ލ. އަތޮޅުގައި ތަރައްގީކުރުމަށް ނިންމާފައިވާ ދެވަނަ އެއަރޕޯޓު އެ އަތޮޅު އިސްދޫ-ކަލައިދޫގައި ތަރައްގީކުރުމަށް ނިންމާފައިވާ ކަމަށް ހައުސިންގ މިނިސްޓްރީން ބުނެފިއެވެ.
މިކަން ހާމަކޮށް ހައުސިންގ މިނިސްޓްރީން މީސް މީޑިއާގައި ހިއްސާކުރި ވީޑިއޯއެއްގައިވަނީ، ލ. އަތޮޅުގައި ދެވަނަ އެއާޕޯޓެއް ތަރައްގީކުރައްވާނެ ކަމަށް ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވެވަޑައިގެންނެވި ވައުދުފުޅު ފުއްދެވުމަށް އިސްދޫ-ކަލައިދޫގައި އެއާޕޯޓެއް ތަރައްގީކުރުމަށް ނިންމާފައިވާ ކަމަށެވެ.
އެ ވީޑިއޯގައި ބުނެފައިވާ ގޮތުގައި، ލ. އަތޮޅަކީ ގުދުރަތީގޮތުން ރީތި، ތާރީހީ ގޮތުން މުއްސަނދި އަދި ރަނގަޅު އިގުތިސާދެއް ބިނާކުރުމުގެ ފުރުސަތު އޮތް އަތޮޅެއްކަން ވަނީ ފާހަގަކޮށްފައެވެ. އެގޮތުން އެ އަތޮޅު ކުރިއަރައިގެން އަންނައިރު ދަތުރުފަތުރުގެ ނިޒާމު ކުރިއަރުވައި އިތުރު އެއަރޕޯޓަކަށް އެ އަތޮޅުގެ ރައްޔިތުން ބޭނުންވެފައިވާ ކަމަށް ވީޑިއޯގައި ވަނީ ބުނެފައެވެ.
އިސްދޫ-ކަލައިދޫއަކީ ބިމުގެ ގޮތުން ބޮޑު އަދި އާބާދީއާއި ތަރައްގީ އެއްފަސްކުރުމުގެ ފުރުސަތު އޮތް ރަށެއްކަމުން، އެ ރަށަށް ބޭނުން ވަނީ ރަނގަޅު އިގުތިސާދެއް ބިނާކުރުމުގެ ފުރުސަތު ފަހިކޮށްދިނުން ކަމަށާއި ރަށުގެ ވަށައިގެން ހުރި އެހެން ރަށްތަކުގެ ގުދުރަތީ ރީތިކަމާއެކު ފަތުރުވެރިކަން ކުރިއެރުވުމުގެ ފުރުސަތުތައް ކަމަށް ހައުސިންގ މިނިސްޓްރީން ވަނީ ބުނެފައެވެ.
މި އެއަރޕޯޓާއެކު އިސްދޫ-ކަލައިދޫގެ ރައްޔިތުން މިހާރު ކައްދޫއަށް ދިޔުމަށް 45 މިނެޓުގެ ދަތުރެއް ކުރާކަށް ނުޖެހޭނެއެވެ. އެ ރަށުގައި އެއަރޕޯޓު ހެދުމުން ލ. މާބައިދޫ އަދި ދަނބިދޫ ރައްޔިތުންނަށް ވެސް އެކަމުގެ ފައިދާކުރާނެ ކަމަށް ހައުސިންގ މިނިސްޓްރީން ވަނީ ބުނެފައެވެ.
ލ. އަތޮޅުގައި އެއަރޕޯޓެއް އޮންނަނީ ހަމައެކަނި ކައްދޫގައެވެ.
