ރައްޔިތުންގެ ސީދާ ވޯޓަކުން ނޫނީ ވެރިކަން ބަދަލުވާފަދަ ނިޒާމެއް ދިވެހިރާއްޖެއަށް ގެނައުމަކީ ދިވެހި ރައްޔިތުން އެދޭ ގޮތް ނޫން ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވިދާޅުވެއްޖެއެވެ. އެމަނިކުފާނު މިހެން ވިދާޅުވީ ޕަބްލިކް ސަރވިސް މީޑިއާ (ޕީއެސްއެމް) ގެ ’ނޭޝަން ޗެޓް‘ ޕޮޑްކާސްޓްގެ 2 ވަނަ އެޕިސޯޑުގައި ވާހަކަފުޅު ދައްކަވަމުންނެވެ.
ރައީސް ވިދާޅުވީ، ރާއްޖޭގެ ވެރިކަމުގެ ނިޒާމާ މެދު ދިވެހިން ވަނީ ވަރަށް ސާފު ނިންމުމެއް ނިންމާފައި ކަމަށެވެ. ރާއްޖެއަކީ ވަކިވަކި ރަށްތަކުގެ މައްޗަށް އެކުލެވޭ، ކުޑަ އާބާދީއެއް އޮތް ޤައުމަކަށް ވުމާއެކު، ދިވެހިން ބޭނުންވަނީ ޔުނިޓަރީ ނުވަތަ އެއްބައިވަންތަ ދައުލަތެއް އޮންނާނެ ނިޒާމެއް ކަމަށާއި، އެ ނިޒާމަކީ ރިޔާސީ ނިޒާމު ކަމަށް އެމަނިކުފާނު ފާހަގަކުރެއްވިއެވެ. އަދި ދިވެހިންނަކީ އެއް ބަހަކުން ވާހަކަދައްކާ، އެއް ނަސްލެއްގެ ބަޔަކަށް ވާއިރު، ވެރިކަމުގެ ނިޒާމަކީ އެ ސިފަތައް ދަމަހައްޓާނެ ނިޒާމަކަށް ވުމަކީ ރައްޔިތުންގެ އެދުމެއް ކަމަށްވެސް ވިދާޅުވިއެވެ.
”ދިވެހިން އެދެނީ އެ ޚާއްސަ ސިފަތައް ދަމަހައްޓަން. އެހެން ނިޒާމެއް ގެނެސްގެން އެއްބައިވަންތަކަމާއި އެއްބައެއްވަންތަކަން ގެއްލެން ދިވެހިން ބޭނުންވާނެކަމަށް އަޅުގަނޑު ޤަބޫލެއް ނުކުރަން. މަދު ބަޔަކު އެގޮތަށް ތާއީދުކޮށްފާނެ. އެ ޕާޓީއެއްގެ ލީޑަރުން އެގޮތަށް ނިންމީމަ،“ ރައީސް މުޢިއްޒު ވިދާޅުވިއެވެ.
ރާއްޖޭގައި މިހާރު އޮތީ ސީދާ ރިޔާސީ ނިޒާމެއް ނޫން ކަމަށް ވީނަމަވެސް، ޤާނޫނުއަސާސީ އޮތްގޮތުން މި ނިޒާމުގައި ގިނައީ ރިޔާސީ ނިޒާމުގެ ސިފަތައް ކަމަށް ރައީސް ވިދާޅުވިއެވެ. ރިޔާސީ ނިޒާމެއްގައި ސަރުކާރުގެ ވެރިއަކީ އަދި ދައުލަތުގެ ވެރިޔަކީ ވެސް ރައީސުލްޖުމްހޫރިއްޔާއެވެ. އަދި މި ނިޒާމުގައި ރައީސަކީ ސީދާ ރައްޔިތުންގެ އިންތިޚާބަކުން އައްޔަންކުރާ ބޭފުޅެކެވެ. މިއާ ޚިލާފަށް ބަރުލަމާނީ ނިޒާމެއްގައި ސަރުކާރު އެކުލަވާލަނީ މަޖިލީހުގެ ތެރެއިން ކަމަށާއި، ބޮޑުވަޒީރު ހޮވަނީ މަޖިލީހުގެ އަޣުލަބިއްޔަތު އޮންނަ ޕާޓީއަކުން ކަމަށް ރައީސް ތަފްޞީލުކޮށްދެއްވިއެވެ. އަދި ބަރުލަމާނީ ނިޒާމަކަށް ވަކާލާތުކުރާ ފަރާތްތަކަށް އިޝާރާތްކުރައްވައި ރައީސް ވިދާޅުވީ، އެފަދަ ފަރާތްތަކުގެ ތެރޭގައި ވެރިކަން ކުރާހިތްވާލެއް ގިނައީ މީހުން ކަމަށެވެ.
”އެހެންވީމަ އެންމެންނަށް އެބަ ޖެހޭ ބޮޑެތި މަޤާމުތައް ދޭން ދެއްތޯ. ރައީސްކަމާއި، ބޮޑުވަޒީރުކަމާއި މިހެން ދެން ކޮންމެވެސް އެހެން ނަމެއް ކިޔާފައިވެސް ދީފާނެ. އޮތިއްޔާ ރަސްގެފާނުވެސް އެ މީހުން ގެންނަން ބޭނުންވާނެ،“ އެމަނިކުފާނު ވިދާޅުވިއެވެ.
ދިވެހިރާއްޖޭގައި އޮންނަން ފެންނަނީ ކޮން ނިޒާމެއްތޯ ބެލުމަށް 2007 ވަނަ އަހަރު ރައްޔިތުންގެ މެދުގައި ނެގުނު ރިފަރެންޑަމްގައިވެސް، ބޮޑު އަޣުލަބިއްޔަތަކުން ރައްޔިތުން ނިންމާފައިވަނީ ރިޔާސީ ނިޒާމަކަށް ތާއީދުކުރުމަށެވެ. އޭރުންފެށިގެން މިއަދާ ހަމަޔަށްވެސް އެމްޑީޕީން ދަނީ ބަރުލަމާނީ ނިޒާމު ގެނައުމަށް ވަކާލާތުކޮށް އެކަމަށް މަސައްކަތްކުރަމުންނެވެ. އެހެން ނަމަވެސް ދިވެހި ރައްޔިތުންގެ ފުރިހަމަ ބޮޑު އަޣުލަބިއްޔަތަކުން އެމްޑީޕީ އެދޭ ބަރުލަމާނީއަށް ވަނީ ބޮޑުތަނުން ނޫނެކޭ ބުނެފައެވެ.
