ގިރާވަރުފަޅުގެ ލޭންޑް ޔޫސް ޕްލޭނަށް ބަދަލު ގެނެސް، ބިންވެރިޔާ ސްކީމްގެ ދަށުން ގިރާވަރުފަޅުން ދޫކޮށްފައިވާ 1،347 ގޯތި ގުޅީފަޅަށް ބަދަލުކުރުމަށް ނިންމައިފިއެވެ.
ހައުސިން މިނިސްޓްރީން މިރޭ ނެރުނު އިއުލާނުގައި ބުނީ ސަރުކާރުން ކުރިއަށް ގެންގޮސްފައިވާ ބިންވެރިޔާ ސްކީމްގެ ދަށުން ގިރާވަރުފަޅުން ގޯތި ދޫކޮށްފައި ވަނީ އެ ސަރަހައްދަށް ކޮންމެހެން ބޭނުންވާ މުހިންމު ހިދުމަތްތަކަށް އެކަށީގެންވާ ވަރަށް ބިން އެކަށައެޅުމެއް ނެތި ކަމަށެވެ. އެ ހިދުމަތްތަކާ އެކު ގިރާވަރުފަޅުގެ ލޭންޑް ޔޫސް ޕްލޭނަށް ބަދަލުގެނައުމުން ގިރާވަރުފަޅުން ބިން ދޫކޮށްފައިވާ އަދަދަށް ގޯތި ނުނެގޭތީ ގިރާވަރުފަޅުން ދޫކޮށްފައިވާ ބައެއް ގޯތިތައް ބަދަލުކުރުމަށް ހަމަޖެހިފައި ވަނީ ގުޅިފަޅަށް ކަމަށް ހައުސިން މިނިސްޓްރީން ބުނެއެވެ.
ގިރާވަރުފަޅުން ގުޅީފަޅަށް ބަދަލުކުރަން ހަމަޖެހިފައިވާ ގޯތީގެ އަދަދާއި ބޮޑުމިނުގެ ތަފުސީލު:
- 1،250 އަކަފޫޓުގެ 193 ގޯތި
- 1،650 އަކަފޫޓުގެ 663 ގޯތި
- 2،050 އަކަފޫޓުގެ 487 ގޯތި
- 2،450 އަކަފޫޓުގެ 4 ގޯތި
ހައުސިން މިނިސްޓްރީން ބުނެފައި ވަނީ ގިރާވަރުފަޅުން ގުޅީފަޅަށް ބަދަލުކުރަން ހަމަޖެހިފައިވާ މިންތަކުގެ ގޯތި ލިބިފައިވާ ފަރާތްތަކުން މާދަމާ ހެނދުނު 9:00 އިން ފެށިގެން މި މަހުގެ 14 ވަނަ ދުވަހުގެ 23:00 ގެ ނިޔަލަށް ހިޔާވެހި ޕޯޓަލް ލިންކް މެދުވެރިކޮށް ގުޅީފަޅަށް ގޯތި ބަދަލުކުރުމަށް ހުށަހެޅުމުގެ ފުރުސަތު ހުޅުވާލާނެ ކަމަށެވެ.
ބަދަލުކުރުމަށް ހަމަޖެހިފައިވާ އަދަދަށް ވުރެ ބަދަލުވާން ހުށަހަޅާ ފަރާތްތަކުގެ އަދަދު އިތުރުވާނަމަ ގުޅީފަޅުން ގޯތި ލިބޭ ފަރާތްތައް ކަނޑައަޅާނީ ގުރުއަތުން ކަމަށާއި ގުރުއަތު ނެގުން އޮންނާނެ ތާރީހެއް ފަހުން އާންމުކޮށް އިއުލާނު ކުރާނެ ކަމަށް ވެސް އެ މިނިސްޓްރީން ބުނެފައިވެއެވެ.
މިކަމާ ގުޅޭގޮތުން އިތުރު މައުލޫމާތު ބޭނުންވާ ފަރާތްތަކުން ask@housing.gov.mv މެދުވެރިކޮށް ހުށަހެޅުމަށް ހައުސިން މިނިސްޓްރީން ވަނީ އެދިފައެވެ.
