ހުޅުމާލޭގެ ތިންވަނަ ފިޔަވަހިން 15 ހެކްޓަރުގެ ބިން މިހާރު ވަނީ ހިއްކާ ނިމިފައި ކަމަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ބުނެފިއެވެ.
ހުޅުމާލޭގެ ތިންވަނަ ފިޔަވަހީގެ މަޝްރޫއުގެ މަސައްކަތްތައް ކުރީގެ ރައީސް އިބްރާހިމް މުޙައްމަދު ޞާލިޙުގެ ސަރުކާރުން ހަވާލުކޮށްފައި ވަނީ ކެޕިޓަލް މެރިން އެންޑް ސިވިލް ކޮންސްޓްރަކްޝަން ކޮމްޕެނީ ލިމިޓެޑް (ސީއެމްސީ) އަށެވެ. އެޗްޑީސީން އެ ކުންފުންޏާ މި މަސައްކަތް ހަވާލުކޮށްފައި ވަނީ 259.2 މިލިއަން ރުފިޔާއަށެވެ.
ހުޅުމާލޭގެ ތިންވަނަ ފިޔަވަހީގެ ބިން ހިއްކުމުގެ މަޝްރޫއު ކުރިއަށް ދަނީ ދެ ބަޔަކަށް ބަހާލައިގެންނެވެ. އެގޮތުން ފުރަތަމަ ބައިގެ ގޮތުގައި ހިއްކުމަށް ކަނޑައަޅާފައިވާ ސަރަހައްދުގެ 10 ހެކްޓަރު ބިން ހިއްކާ ނިމި، ދެވަނަ ބައިގެ ފަސް ހެކްޓަރު ހިއްކާފައިވާ ކަމަށް އެޗްޑީސީން ބުނެއެވެ. އެ ކުންފުނިން ބުނެފައި ވަނީ މިހާރު ކުރިއަށް ދަނީ ބާކީ 48 ހެކްޓަރުގެ ބިން ހިއްކުމުގެ މަސައްކަތް ކަމަށެވެ.
ހުޅުމާލޭގެ ތިންވަނަ ފިޔަވަހީގެ ގޮތުގައި ހިއްކުމަށް ނިންމާފައި ވަނީ 63 ހެކްޓަރު ކަމަށް އެޗްޑީސީން ބުނެއެވެ. އެޗްޑީސީން ބުނީ އެ ސަރަހައްދުގެ ބިން ހިއްކުމުގެ މަސައްކަތް މިހާރު ވެސް ބާރު ދުވެލީގައި ކުރިއަށްދާ ކަމަށެވެ.
އެޗްޑީސީން ކުރިން ބުނެފައިވާ ގޮތުގައި މި މަޝްރޫއުގެ ޖުމްލަ އަގު އަދާކުރަން ހަމަޖެހިފައި ވަނީ ހުޅުމާލޭގެ 10 ހެކްޓަރުގެ ބިމާއި ތިލަފުށިން ހިއްކާ 9.8 ހެކްޓަރުގެ ބިން ވިއްކައިގެން ކަމުގައެވެ.
