ހުޅުމާލޭގެ ދެވަނަ ފިޔަވަހީގައި ތަރައްގީކުރުމަށް ހަމަޖެހިފައވާ ކެންސަރު ހޮސްޕިޓަލް 2028 ވަނަ އަހަރުގެ ކުރިން ހުޅުވައި ހިދުމަތްތައް ފެށުމަށް ހަމަޖެހިފައިވާ ކަމަށް ހެލްތް މިނިސްޓަރު ޤީލާ ޢަލީ ވިދާޅުވެއްޖެއެވެ.
ރައްޔިތުންގެ މަޖިލީހުގެ ގަލޮޅު އުތުރު ދާއިރާ ތަމްސީލުކުރައްވާ މެންބަރު މުޙައްމަދު އިބްރާހީމް ކުރެއްވި ސުވާލަކަށް ޖަވާބުދެއްވަމުން، މިނިސްޓަރު ޤީލާ ވިދާޅުވީ، މި ހޮސްޕިޓަލަކީ 500 އެނދުގެ މަލްޓިސްޕެޝަލިޓީ ހޮސްޕިޓަލެއް ކަމަށާއި، އޭގެ ތެރެއިން 25 އެނދު ހާއްސަކުރެވިފައި ހުންނާނީ ހަމައެކަނި ކެންސަރު ބަލި ތަހައްމަލްކުރަމުންދާ ފަރާތްތަކަށް ފަރުވާދިނުމަށް އެކަނި ކަމަށެވެ.
މީގެ އިތުރުން މައިންނާއި ކުޑަކުދިންގެ ސިއްހަތާ ގުޅޭ ހާއްސަ ފަރުވާތައް ވެސް މި ހޮސްޕިޓަލުން ލިބޭނެ ކަމަށް މިނިސްޓަރު ޤީލާ ވަނީ ވިދާޅުވެފައެވެ.
”މި މަޝްރޫޢުގެ މަސައްކަތް އެކި މަރުހަލާތަކަށް ބަހާލައިގެން ކުރިއަށްދާއިރު، އަޅުގަނޑުމެންގެ އަމާޒަކީ 2028ގެ ކުރިން ކީމޯތެރަޕީ، ރޭޑިއޯތެރަޕީ އަދި ޕެޓް ސްކޭން ފަދަ މުހިންމު ހިދުމަތްތައް މި ހޮސްޕިޓަލުގައި ފެށުން،“ – މިނިސްޓަރު ޤީލާ ވިދާޅުވިއެވެ.
ރާއްޖޭގައި ކެންސަރު ބަލި ތަހައްމަލްކުރަމުންދާ ފަރާތްތަކާ ގުޅޭ ތަފާސްހިސާބުތަކަށް އަލިއަޅުއްވާލައްވަމުން މިނިސްޓަރު ވިދާޅުވީ، 2025 ވަނަ އަހަރު އެކަނި ވެސް 120 މީހަކު އަލަށް މި ބައްޔަށް ރަޖިސްޓްރީވެފައިވާ ކަމަށެވެ. އެއީ 67 އަންހެނުންނާއި 53 ފިރިހެނުން ކަމަށް މިނިސްޓަރު ވަނީ ވިދާޅުވެފައެވެ.
ހަމައެހެންމެ، އާސަންދަ ސްކީމް މެދުވެރިކޮށް މިހާތަނަށް 5،755 މީހަކު ކެންސަރުގެ ފަރުވާއަށް ރާއްޖެއިން ބޭރަށް ފޮނުވާފައިވާ ކަމަށާއި އެކަމަށް ދައުލަތުގެ ބަޖެޓުން 374 މިލިއަން ރުފިޔާ ހޭދަކޮށްފައިވާ ކަމަށް މިނިސްޓަރު ވަނީ އިތުރަށް ވިދާޅުވެފައެވެ.
