ޕީޕަލްސް ނޭޝަނަލް ކޮންގްރެސް (ޕީއެންސީ) ގެ ލީޑަރޝިޕް ބައިބައިވެ، ރައީސުލްޖުމްހޫރިއްޔާ ޑރ. މުޙައްމަދު މުޢިއްޒަށް އޮތް ތާއީދު ކުޑަވަމުންދާކަމަށް ބުނެ ދެކެވޭ ވާހަކަތަކަކީ އެއްވެސް އަސާސެއް ނެތް ދޮގު ވާހަކަތަކެއް ކަމަށް ފިޝަރީޒް މިނިސްޓަރު އަދި ޕީއެންސީގެ ނައިބު ރައީސް އަޙްމަދު ޝިޔާމް ވިދާޅުވެއްޖެއެވެ.
ޝިޔާމް މިހެން ވިދާޅުވީ، ކުރީގެ ރައީސް ޔާމީންގެ ސަރުކާރުގައި ރައީސް އޮފީހުގެ ކުރީގެ ޗީފް އޮފް ސްޓާފް އަޙްމަދު މުޞްޠަފާ ސޯޝަލް މީޑިއާ ޕްލެޓްފޯމް ’އެކްސް‘ ގައި ކުރެއްވި ތުހުމަތުތަކަކަށް ރައްދުދެއްވަމުންނެވެ.
މުޞްޠަފާ ކުރެއްވި ޕޯސްޓެއްގައި ބުނެފައިވަނީ، 2028 ވަނަ އަހަރުގެ ރިޔާސީ އިންތިޚާބުގައި ރައީސް މުޢިއްޒު ނޫން އެހެން ކެންޑިޑޭޓަކު ނެރުމަށް ޕީއެންސީގެ ތެރޭގައި މަޝްވަރާތައް ފެށިފައިވާ ކަމަށެވެ. އަދި މިކަމާ ގުޅިގެން ރައީސް މުޢިއްޒު ޕީޕީއެމްގެ ލީޑަރުންނަށް ގުޅުއްވައި، މެސެޖު ކުރައްވައި ބިރުދައްކަވަމުން ގެންދަވާ ކަމަށާއި، އެމަނިކުފާނާ ދެކޮޅަށް ރޭވުންތައް ރާވާކަމުގެ ތުހުމަތު ކުރައްވާ ކަމަށްވެސް މުޞްޠަފާ ބުންޏެވެ.
You think a tweet full of fake news can devide us!! PNC leadership stand fully united behind President Muizzu. Fabricating baseless rumors won't disrupt the government's progress because we are very focused on what we've promised. I'm sure you can be a more responsible citizen. https://t.co/AQVZr3A3Jn
— Ahmed Shiyam (@Shiyamaldives) June 22, 2026
މީގެ އިތުރުން، ސަރުކާރުގެ ވަރުގަދަ ޝަޚްޞިއްޔަތުން ކަމަށްވާ ޣައްސާން މައުމޫނާއި، މޫސާ ޒަމީރު އަދި އާދަމް ޝަރީފް އުމަރު އެކަހެރި ކުރަމުންދާ ކަމަށާއި، ދެން އޮތީ ޝިޔާމާއި އަބްދުއްރަހީމް އެކަހެރި ކުރުން ކަމަށްވެސް އޭނާ ތުހުމަތު ކުރިއެވެ. މުޞްޠަފާ ބުނި ގޮތުގައި ޕީއެންސީގެ ކޮންގްރެސް އަވަސްކޮށްގެން އުޅެނީ ޕީޕީއެމްގެ ނުފޫޒުގަދަ ބޭފުޅުން ބާކީކޮށްލުމަށެވެ.
މި ތުހުމަތުތަކަށް ވަރުގަދަ ރައްދެއް ދެއްވަމުން މިނިސްޓަރު ޝިޔާމް ވިދާޅުވީ، ދޮގު ޚަބަރުތަކެއް ހިމެނޭ ޓުވީޓަކުން ސަރުކާރާއި ޕާޓީ ބައިބައި ނުކުރެވޭނެ ކަމަށެވެ.
”ޕީއެންސީގެ ލީޑަރޝިޕް އޮތީ ރައީސް މުޢިއްޒުގެ ފަހަތްޕުޅުގައި ވަރަށް ބަދަހިކޮށް. އަސާސެއް ނެތް ދޮގު ވާހަކަތައް ފަތުރައިގެން ސަރުކާރުގެ ކުރިއެރުމަކަށް ހުރަހެއް ނޭޅޭނެ. އަޅުގަނޑުމެން މިތިބީ ރައްޔިތުންނަށް ވީ ވައުދުތައް ފުއްދުމަށް ވަރަށް ބޮޑަށް ފޯކަސް ކޮށްގެން،“ ޝިޔާމް ވިދާޅުވިއެވެ.
ޝިޔާމް އިތުރަށް ވިދާޅުވީ މުޞްޠަފާ ފަދަ ބޭފުޅުން މިއަށްވުރެ ޒިންމާދާރު ރައްޔިތަކަށް ވާނެ ކަމަށް އުންމީދު ކުރައްވާ ކަމަށެވެ.
ސަރުކާރު ހިންގާ ކޯލިޝަންގެ ތެރޭގައި އެއްވެސް މައްސަލައެއް ނެތް ކަމަށް ޝިޔާމް ވިދާޅުވި ނަމަވެސް، އިދިކޮޅު ފަރާތްތަކުން ތުހުމަތު ކުރަނީ ވެރިކަމުގެ ބާރުތައް ކޮންސޮލިޑޭޓް ކުރުމަށްޓަކައި ޕީޕީއެމްގެ ދައުރު ކުޑަކުރަމުންދާ ކަމަށެވެ. އެހެންނަމަވެސް، މަޖިލީހުގެ ރައީސް އަބްދުއްރަހީމް އަބްދުﷲ އާއި ނައިބު ރައީސް ޙުސައިން މުޙައްމަދު ލަޠީފް ހިމެނޭ ގޮތަށް މުޅި ލީޑަރޝިޕް އޮތީ ރައީސް މުޢިއްޒާއެކު ސާބިތުކަމާއެކުގައި ކަމަށް ޕީއެންސީން ބުނެއެވެ.
