ތެލެސީމިއާ ކުދިންގެ ބޯންމެރޯ ޓްރާންސްޕްލާންޓް ހެދުމަށް ބޭނުންވާ މާލީ އެހީތެރިކަން ފޯރުކޮށްދިނުމުގެ ގޮތުން، މޯލްޑިވްސް ޒަކާތު ހައުސްއިން ނޭޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ) އަށް 2.5 މިލިއަން ރުފިޔާ ހަވާލުކޮށްފިއެވެ.
މި ފައިސާ އެ އެޖެންސީއަށް މިހާރު ވަނީ ޖަމާކޮށްފައެވެ.
މި އެހީއަކީ އިސްލާމިކް މިނިސްޓްރީއާއި ހެލްތް މިނިސްޓްރީއާ ދެމެދު 2024 ވަނަ އަހަރުގެ އޮގަސްޓު މަހުގެ 21 ވަނަ ދުވަހު ސޮއިކުރެވުނު އެއްބަސްވުމެއްގެ ދަށުން، ތެލެސީމިއާ ކުދިންގެ ފަރުވާއަށް ޒަކާތު ފަންޑުން ކޮންމެ އަހަރަކު ފޯރުކޮށްދޭ މާލީ އެހީގެ ބައެކެވެ. 2014 ވަނަ އަހަރުން ފެށިގެން ވެސް ޒަކާތު ފަންޑުގެ އެހީގައި ގިނަ އަދަދެއްގެ ތެލެސީމިއާ ބަލިމީހުންގެ ބޯންމެރޯ ޓްރާންސްޕްލާންޓް ހަދާފައިވާކަން ފާހަގަކޮށްލަންޖެހެއެވެ.
މީގެ އިތުރުން، ބޮޑެތި އެކި ބަލިތަކަށް ފަރުވާ ހޯދާ ފަރާތްތަކަށް ވެސް ޒަކާތު ފަންޑުން މާލީ އެހީތެރިކަން މެދުނުކެނޑި އަންނަނީ ފޯރުކޮށްދެމުންދެއެވެ.
ތެލެސީމިއާއަކީ މުޅި އުމުރަށް ފަރުވާކުރަންޖެހޭ އަދި ގަވާއިދުން ލޭއަޅަންޖެހޭ ބައްޔަކަށްވާއިރު، މި ބައްޔަށް އޮތް ހަމައެކަނި ދާއިމީ ހައްލަކީ ބޯންމެރޯ ޓްރާންސްޕްލާންޓް ހެދުމެވެ. މި ފަރުވާއަކީ ބަލިމީހާގެ ދިރިއުޅުމުގެ ފެންވަރު ރަނގަޅުކޮށްދޭ، އަދި ބަލީގެ ނުރައްކާތަކުން ސަލާމަތްކޮށްދޭ ފަރުވާއެއް ނަމަވެސް، މިއީ ވަރަށް ބޮޑު ހަރަދެއް ހިނގާ ކަމެކެވެ. އެހެންކަމުން، މިފަދަ ފަރުވާތަކަށް ބޭނުންވާ މާލީ އެހީތެރިކަން ފޯރުކޮށްދިނުމަށް ޒަކާތު ފަންޑުންދޭ އިސްކަން އެ އިދާރާއިން ފާހަގަކުރެއެވެ.
