ދިވެހިރާއްޖޭގެ އެންމެ ބޮޑު އިދިކޮޅު ސިޔާސީ ޕާޓީ، މޯލްޑިވިއަން ޑިމޮކްރެޓިކް ޕާޓީ (އެމްޑީޕީ) އަށް 21 އަހަރު ފުރުމުގެ މުނާސަބަތުގައި ކުރީގެ ރައީސް އިބްރާހިމް މުޙައްމަދު ސޯލިހު އެ ޕާޓީގެ މެންބަރުންނަށް ތަހުނިޔާ ފޮނުއްވައިފިއެވެ.
މިއަދު އެމްޑީޕީގެ 21 ވަނަ އަހަރީ ދުވަސް ފާހަގަކުރަމުންދާއިރު، ރައީސް ސޯލިހު ސޯޝަލްމީޑިއާގައި ކުރެއްވި ޕޯސްޓެއްގައި ވިދާޅުވީ ޕާޓީގެ ލީޑާޝިޕަށާއި އެންމެހާ ލޮބުވެތި މެންބަރުންނަށް އިޚްލާޞްތެރިކަމާއެކު ދުވަހުގެ ހެޔޮއެދުންތައް އަރިސްކުރާ ކަމަށެވެ.
ރައީސް ސޯލިހުގެ މެސެޖުގައި އެމްޑީޕީން ރާއްޖޭގެ ސިޔާސީ މަޝްރަހަށް ގެނައި ބަދަލުތަކުގެ މައްޗަށް އަލިއަޅުއްވާލެއްވިއެވެ. އެގޮތުން، ރާއްޖެއަށް އިޞްލާޙީ ސިޔާސީ ބަދަލުތަކާއި ހަގީގީ ޑިމޮކްރަސީ ހޯދައިދިނުމުގައި އެމްޑީޕީން ކޮށްފައިވާ ބުރަ މަސައްކަތްތަކަކީ ތާރީޚުން ފެންނަން އޮތް ހަގީގަތެއްކަމަށް ވިދާޅުވިއެވެ.
މީގެ އިތުރުން، އެމްޑީޕީގެ ކުރިމަގުގެ އަމާޒާ ގުޅޭގޮތުން ވާހަކަފުޅު ދައްކަވަމުން ރައީސް ސޯލިހު ވިދާޅުވީ، އެ ޕާޓީގެ އަޒުމަކީ އަބަދުވެސް ރައްޔިތުންގެ ޙައްޤުގައި މަސައްކަތްކުރުމުގައި ސާބިތުކަމާއެކު ދެމިތިބުން ކަމަށެވެ.
އެމްޑީޕީގެ (@MDPSecretariat)
21 ވަނަ އަހަރީ ދުވަހުގެ ހެޔޮއެދުންތައް ޕާޓީގެ ލީޑާޝިޕާއި އެންމެހާ ލޮބުވެތި މެންބަރުންނަށް އިޚްލާޞްތެރިކަމާއެކު ދަންނަވަން.ރާއްޖެއަށް އިޞްލާޙީ ސިޔާސީ ބަދަލުތަކާއި ހަގީގީ ޑިމޮކްރަސީ ހޯދައިދިނުމުގައި މި ޕާޓީ ކުރި ބުރަ މަސައްކަތް ތާރީޚުން ފެންނަން…
— Ibrahim Mohamed Solih (@ibusolih) June 26, 2026
އެމްޑީޕީ އަކީ ރާއްޖޭގައި އެންމެ ފުރަތަމަ ރަޖިސްޓްރީ ކުރެވުނު ސިޔާސީ ޕާޓީއެވެ. 2005 ވަނަ އަހަރު އުފެދުނު މި ޕާޓީން ވަނީ މިހާތަނަށް ރާއްޖޭގެ ވެރިކަން ދެ ދައުރެއްގައި ކޮށްފައެވެ. އޭގެ ތެރޭގައި ރައީސް މުޙައްމަދު ނަޝީދުގެ ވެރިކަމާއި، އެންމެ ފަހުން ނިމިދިޔަ ރައީސް އިބްރާހިމް މުޙައްމަދު ސޯލިހުގެ ފަސް އަހަރުގެ ދައުރު ހިމެނެއެވެ. އެހެން ނަމަވެސް ރައީސް ނަޝީދުގެ ވެރިކަމުގެ ދައުރު ފުރިހަމަ ނުވަނީސް އަމިއްލަފުޅަށް ވަނީ އިސްތިއުފާ ދެއްވާފައެވެ. އެހެން ކަމުން 5 އަހަރުގެ ދައުރެއް ފުރިހަމަ ކޮށްފައިވާ އެމްޑީޕީގެ ވެރިޔަކީ ކުރީގެ ރައީސް އިބްރާހިމް މުޙައްމަދު ސޯލިހުއެވެ.
ތި މީހުންގެ ވެރިކަމުގައި އަހަރެމެން އުޅެން ޖެއްސީ އަޅުވެތިކަމުގައި.