް އިސްވެރިންނާއި ފުވައްމުލައް ސިޓީ ކައުންސިލްގެ އިސްވެރިންނާއި އެސިޓީގެ ބައެއް ރައްޔިތުން ބައިވެރިވެލައްވާފައިވެއެވެ.
ފުވައްމުލަކު ސިޓީގެ އިސްލާމީ މަރުކަޒު ޑިޒައިންކޮށް ނިމި، ކައުންސިލްގެ ބަހެއް ހޯދުމަށް ކޮންސެޕްޓު ފުވައްމަލު ސިޓީ ކައުންސިލަށް ފޮނުވާފައިވާ ކަންވެސް ވަޒީރު ހާމަކުރައްވާފައެވެ. އިސްލާމީ މަރުކަޒު ނިމުމުން އެތަން ބަދަލު ވާނީ ޤުރުއާނާއި ބެހޭ މަރުކަޒަށް ކަމަށާއި، މިހާރު ހުޅުވާ ޤުރުއާނާއި ބެހޭ މަރުކަޒު ބަދަލުވާނީ ވަޤުފު ބިނާއަކަށް ކަމަށެވެ. މިތަނުން ލިބޭ ފައިސާ ޚަރަދު ކުރާނީ ފުވައްމުލަކު ސިޓީގެ ދީނީ އެކި ކަންކަމަށް ކަމަށްވެސް ވަޒީރު ވިދާޅުވިއެވެ.
ފުވައްމުލައް ޤުރުއާނާއި ބެހޭ މަރުކަޒުގައި ފަސް ކުލާސްރޫމާއި، ނަމާދު ކޮޓަރިއަކާއި، ޙިފްޒު ޓެސްޓު ރޫމާއި، އޮޑިޓޯރިއަމްއަކާއި، ލައިބްރަރީއަކާއި، އޮފީސް ބަޔަކާއި، މީޓީންގ ރޫމެއް ހިމެނެއެވެ.
މުޅި ރާއްޖޭގެ ހުރިހާ ރަށެއްގައި ކީރިތި ޤުރުއާނާ ބެހޭ ޤައުމީ މަރުކަޒުގެ ގޮފިތައް ޤާއިމްކޮށް، ކީރިތި ޤުރުއާނުގެ ޢިލްމު ފެތުރުން ފުޅާ ކުރުމަކީ ރަައީސުލްޖުމުހޫރިއްޔާ ޑރ. މުޙައްމަދު މުޢިއްޒުގެ ސިޔާސަތެއްކަން ރައީސް ވަނީ ހާމަކުރައްވާފައެވެ. އަދި މިކަމުގެ މަސައްކަތް ވުޒާރާއިން މިހާރު ފަށާފައިވާއިރު، ރާއްޖޭގެ 16 ރަށެއްގައި ކީރިތި ޤުރުއާނާ ބެހޭ ޤައުމީ މަރުކަޒުގެ ގޮފިތައް ބިނާކުރުމުގެ މަސައްކަތް މިހާރު ކުރިއަށްދާކަން ފާހަގަކޮށްލެވެއެވެ.
ފުވައްމުލައް ސިޓީ ކީރިތި ޤުރުއާނާއި ބެހޭ މަރުކަޒު ރަސްމީކޮށް ހުޅުވައިދެއްވައިފި.
ފުވައްމުލައް ޤުރުއާނާއި ބެހޭ މަރުކަޒުގައި ފަސް ކުލާސްރޫމާއި، ނަމާދު ކޮޓަރިއަކާއި، ޙިފްޒު ޓެސްޓު ރޫމާއި، އޮޑިޓޯރިއަމްއަކާއި، ލައިބްރަރީއަކާއި، އޮފީސް ބަޔަކާއި، މީޓީންގ ރޫމެއް ހިމެނޭނެ. pic.twitter.com/1G0F5ZCRLa
— Ministry of Islamic Affairs & Endowments (@MVIaffairs) June 26, 2026
މި ސެންޓަރާއިގުޅޭގޮތުން އިސްލާމިކް މިނިސްޓަރ ޑރ. ޝަހީމް ވިދާޅުބީ ފުވައްމުލައް ސިޓީގައި ޤުރްއާން ހިފްޒުކުރުމުގެ ކްލާސްތައް އިތުރުކުރެވޭނެ ކަމަށާއި، އަދި އެ ކަމަށް ބޭނުންވާ މުދައްރިސުންވެސް އިތުރުކުރެވޭނެ ކަމަށެވެ. މިއާއިއެކު ފުވައްމުލައް ސިޓީގައި ސަރުކާރުން ބިނާކުރަން ނިންމާފައިވާ އިސްލާމިކް ސެންޓަރުގެ މަޝްރޫޢުގެ ޑިޒައިން ކޮންސެޕްޓް ނިންމައި ކޮމެންޓްތަކަށް ފުވައްމުލައް ސިޓީ ކައުންސިލަށް މިހާރުވަނީ ފޮނުވިފައިކަމަށް މިނިސްޓަރ ވިދާޅުވިއެވެ.
”އިސްލާމިކް ސެންޓަރު ނިމުމުން، އެތަން ވެގެންދާނީ ޤުރުއާނާ ބެހޭ މަރުކަޒަކަށް. އަދި މިހާރު މި ހުޅުވޭ ޤުރްއާން މަރުކަޒު ވަގުފު ބިނާއަކަށް ބަދަލުކުރެވޭނެ. އެ ބިނާ ކުއްޔަށް ދީގެން ލިބޭ ފައިސާ ޚަރަދުކުރެވޭނީ ސިޓީގެ ދީނީ ކަންކަމުގެ ތަރައްޤީއަށް“ މިނިސްޓަރ ޝަހީމް ވިދާޅުވިއެވެ.
މީގެއިތުރުން މިނިސްޓަރ ވިދާޅުވީ ސަރުކާރުގެ ތަޞައްވުރަކީ މުޅި ރާއްޖޭގައި ޤުރުއާނުގެ ޢިލްމު ފުޅާކޮށް ޙާފިޒުން ބިނާކޮ ވަޤުފު މަޝްރޫޢުތައް އިތުރުކޮށް ދީނީ ކަންކަން ކުރިއެރުވުން ކަމަށެވެ.
ކީރިތި ޤުރުއާނުގެ ދާއިރާއަށް ދަޢުލަތުން އަހައްމިއްޔަތުކަން ދޭ މިންވަރު މި ސަރުކާރުން އިތުރުކޮށްފައިވާއިރު، ކީރިތި ޤުރުއާން ކިޔެވުމުގެ ޤައުމީ މުބާރަތަކީ ސީދާ ދަޢުލަތުގެ ބަޖެޓުން ޚަރަދުކޮށްގެން ބާއްވާ މުބާރާތަކަށް ވަނީ ހަދާފައެވެ. އަދި ކީރިތި ޤުރުއާން ކިޔެވުމުގެ ޤައުމީ މުބާރާތަކީ ރާއްޖޭގައި ބޭއްވޭ އެންމެ އަގުބޮޑު އިނާމުތައްދޭ، އެންމެ ޝަރަފްވެރި މުބާރާތައް ހަދާފައިވާކަން ފާހަގަކޮށްލެވެއެވެ.
