ސައުދީ އަރަބިއްޔާގެ ސަރުކާރުން ހަދިޔާކުރި ކަދުރު މާދަމާ ބަހަން ފަށާނެ ކަމަށާއި ކޮންމެ ގެއަކަށް ލިބޭނީ އެއް ޕެކެޓް ކަދުރު ކަމަށް އިސްލާމިކް މިނިސްޓްރީން ބުނެފިއެވެ.
މި ރޯދަ މަހަށް ސައުދީ ސަރުކާރުން ވަނީ 50 ޓަނު ކަދުރު ރާއްޖެއަށް ހަދިޔާކޮށްފައެވެ. ސައުދީން ރާއްޖޭގެ ރައްޔިތުންނަށް ހަދިޔާކުރި ކަދުރާ ހަވާލުވެ، އިސްލާމިކް މިނިސްޓްރީގެ ފަރާތުން މިނިސްޓަރު ޑރ. މުޙައްމަދު ޝަހީމް ޢަލީ ސަޢީދު އެކަމުގެ އެއްބަސްވުމުގައި ސޮއިކުރައްވާފައި ވަނީ މިދިޔަ މަހުގެ 21 ވަނަ ދުވަހުއެވެ.
އިސްލާމިކް މިނިސްޓްރީން މިރޭ ބުނެފައި ވަނީ ސައުދީ ސަރުކާރުން ހަދިޔާކުރި ކަދުރުތައް ބެހުމުގެ މަސައްކަތް މާދަމާ ފަށާނެ ކަމަށާއި އެ މަސައްކަތް ކުރިއަށް ގެންދިއުމަށް ހަމަޖެހިފައި ވަނީ ތިން ހަފުތާއަށް ބަހާލައިގެން ކަމަށެވެ.
ކަދުރު ބަހާ ދުވަސްތަކާއި ގަޑިތައް:
- އެޕްރީލް 8 އަދި 9 ދުވަހު – މެންދުރުފަހު 1:00 އިން ފެށިގެން 3:00 އަށް
- އެޕްރީލް 14 ވަނަ ދުވަހުން ފެށިގެން 18 ވަނަ ދުވަހަށް: މެންދުރުފަހު 1:00 އިން ފެށިގެން 3:00 އަށް
- އެޕްރީލް 23 ވަނަ ދުވަހުން ފެށިގެން 25 ވަނަ ދުވަހަށް: ހެނދުނު 9:30 އިން ފެށިގެން މެންދުރު 12:00 އަށް
މާލޭ ސަރަހައްދުގައި ދިރިއުޅޭ ރައްޔިތުންނަށް ކަދުރު ބަހާނީ އިސްލާމިކް މިނިސްޓްރީންނެވެ. ކަދުރު ބަލާ އަންނައިރު އައިޑީ ކާޑު ގެނަައުމަށް އެ މިނިސްޓްރީން ވަނީ އެދިފައެވެ.
