އިސްލާމީކަންތައްތަކާއި އައުގާފާ ބެހޭ ވުޒާރާއިން ކުރިއަށްގެންދާ މަޝްރޫއުތަކުގެ އަދަދު 79 އަށް އަރައިފިއެވެ.
މި މަޝްރޫއުތަކުގެ ތެރޭގައި ހިމެނެނީ 45 މިސްކިތެއްގެ މަޝްރޫއާއި، 12 އިސްލާމީ މަރުކަޒެއްގެ މަޝްރޫއާއި، 16 ގުރުއާން ސެންޓަރުގެ މަޝްރޫޢުގެ އިތުރުން ވަގުފުގެ ބިނާ ކުރުމުގެ 6 މަޝްރޫއެކެވެ.
ރާއްޖޭގެ އެކިކަންކޮޅުތަކުގައި އިސްލާމީ ދާއިރާއިން ގިނަ މަޝްރޫއުތަކެއް ކުރިއަށްދާއިރު، މަޝްރޫއުތައް ހަލުވި ދުވެލީގައި ކުރިއަށްގެންދިއުމަށް ވުޒާރާއިން އަންނަނީ ގިނަ މަސައްކަތްތަކެއް ކުރަމުންނެވެ.
އިސްލާމީ ދާއިރާއިން މި ދައުރުގެ ތެރޭގައި ކުރިއަށްގެންދާ އެންމެ މުހިއްމު މަޝްރޫއުތަކުގެ ތެރޭގައި މާލޭގައި ބިނާކުރާ ދާރުލްއަރުގަމްއާއި ހުޅުމާލޭގައި ބިނާކުރާ ދާރުއްސަލާމް ވަގުފު އިމާރާތް ހިމެނެއެވެ. މީގެ އިތުރުން މިހާތަނަށް ރާއްޖޭގައި ބިނާކުރެވޭ އެންމެ ބޮޑު މިސްކިތް ހުޅުމާލޭގައި ބިނާކުރުމަށް މި އަހަރުގެ ސެޕްޓެމްބަރު މަހުގެ ތެރޭގައި އަމަލީ މަސައްކަތް ފެށުމަށް ވުޒާރާއިން އަންނަނީ މަސައްކަތް ކުރަމުންނެވެ.
މި މަޝްރޫއަށް ރާއްޖެއިން ބޭރުގެ ފަރާތަކުން ފައިނޭންސިންގ ހަމަޖެހިފައިވާކަން ފާހަގަކޮށްލެވެއެވެ.
