ގައުމީ އެއާލައިން، މޯލްޑިވިއަންގެ ދަތުރުތައް އައްޑޫ ސިޓީ އާއި ގއ. ކޫއްޑޫ އާ ދެމެދު ފެށުމަށް ނިންމައިފިއެވެ.
މޯލްޑިވިއަނުން ބުނީ ގަން އިންޓަނޭޝަނަލް އެއަރޕޯޓާއި ކޫއްޑޫ އެއަރޕޯޓާ ދެމެދު ދަތުރުތައް ފަށާނީ އަންނަ އޮކްޓޫބަރު މަހުގެ 29 ވަނަ ދުވަހު ކަމަށެވެ.
ކޮންމެ ހަފުތާއެއްގެ ހޮނިހިރު ދުވަހާއި އަންގާރަ ދުވަހު ގަމުން ކޫއްޑޫއަށް އަދި ކޫއްޑޫއިން ގަމަށް ދަތުރުތައް ކުރާނެ ކަމަށް މޯލްޑިވިއަނުން ބުނެއެވެ.
ކޮންމެ ހަފުތާއަކު ވެސް ދަތުރުތައް ބާއްވާނީ:
- އައްޑޫއިން ކޫއްޑުއަށް: ކޮންމެ އަންގާރަ ދުވަހެއްގެ މެންދުރު 11:55 ގައި
- ކޫއްޑޫއިން އައްޑޫއަށް: ކޮންމެ ހޮނިހިރު ދުވަހެއްގެ ހަވީރު 5:30 ގައި
މޯލްޑިވިއަނުން ބުނެފައި ވަނީ މި ދަތުރުތަކަކީ ދެކުނުގެ ރަށްތައް ފަތުރުވެރިކަމަށް ހުޅުވާލަން ޓްރާންސްޕޯޓް މިނިސްޓްރީ އާއި އެމްއެމްޕީއާރުސީގެ އިތުރުން ޓޫރިޒަމް މިނިސްޓްރީން ގުޅިގެން ކުރަން ފަށާ ދަތުރުތަކެއް ކަމަށެވެ.
އަލަށް ފަށާ މި ދަތުރުތަކާ އެކު ދިވެހިންނާއި ޓޫރިސްޓުންނަށް ވެސް ރާއްޖޭގެ އެކި ސަރަހައްދުތަކަށް ދަތުރުފަތުރު ކުރުމުގައި ފަސޭހަވާނެ ކަމަށް އެ އެއަރލައިނުން ބުނެއެވެ.
މި ދަތުރުތަކަށް ބުކިން ހެދުމުގެ ފުރުސަތު މިހާރު ވަނީ ހުޅުވާލާފައެވެ. މޯލްޑިވިއަނުން ބުނި ގޮތުގައި އެ އެއަރލައިނުގެ ވެބްސައިޓާއި މޮބައިލް އެޕްލިކޭޝަންގެ އިތުރުން ޓިކެޓިން އޮފީސްތަކުން ބުކިން ހެއްދޭނެ ކަމުގައެވެ.
