ކުށްކުރާ ކުޑަކުދިންނަށް 15 އަހަރު ނުފުރޭ ނަމަ އަދަބު ނުދެވޭ ގޮތަށް އޮންނަ އޮތުން އުވާލައި, ކުށަށް ޒިންމާވާން ޖެހޭ އުމުރު 12 އަހަރަށް ދަށް ކުރުމަށް ސަރުކާރުން ނިންމައިފިއެވެ.
ކުޑަކުދިން ގަނާއިން ރައްކާތެރިކުރުމަށް މަސައްކަތްކުރާ ޓާސްކްފޯހުން ހޮނިހިރު ދުވަހުގެ ރޭ ބޭއްވި ނޫސްވެރިންގެ ބައްދަލުވުމެއްގައި ހޯމްލޭންޑް ސެކިއުރިޓީ މިނިސްޓަރު ޢަލީ އިޙްސާން ވިދާޅުވީ ކުޑަކުދިން ކުރާ ކުށްތައް ހުއްޓުވަން މިހާރު އޮތް އެންމެ ބޮޑު ގޮންޖެހުމަކީ ޖިނާއީ ކުށްތަކަށް ޒިންމާ އުފުލަން ޖެހޭ އުމުރު މަތިކޮށްފައި އޮންނަ އޮތުން ކަމަށެވެ.
ދެހާސް ނަވާރަ ވަނަ އަހަރު އަމަލުކުރަން ފެށި ކުޑަކުދިންގެ ޖިނާއީ އަދުލުގެ ގާނޫނުގައިވާ ގޮތުން ކުޑަކުދިން ކުރާ ޖިނާއީ ކުށްތަކުގެ ޒިންމާ ނަގަން ޖެހެނީ 15 އަހަރުވުމުންނެވެ. އެ ގާނޫނުގެ ކުރިން އޮތީ އުމުރުން 10 އަހަރުވުމުން އިސްލާމްދީނުގައި ހައްދު ކަނޑައެޅޭ ކުށްތަކުގެ ޒިންމާ އުފުލަން ޖެހޭ ގޮތަށެވެ. އަދިހުރިހާ ކުށެއްގެ ޒިންމާ 13 އަހަރުވުމުން އުފުލަން ޖެހޭ ގޮތަށެވެ.
“މި ވަގުތު ޖިނާއީ ކުށެއް ކުރިއަސް އެކަމަށް ޒިންމާ ނުކުރެވޭ. މި އުމުރު 12 އަހަރަށް ބަދަލުކުރަން މި ނިންމީ،” އއ. ރަސްދޫގެ މިސްކިތެއްގައި ކުޑަކުއްޖަކަށް އަނިޔާކުރާ ވީޑިއޯއެއް ދައުރުވުމާ ގުޅިގެން ކަމާ ގުޅުންހުރި ފަރާތްތަކުން ބޭއްވި ނޫސްވެރިންގެ ބައްދަލުވުމުގައި އިހްސާން ވިދާޅުވިއެވެ.
ކުޑަކުދިންގެ ޖިނާއީ އަދުލުގެ ގާނޫނަށް ބަދަލު ގެނެސް، ޖިނާއީ ކުށްތަކަށް 12 އަހަރުގައި ޒިންމާ އުފުލަން ޖެހޭ ގޮތަށް ބަދަލު ގެންނަން ނިންމާފައިވާ ކަން ހާމަކޮށް އިހްސާން ވިދާޅުވެފައި ވަނީ ޖުވެނައިލް ޑިޕާޓްމަންޓުގެ ރިކޯޑުތައް ބުނާ ގޮތުން، ކުށުގެ ވެއްޓަށް ހުށަހެޅިފައިވާ 200 އެއްހާ ކުޑަކުދިން މިހާރު އެބަތިބި ކަމަށެވެ. އޭގެ ތެރޭގައި އެންމެ ގިނައީ 12-14 އަހަރާ ދެމެދުގެ ކުދިން ކަމަށް ވެސް އޭނާ ވިދާޅުވިއެވެ.
އިހްސާން ފާހަގަކުރެއްވި ގޮތުގައި ދުނިޔޭގެ އެހެން ގައުމުތަކުގައި ކުށްތަކަށް ޒިންމާވާން ޖެހޭ އެންމެ ހަގު އުމުރުގެ ގޮތުގައި ކަނޑައަޅާފައި ވަނީ 12-14 އަހަރު ކަމުގައެވެ.
