2026 ވަނަ އަހަރުގެ ވޯލްޑް ކަޕްގެ ގްރޫޕް ސްޓޭޖުގެ ފަހު މެޗުގައި ރޭ ޓިއުނީޝިއާ އަތުން 3-1 އިން މޮޅުވެ، ނެދަރލެންޑްސް ގްރޫޕް ’އެފް’ގެ އެއްވަނަ ކަށަވަރުކޮށްފިއެވެ. މި ނަތީޖާއާއެކު މުބާރާތުގެ ދެވަނަ ބުރުގައި ނެދަރލެންޑްސް ބައްދަލުކުރަން ޖެހޭނީ ގްރޫޕް ’ސީ’ގެ ދެވަނަ ހޯދި މޮރޮކޯއާއެވެ.
ބޯކޮށް ވާރޭވެހެމުންދިޔަ އެރޯހެޑް ސްޓޭޑިއަމްގައި ކުޅުނު މި މެޗު ފެށިގެން މާގިނައިރުތަކެއް ނުވަނީސް ނެދަރލެންޑްސްއަށް ކުރިލިބުނެވެ. މެޗުގެ ކުރީކޮޅު ޓިއުނީޝިއާގެ ކެޕްޓަން އެލީސް ސްކީރީ އަތުން ބައިކޮޅަށް ވަން ލަނޑަކުން ނެދަރލެންޑްސް ލީޑު ނެގިއިރު، މެޗުގެ 7 ވަނަ މިނެޓުގައި ބްރަޔަން ބްރޮބީ ވަނީ އެޓީމުގެ ދެވަނަ ލަނޑު ޖަހައިދީފައެވެ. މިއީ މި މުބާރާތުގައި އޭނާ ކާމިޔާބުކުރި ތިންވަނަ ލަނޑެވެ. މި ލަނޑު ޖެހުމަށް ފުރުސަތު ތަނަވަސްކޮށްދިނީ އެޓީމުގެ ކެޕްޓަން ވާޖިލް ވެން ޑައިކްއެވެ. މެޗުގެ 54 ވަނަ މިނެޓުގައި ޓިއުނީޝިއާގެ ހާޒެމް މަސްތޫރީ ލަނޑެއް ޖަހައި އުންމީދު އާކުރި ނަމަވެސް، 62 ވަނަ މިނެޓުގައި ޓިއުނީޝިއާގެ އަނީސް ސިލީމާން އަތުން ބައިކޮޅަށް ވަތް ލަނޑާއެކު ނެދަރލެންޑްސްއަށް ތިން ޕޮއިންޓް ކަށަވަރުވިއެވެ.
ނެދަރލެންޑްސް މި މެޗަށް ނުކުތްއިރު ޖަޕާނާ ޕޮއިންޓުގެ ގޮތުން އެއްވަރުވެފައި އޮތް ނަމަވެސް، ޖަޕާނާއި ސުވިޑަން ބައްދަލުކުރި މެޗު 1-1 އިން އެއްވަރުވުމުން ނެދަރލެންޑްސްއަށް ގްރޫޕްގެ އެއްވަނަ ލިބުނީއެވެ. މިއާއެކު ޖަޕާނަށް ވަނީ ދެވަނަ ބުރުގައި ވަރުގަދަ ބްރެޒިލާ ބައްދަލުކުރަން ޖެހިފައެވެ.
މި މުބާރާތަކީ ޓިއުނީޝިއާއަށް ވަރަށް ނާކާމިޔާބު މުބާރާތެކެވެ. ފުރަތަމަ މެޗުން ބަލިވުމާ ގުޅިގެން ކޯޗު މަގާމުން ވަކިކޮށް، ފްރެންޗް ކޯޗު ހާވް ރެނާޑްއާ ޓީމު ހަވާލުކުރި ނަމަވެސް އެދެވޭ ބަދަލެއް ނުފެނި އެޓީމު ވަނީ މުބާރާތުން ކަޓާފައެވެ. ރޭގެ ބައްޔާއެކު ޓިއުނީޝިއާ އެންމެ ފަހުން ކުޅުނު 6 މެޗުންވެސް މޮޅެއް ވެފައެއް ނުވެއެވެ.
މުބާރާތުގެ ފުރަތަމަ މެޗުގައި ޖަޕާނާ އެއްވަރުވެ ފެށުން ދަށްވި ނަމަވެސް، ޖެހިޖެހިގެން ދެ މެޗުން މޮޅުވެ ނެދަރލެންޑްސް މިހާރު އޮތީ ވަރަށް ފޯމުގައެވެ. ތިން ފަހަރަށް ވޯލްޑް ކަޕް ފައިނަލުގައި ކުޅެ ބަލިވެފައިވާ ނެދަރލެންޑްސްގެ އަމާޒަކީ މިފަހަރުގެ ތަށި ކާމިޔާބުކޮށް، ”ތަށި ނުލިބޭ އެންމެ މޮޅު ޓީމު“ގެ ނަން ފޮހެލުމެވެ.
