ކުރީގެ ރައީސް ޢަބްދުﷲ ޔާމީން އިސްކޮށް ހުންނަވައިގެން އުފައްދަވާ ޕާޓީ، ޕީޕަލްސް ނެޝަނަލް ފްރޮންޓް (ޕީއެންއެފް) އުފެއްދުމަށް ބާއްވަން ޖެހޭ ހާއްސަ ޖަލްސާ ބޭއްވުމުގެ ހުއްދަ އިލެކްޝަންސް ކޮމިޝަން (އީސީ) ދީފިއެވެ.
އީސީން މިއަދު ބުނީ ސިޔާސީ ޕާޓީގެ ގާނޫނުގެ 12 ވަނަ މާއްދާގައިވާ ގޮތުގެ މަތިން ޕީއެންއެފް އުފެެއްދުމަށް ބޭނުންވާ 3،000 މީހުންގެ ސޮއި އެ ކޮމިޝަނަށް ހުށަހަޅާފައިވާތީ، އެ ޕާޓީ އުފެއްދުމަށް ބާއްވާ ބައްދަލުވުން ބޭއްވުމުގެ ހުއްދަ ދީފައިވާ ކަމަށެވެ.
ޕީއެންއެފް އުފައްދަން ހުށައަޅާފައި ވަނީ ރައީސް ޔާމީންގެ ދަރިކަލުން ޒެއިން ޢަބްދުﷲ ޔާމީނެވެ. އެ ޕާޓީ އުފެއްދުމުގެ ހުއްދަ އީސީން ދީފައި ވަނީ މިދިޔަ އަހަރުގެ ނޮވެމްބަރު މަހުގެ 29 ވަނަ ދުވަހުއެވެ.
ޕާޓީ އުފައްދަން ބާއްވާ ބައްދަލުވުން ބޭއްވުމުގެ ހުއްދަ ދިނުމާ ގުޅިގެން ޕީއެންއެފް އުފެއްދުމުގައި އިސްކޮށް ހަރަކާތްތެރިވެ ވަޑައިގަންނަވާ ކުރީގެ މިނިސްޓަރު މުޙައްމަދު މަލީޙް ޖަމާލް ”އެކްސް“ ގައި ކުރެއްވި ޕޯސްޓެއްގައި ވިދާޅުވީ ދިވެހި ގައުމާއި ރައްޔިތުންގެ ހައްގުގައި ރައީސް ޔާމީން ކުރައްވަމުން ގެންދަވާ މަސައްކަތް ދާނީ ހަލުވި މިނުގައި ކުރިއަށް ކަމަށެވެ.
ٱلْحَمْدُ لِلَّٰهِ . ސިޔާސީ ޕާޓީ އުފެއްދުމަށް ބާއްވަންޖެހޭ ޖަލްސާ ބޭއްވުމުގެ ހުއްދަ ރައީސް ޔާމީން ޕާޓީ ޕީއެންއެފްއަށް އީސީއިން މިއަދު ވަނީ ދޫކޮށްފަ.إن شاء الله ދިވެހި ޤައުމާއި ރައްޔިތުންގެ ހައްޤުގައި ރައީސް ޔާމީން ކުރައްވަމުން ގެންދަވާ މަސައްކަތް ދާނީ ހަލުވި މިނުގައި ކުރިޔަށް. pic.twitter.com/UQNwxQBR4o
— Mohamed Maleeh Jamal (@maleehjamal) April 4, 2024
ޕާޓީއެއް ރަޖިސްޓްރީކޮށްދެނީ 3،000 މީހުންގެ ސޮޔާ އެކު ހުށަހެޅުމުން، ފޯމުތައް ސައްހަތޯ އީސީން ބެލުމަށް ފަހުގައި ޕާޓީ އުފެއްދުމުގެ ޖަލްސާ ބޭއްވުމުންނެވެ. ޕާޓީއެއް އުފައްދަން ބާއްވާ ޖަލްސާއަށް މަދުވެގެން 300 މެންބަރުން ހާޒިރުވާން މަޖުބޫރު ވާނެއެވެ.
ރައީސް ޔާމީން އިސްވެ ހުންނަވާ އާ ޕާޓީއެއް އުފެއްދެވުމުގެ މަސައްކަތް ފަށާފައި ވަނީ ހިނގަމުންދާ ވެރިކަން ފެށުނު ފަހުން ޕްރޮގްރެސިވް ކޮންގްރެސް ކޯލިޝަނުގެ ލީޑަޝިޕާ އުފެދުނު ހިޔާލުތަފާތުވުންތަކުގައި ޕްރޮގްރެސިވް ޕާޓީ އޮފް މޯލްޑިވްސް (ޕީޕީއެމް) އިން ވަކިވެޑައިގަތުމަށްފަހުގައެވެ.
މިއީ ރައީސް ޔާމީން އުފައްދަވާ ތިންވަނަ ސިޔާސީ ޕާޓީއެވެ. އެންމެ ފުރަތަމަ އެމަނިކުފާނު އުފައްދަވާފައި ވަނީ ޕީޕަލްސް އެލަޔަންސް (ޕީއޭ) އެވެ. އެއަށްފަހު، ކުރީގެ ރައީސް މައުމޫން ޢަބްދުލްޤައްޔޫމް އާ ގުޅިވަޑައިގެން ޕީޕީއެމް އުފެއްދެވުމުގައި ވެސް އިސްކޮށްއުޅުއްވިއެވެ.
